Лука 18 - Библия опэр крымски романи чиб

О пхукаипэ э Исусеско катар пхивли

¹ О Исус мангелас тэ сикавэл э сиклярдэнги, кай камэл екхараи тэ мангес ко Дэл тай тэ на керэс касэвэти, тай пхукавдяс лэнги акасавко пхукаипэ.

² — Андэ екхе дизатэ сас цындомари, саво на трашалас катар Дэл тай на ладжялас катар мануша.

³ Андэ одолэ жэ дизатэ бэшэлас пхивли, сави екхараи пхерэлас лэстэ тай мангелас: «Чячимаса кер ми дила, кутардие ман мэ дошалэстар».

⁴ Саво-то вахыти о цындомари лаки пхэнэлас «на», тай дэчи тюшунды: «Мэ катар Дэл на трашав тай манушэндар на ладжяв,

⁵ ай адая пхивли на дэл ман рагати. Мэ кан кутардияв ла, тэ на авэл ой генэ тэ быздэрдиел ман».

⁶ Тай о Сагбус пхэнляс: — Шунэн, со пхэнляс о хохавно цындомари?

⁷ Ай сар о Дэл на кан кутардиел одолэн, савэн Ов лиляс, савэ манген Лэс ли о дес ли э рат? Сар Ов кан сидэл э ярдымеса?

⁸ Пхэнав тумэнги: Ов бисидимаско кан кутардиел лэн. Ай кана о Чяво о Манушыкано кан овэл, Ов кан аракхел пакяпэ опэр пху?

Катар фарисеи тай катар кидимари ки налогенго

⁹ Одолэнги, кон пакялас андэ пумаро чячипэ тай фаласа дикхенас карин аврэндэ, о Исус пхукавдяс акасавко пхукаипэ:

¹⁰ — Дуй мануша алэ андэ храми тэ манген э Дэвлэс. О екх андар лэндэ сас фарисеи, ай авэр — кидимари э налогенго.

¹¹ О фарисеи ущино тай акаякха пхэнэлас э Дэвлэски: «Дэвла, лачипэ Туки, кай мэ на асавко, сар авэра мануша: чёра, наисаня, кахпэдэс я сар акава кидимари э налогенго.

¹² Мэ астарав оразас дувар андэ базари тай дав дэшто паи мэ казандимастар».

¹³ Ай о кидимари э налогенго тэрдо дурал, на мангелас джи пэ якха тэ ваздэл опрэ, ами марэлас по колин тай пхэнэлас: «Дэвла, ов миласа мандэ, бэзялэстэ».

¹⁴ Пхэнав тумэнги, кай адава мануш гело кхерэ чячё ангал Дэл, ами на о фарисеи. Вай кажни, кон ваздэлпэс, кан овэл тикнярдо, ай кажни, кон тикнярэлпэс, кан овэл ваздино.

О Исус дэл лачипэ э пуен

¹⁵ Сарсавэ мануша анэнас ко Исус пуен, Ов тэ колизэл лэндэ. О сиклярдэ дикхенас адава тай тэрдярэнас лэн.

¹⁶ Ай о Исус диняс икос лэн Пэстэ тай пхэнляс: — Мукен о пуя, мэ авэн Мандэ, ма астарэн лэн, вай э Дэвлэско о Патишайлыки си асавкенги, сар он.

¹⁷ Пхэнав тумэнги чячипэ: кон на кан лэл э Дэвлэско Патишайлыки, сар пуёс, одова на кан дэл андэ лэстэ.

О зборима э Исусеско э барвалэ барэса

¹⁸ Екх баро мануш пхучляс Лэс: — Лачё Сикляримарина, со манги тэ керав, тэ овэл мандэ бибытимаско бэшыпэ?

¹⁹ — Соски ту пхэнэс Манги «лачё»? — пхэнляс о Исус. — Никхон нанай лачё, екх о Дэл.

²⁰ Ту джянэс о тхэдиматэс: ма кер кахпэлыки, ма мудар, ма чёр, ма хохав, гин дадэс тай дэя.

²¹ — Алаи адава мэ керав дага катар деса мэ тикнимаскерэндар, — пхэнляс ов.

²² О Исус шунляс адава тай пхэнляс лэски: — Екх туки на рэсэл. Бикин алаи, со си тутэ, тай дагытие о ловэ ко чёрэ, тай дэчи тутэ кан овэл барвалипэ опрэ. Дэчи эла тай джя пал Мандэ.

²³ Кана о баро шунляс адава, ов уло касэвэтлыс, вай сас бут барвало.

²⁴ О Исус дикхляс карин лэстэ тай пхэнляс: — Со пхаро э барвалэнги тэ дэн андэ Дэвлэско Патишайлыки!

²⁵ Локес эси э камилаки тэ накхел андар ки сувьяко кан, ниш э барвалэски тэ дэл андэ Дэвлэско Патишайлыки.

²⁶ Одола, кон адава шунэлас, пхучлэ: — Кон дэчи кан кутардиелпэс?

²⁷ О Исус пхэнляс: — Со нащи керэл о мануш, си зор ко Дэл тэ керэл.

²⁸ Дэчи о Пётар пхэнляс: — Аки, амэ ачявдям алаи, со амэндэ сас, тай гелям пал Тутэ.

²⁹ О Исус пхэнляс лэнги: — Пхэнав тумэнги чячипэ: кажни, кон мукляс кхер, я ромня, я пхралэн, я дадэс тай дэя, я пуен булуб э Дэвлэски Патишайлыкески,

³⁰ кан диндёл май бут адалэ вахытестэ, тай дэчи — э бибытимаско бэшыпэ.

О Исус трито рази пхэнэл пэ мэримастар тай дживиндимастар

³¹ О Исус гелдяс дэшудо сиклярдэн ригатэ тай пхэнляс лэнги: — Аки, амэ ваздасамэн ко Иерусалими, тай отхэ кан овэл кердо алаи, со яздылар о прарокя катар Чяво ко Манушыкано.

³² Ов кан овэл дино ко мануша, савэ на джянэн э Дэвлэс. Одола кан асан Лэстар, кан кушэн Лэс, кан чюнгарэн опэр Лэстэ,

³³ кан марэн камчияса тай пал отхэ кан мударэн. Ай ко трито дес Ов кан дживиндёл.

³⁴ О сиклярдэ ништо андар адалэстэ на галилэ; алаи, со Ов пхэнляс, сас лэнги пханло, тай он на галёнас, состар Ов пхэнляс.

О Исус аиндэрдиел э корэ чёрэс

³⁵ Кана о Исус пашолас ко Иерихони, ко дром бэшло сас коро тай мангелас.

³⁶ Кана ов шунляс, кай пашал джял дюняс, ов пхучляс, со овэл.

³⁷ — Авэл о Исус андар Назарет, — пхэнлэ лэски.

³⁸ Дэчи о коро диняс бэбэря: — Исус, Чяво э Давидеско! Аядие ман!

³⁹ Одола, кай джянас ангал, лилэ тэ пхэнэн ов тэ пхандэл по муй, ай о коро дэлас бэбэря май лачес: — Чяво Давидеско, аядие ман!

⁴⁰ О Исус тэрдило тай пхэнляс, адалэ манушэс тэ анэн Лэстэ. Кана одова пашыло, о Исус пхучляс лэс:

⁴¹ — Со ту мангес, Мэ тэ керав туки? — Сагбуса, мэ мангав тэ дикхав, — пхэнляс о коро.

⁴² О Исус пхэнляс лэски: — Дикх! То пакяпэ аиндэрды тут.

⁴³ О коро бирдэн лиляс тэ дикхел тай гело пал Исус, та ли махтадиелас э Дэвлэс. Тай алаи о дюняс, саво дикхелас адава, махтадиелас э Дэвлэс.