Кердипэ 8 - Библия опэр крымски романи чиб

Бытиел о бугулдима

¹ Ай о Дэл тюшундиелас катар Ной тай катар алаи вэшэски гайваня тай катар кхерутнэ гайваня, савэ сас лэса андэ кавчеги, тай Ов бичялдяс балвал опэр пху, тай о паня лилэ тэ залагизэн.

² О тхана э хоримаски тай о пэнчерэс э булутенги пханлилэ, тай о брышым тэрдило тэ чёрдёл опрал.

³ О пани тэмэли джялас опрал пху, тай ко шэлупэинда дес ов лачес гело.

⁴ Ко дэшэфтато дес эфтато чёнэско о кавчеги тэрдило опэр горадэс Арарат.

⁵ О паня генэ залагизэнас джи ко дэшто чён, тай андэ екхто дес ко дэшто чён лилэ тэ дикхиндён опрал о горадэс.

⁶ Саранда десендар о Ной пхутэрдяс э пэнчера, сави ов кердяс андэ кавчеги,

⁷ тай мукляс э карга, тай одоя урялас тай авэлас палэ джи одолэ вахытески, бискай о пани опэр пху на шукило.

⁸ Дэчи о Ной мукляс голубес, тэ дикхел, гело о пани опрал пху.

⁹ Ай о голуби на аракхляс шуко тхан тэ мукелпэс, тай ало ко Ной андэ кавчеги, вай о пани учярэлас алаи э пху. О Ной сидиняс по васт тай лиляс э голубес палэ пэстэ андэ кавчеги.

¹⁰ Накхло эфта дес, ов генэ мукляс э голубес андар кавчеги.

¹¹ Кана бэлвэле о голуби ало, андэ муй лэстэ сас чинди зэлэно маслинаки патри. Дэчи о Ной галило, кай о пани гело опрал пху.

¹² Ов ишанды генэ эфта дес тай генэ мукляс э голубес, тай акана о голуби на ало палэ.

¹³ Кана сас э Ноески шовшэл екх брэш, андэ екхто дес ки екхе чёнэско лэски бэшымаско э пху шукили катар пани. О Ной пхутэрдяс опрал о кавчеги, ваздиняспэс тай дикхляс, кай э пху шуки.

¹⁴ Ко биш эфтато дес ки дуйто чёнэско э пху ули алаи шуки.

¹⁵ Дэчи о Дэл пхэнляс э Ноески:

¹⁶ — Никлё андар кавчеги ту, ти ромни, тэ чявэ тай лэнги ромня.

¹⁷ Никал аври алаи э дживиндэн, савэ туса: чириклен, гайванен тай алаен, кай балакадиен, он тэ пхэрэн э пху, тэ аракхлён лэндэ генэ тай тэ бутён.

¹⁸ Тай о Ной никлисто андар кавчеги екхетханэ пэ чявэнца, пэ ромняса тай пэ чявэнги ромнянца.

¹⁹ Алаи о гайваня, тай кай балакадиен, тай алаи о чирикля — алаи, со кхелавэлпэс опэр пху, — никлистэ андар кавчеги, екх порода пал екхаврэстэ.

О Дэл керэл завети э Ноеса

²⁰ О Ной кердяс э Яхвэ Сагбуски алтари, лиляс шужэ гайванен тай чириклен андар кажни порода, чиндяс лэн тай алаи тхардяс опэр яг.

²¹ О Сагбус о Яхвэ шунляс лачё кхандэл тай пхэнляс андэ Пэ илэстэ: — На кан дав генэ Мэ арманя э пху андар мануш. Тикнярила о ило э манушэско сидэлпэс ко канлыки, ай генэ на кан мударав алаи о дживиндо, сар кердём анкха.

²² Бискай си э пху, на кан бытиел о вахыти, кана о мануша барярэн тай кидэн о гив, кана овэл о шудрипэ тай тхарипэ, о милай тай о вэн, о дес тай э рат.