Tîsalònǐ ginǐ̤bǎ tôbǎ 2 - Kawyaw RC

Kòyò phû̌mò̤ tapwa̤

¹ Pṳwè̤ Khrî̌stuphû̌ toǒ꤮, he sò̌yṳ pwe̤ǐlṳ bǎ sî ta htû̌꤮ Běcǎ Ye̤shǔkhrî̌stu hè akha pě awi̤akè̌ ta pa geǒplǒkû̌ nû̌û dě a ǒ pě awi̤akè̌ htǒonu pwǎ.

² Kòyò tapwa̤pwa̤ dè hî̌ sî ta Běcǎ amṳni̤ hèto̤htohǒ hî̌numî̌ pa kwigwèbǎǐ sî꤮, yṳǎ yû lǒkho pûma̤ nî̌꤮, sò̌gònò̤ ǐsha lǒkho pûma̤ nî̌꤮. A dè hî̌ sî ta, Cǒmara nohî̌po̤phǎnǎ he dèmè̤tò̤dě kò pwe̤ǐ sî̌yalṳ bǎ he hǐnu a hî̌cǒtè̤ bǎbǎ, dèmè̤tò̤dě a dè hî̌ lǒkho ta lî̤ hèto̤ dě pa ǒ tabǎ, a dè hî̌cǒtè̤ hǐnu bǎbǎ yṳǎ lǒkho pûma̤ nî̌꤮.

³ Nolǒǎplò̤ǎ pûma̤ sîna̤ ma̤ nî̌꤮. Běcǎ Ye̤shǔkhrî̌stu hè hǒtò̤nu, kòyò toǒ shěshǔ Cǒmara pě dě kòyò htě a htè̌shǔkè Cǒmara ta Cǒmara a ta̤sû̌ta̤tòwònu tapwa̤ ǒlṳhtò̌ pě. Ta̤htǒotoǒ htûhtò̌wǐhtopě dě Běcǎ Ye̤shǔkhrî̌stu hè gesǒ pě amṳni̤ htǒonu a hè htûhtò̌ nǒ pě. Htodě Cǒmara ma̤pî̌phlǔkè kòjîkòphû̌mò̤nu tapwa̤ dě ngariǒkû pě.

⁴ Ta̤ lǒ̤꤮ bò htě kò kaǎ yǎta Cǒmara, mè̤tò̤mî̌, ta̤htě kòyò sabahtò̌bò yǎ toǒnu, kòjîkòphû̌mò̤ htǒotapwa̤ guhtè̌còwòshǔkè pě dě a bè̌htò̌yî̤ ana̤ ta adû̌khlo ta ta̤ lǒ̤꤮ bò htǒotoǒ hǐnu pě. Hǐnu akhû̌akhî, a hènṳ hǎnòò̌ dě Cǒmara ta̤lṳhtò̌ho akû pě dě a dǒkwèǐ ana̤ ta he mî̌ Cǒmara tapwa̤ hǐnu pě.

⁵ Mî̌ sî to̤ǐpe tò̤ ya? Bǎ he ǒkû̌pe ta sî akhanu, he pwe̤ǐlṳbòhto bǎ sî hǒ, amè̤tò̤ya?

⁶ Khònò̤htǒo ta̤htě a ma̤dǐdòpe kòyò phû̌mò̤ htǒotapwa̤ aklè̌nu a ǒ, dě mî̌titè numî̌ sî sî̌yatûû̌. Hǐnudě htû̌꤮ akhîakha hèto̤ pěnu, kòyòphû̌mò̤nu tapwa̤ ǒlṳhtò̌ pě.

⁷ Ta̤ǒhǔǒsè̌ htě a mî̌ ta̤phû̌mò̤shî̌hto htǒotoǒnu, a ma̤ ta̤ hǎkhû̌bǎo hǒ. Pwǎ̤tadě kòyò htě a ma̤dǐdò ta̤phû̌mò̤shî̌hto htǒotapwa̤nu, a ma̤dǐdò hè to̤htû̌ Cǒmara phî̌tephekè a htǒonu pě.

⁸ Htodě kòyò phû̌mò̤ htǒotapwa̤ ǒlṳhtò̌ pě pwǎ̤ta bǎ Běcǎ Ye̤shǔkhrî̌stu hè pě akhanu, a ma̤sikè nû̌û ta a ta̤sǎhtò̌ dě agokû htǒonu pě, dě a hè ma̤pî̌kè nû̌û ta a ta̤sîrîdû̌sîrîhtû htǒonu pě.

⁹ Kòjîkòphû̌mò̤ htǒotapwa̤nu a glè nî̤bǎ khînǎmo̤pha hǐkǒdû̌ a ta̤po̤ta̤phǎ dě a dǔlṳ lòhǎlòhobò bǎ kò ta ta̤cǒklî̌kî̌ya pṳ̂̌tacǎ, ta̤ma̤dòǐ pṳ̂̌꤮ tacǎ ta ta̤te̤pe̤ sû̌pi̤sò̌pi̤ toǒ pṳ̂̌꤮ tacǎ pě.

¹⁰ Ma̤pûhǐ a lòhǎlòhonṳ kòyò dě a glè si ta sû̌sò̌ toǒ ayanu, a noǎǐ a ta̤phû̌mò̤shî̌htonu toǒ pṳ̂̌꤮ tacǎ pě. Asî sò̌le̤sò̌lò̤ phî̌shǔ kû̌kò ta̤te̤ta̤mǎ tò̤ akhû̌akhî, a si lǒkho pě. Asî dè phî̌shǔ hî̌dě a nî̤bǎ lǒkho ta̤lû̌htò̌ge pě.

^11-12 Hǐnudě ma̤pûhǐ asî yṳǎ kû̌kò ta̤lòhǎlòho htǒo pě, htohǒtò̤ ma̤pûhǐ Cǒmara cèròkè kòyò htě a yṳǎ kû̌kò ta̤te̤ta̤mǎ tò̤ ayanu, htodě ma̤pûhǐ a cû̌ sò̌le̤sò̌lò̤ yṳǎpû ta̤phû̌mò̤shî̌htonu toǒ ayanu, Cǒmara plûhè kî̌ya bǎ asî ta̤lòho ashû̌asho htǒotacǎ hǒ.

Pwa̤ yṳǎna̤ǎta̤phû̌ toǒ to ihtǒ měgle sělě dě a ta̤yṳta̤nǎ akû

¹³ Pṳwè̤ sî꤮, sî mî̌ kòyò htě Běcǎ mo̤ǐ sîtoǒ dě pa hî̌bwǐhî̌sîrî Cǒmara ta sîya pṳ̂̌꤮ taplǎ, ma̤tè̤hî̌dě ma̤pûhǐ sî nî̤bǎ ta̤ma̤lû̌htò̌ge ayanu, Cǒmara wû̌lǎnǎhto sî dě khû̌lû̌khapenu hǒ. Dě Běcǎ sǎcahtǐ ma̤wî̤ma̤cahtǐ sî ta sî yṳǎ ta̤te̤ta̤mǎ akhû̌akhî, Cǒmara ma̤lû̌htò̌ge sî hǒ.

¹⁴ Dě pa pwe̤ǐ bǎ sî ta̤sò̌le̤sò̌lò̤ awi̤akè̌ htǒo khû̌khî, Cǒmara kaǎ sî hǐnu hǒ. Ma̤tè̤hî̌dě ma̤pûhǐ sî nî̤bǎ Běcǎ Ye̤shǔkhrî̌stu a ta̤sîrîdû̌sîrîhtûnu dě a kaǎ sî hǒ.

¹⁵ Hǐnudě pṳwè̤ toǒ꤮, pa sû̌ǐtòwòǐ dǒhtû̌ǐhtobǎ sî ta pa khû̌phěnò̌khinu toǒ bǎbǎ, mè̤tò̤mî̌ pa sû̌ǐtòwòǐhtobǎ sî ta lî̤ htě pa khwè̌cû̌ bǎ sî htǒotoǒ akûnu bǎbǎ, ǒměǒglekû̌ lǒkho kò dě pṳ̂měǐwǒkû̌ lǒkho kò nî̌꤮.

^16-17 Papha Cǒmara abwǐasîrî khû̌khî, a ǐlò̤ pa a ta̤ǐkhû̌ǐǎ tûjûpwa̤ ta ta̤kè̌shuǐ htě acǒatè̤ htǒotoǒnu hǒ. Pa Běcǎ Ye̤shǔkhrî̌stu ta papha Cǒmara htě a mo̤ǐ pa htǒotapwa̤ ǐkhû̌ǐǎ tû̌ta sî nî̌꤮. Htohǒtò̤ ma̤pûhǐ sî ta̤phî̌ta̤ma̤ lǒ̤꤮ bònu toǒ ta sî ta̤hî̌bǎhî̌sho lǒ̤꤮ bò toǒ wǒ ayanu, a ǐshû̌ǐshohtò̌ tû̌ta sî sò̌phlǒ nî̌꤮.