Лука 3 - Библия опэр крымски романи чиб

О Иоанн о Болдимари сиклярэл

¹ Андэ дэшупанджто брэш ки императореско э Тиберияско, кана опэр Иудея сас о Понтий Пилат, о Ирод сас о сагбус-тетрархи э Галилеяко, лэско пхрал о Филипп — о сагбус-тетрархи э Итуреяко тай э Трахонияки областяко, о Лисаний — о сагбус-тетрархи э Авилинеяко,

² ай о барэ попазя сас о Аннас тай о Кайафа, э збора э Дэвлэски сас э Иоаннески, э чявэски э Захариескерэски, ки ливади.

³ Пал отхэ о Иоанн гело алаи ко пхуя, савэ сас паш ко Иордани, тай пхэнэлас э манушэнги, тэ ачявэн пумарэ бэзя тай тэ болэнпэс, тэ мукел о Дэл лэнги бэзя.

⁴ Сар си яздимэ андэ книжка ки прарокески Исаиески: «Сэси шунлёл ки ливади: "Гортярэн о дром э Сагбуски, керэн доврус о тхан, опрал савэстэ Ов кан накхел!

⁵ Кажни хорипэ мэ овэл пхэрдо, тай кажни горас тай учё тхан — мэ фулен тэлэ; о болавдэ дрома мэ овэн доврус, тай о камбуря дрома — мэ гортён,

⁶ тай алаи о дживиндэ тэ дикхен э Дэвлэско кутардипэ"».

⁷ Ко Иоанн авэнас бут дюнядэс, тэ болэл ов лэн, ов лэнги пхэнэлас: — Тумэ, канлыс сапанэ породаки! Кон пхэнляс тумэнги тэ нашэн катар холи, кай авэл?

⁸ Дилэнца сикавэн, кай ачявдянус тумарэ бэзя. Ма тюшундиен тэ пхэнэн андэ тумэндэ: «Амаро дад — о Авраам!» Пхэнав тумэнги, кай ко Дэл си зор тэ керэл пуен э Авраамески акалэ барэндар.

⁹ О товэр пашло ко корини ки тэрэкеско, тай саво тэрэки на анэл лаче имиша, кан овэл чиндо тай чито андэ яг.

¹⁰ — Со амэнги тэ керас? — пхучелас о дюняс.

¹¹ О Иоанн пхэнляс: — Одова, кастэ си дуй гада, мэ дэл екх одолэс, савэстэ нанай били екх, тай одова, кастэ си хапэ, мэ керэл аякха жэ.

¹² Кидимаря э налогенги авэнас тэ болэнпэс. — Сикляримарина, — пхученас он, — со амэнги тэ керас?

¹³ — Ма лэн катар мануша бут, ниш камэл, — пхэнэлас ов лэнги.

¹⁴ Пхученас лэс о салдатя: — Ами со амэнги тэ керас? О Иоанн пхэнляс лэнги: — Ма лэн ко мануша ловэ зораса тай трашаимаса, никхас хохавнэс ма керэн тай дошалэс, бэшэн одолэса, со покинэн тумэнги.

¹⁵ О дюняс ишандиенас, тай алаи мангенас тэ галён, на о Христос си о Иоанн.

¹⁶ Адалэски о Иоанн пхэнэлас лэнги алаенги: — Мэ болав тумэн панеса, ай кан авэл Одова, Саво май зорало мандар, мэ на керав тэ пхутрав э кустик Лэски минидэндэ. Ов кан болэл тумэн э Шужэ Духоса тай ягаса.

¹⁷ Лэстэ андэ васта сэнэки, тэ шужарэл о гив. О гив кан кидэл андэ Пэ аранестэ, ай о сипэс кан тхарэл андэ яг, сави на мэрэл.

¹⁸ Тай бут авэр пхэнэлас о Иоанн, тай галярэлас э дюняски, тай пхукавэлас лэски Лошано Габэри.

¹⁹ О Иоанн лиляс тэ керэл дошалэс э сагбус-тетрархи э Иродес, кай лиляс э Иродиада, пэ пхралэски ромня, тай андар алаи ко канлыдэс дилэс лэскерэндэ.

²⁰ О Ирод алаи ко джюнгалипэ тхэдяс генэ екх, кай пханляс э Иоаннес андэ пханли.

О Иоанн болэл э Исусес

²¹ Кана алаи о дюняс болдяспэс ко Иоанн, сас болдо ли о Исус, тай кана пал ко болдипэ Ов зборизэлас э Дэвлэса, пхутэрдило опрэ удар,

²² тай опэр Лэстэ фулистино о Шужо Духос, фулистино андэ тэни, сар голуби. Тай опрал шунлило сэси: — Ту — Мо дэхло Чяво! Ту — Ми лош!

Э порода э Исусески

²³ Э Исусески сас паш ко триянда брэш, кана Ов лиляс тэ керэл иргатлыки э Дэвлэски. Сар алаи тюшундиенас, Лэско дад сас о Иосиф, тай Лэски папудэс сас о Илий,

²⁴ о Матфат, о Левий, о Мелхий, о Ианнай, о Иосиф,

²⁵ о Маттафия, о Амос, о Наум, о Еслий, о Наггей,

²⁶ о Мааф, о Маттафия, о Шымьи, о Иосиф, о Иодай,

²⁷ о Иоханан, о Рисай, о Зоровавель, о Шэалтиил, о Нирий,

²⁸ о Мелхий, о Аддий, о Косам, о Элмадам, о Ир,

²⁹ о Иосий, о Элиезер, о Иорим, о Матфат, о Левий,

³⁰ о Симеон, о Иуда, о Иосиф, о Ионам, о Элиаким,

³¹ о Мелеай, о Маинай, о Маттафай, о Нафан, о Давид,

³² о Иессей, о Овид, о Боаз, о Сала, о Нахшон,

³³ о Аминадав, о Админ, о Арний, о Хецрон, о Парец, о Иуда,

³⁴ о Яков, о Исаак, о Авраам, о Терах, о Нахор,

³⁵ о Серуг, о Реу, о Пелег, о Евер, о Шэлах,

³⁶ о Каинан, о Арпахшад, о Сим, о Ной, о Ламех,

³⁷ о Мафусал, о Енох, о Иаред, о Малелеил, о Каинан,

³⁸ о Енос, о Сиф, о Адам, о Дэл.