Кердипэ 7 - Библия опэр крымски романи чиб

Баро бугулдима

¹ О Сагбус о Яхвэ пхэнляс э Ноески: — Дэ андэ кавчеги алаи э хорандаса. Мэ дикхав, кай машкарэ алаендэ, кай бэшэн андэ адава вахыти, екх ту чячё ангал Мандэ.

² Лэ туса по эфта парэс андар вэрсавэ шужэ гайванен, муршэн тай джювлен, тай по екх пара андар кажни порода вэрсавэ нашужэ гайванен, муршэн тай джювлен,

³ тай по эфта парэс андар вэрсавэ булутенги чириклен, муршэн тай джювлен, тэ гаравэн лэги порода опэр пху.

⁴ Эфта десендар Мэ кан бичялав брышым опэр пху саранда дес тай саранда ратя. Мэ кан кхосав опрал муй ки пхуяко алаи о дживиндо, савэс Мэ кердём.

⁵ О Ной кердяс алаи, сар пхэнляс лэски о Сагбус о Яхвэ.

⁶ Кана о паня э бугулдимаски алэ опэр пху, э Ноески сас шовшэл брэш.

⁷ О Ной, лэски чявэ, лэски ромни тай о ромня лэски чявэнги динэ андэ кавчеги, тэ кутардиенпэс катар бугулдима.

⁸ О шужэ тай нашужэ гайваня, чирикля тай алаи, кай бэшэн по бут,

⁹ алэ ко Ной тай динэ андэ кавчеги парэнца: мурш тай джювли, сар пхэнляс э Ноески о Дэл.

¹⁰ Эфта десендар опэр пху алэ о паня э бугулдимаски.

¹¹ Кана э Ноески сас шовшэл брэш, андэ дэшуэфтато дес дуйто чёнэско, пхарэ алаи о тхана э хоримаски, пхутэрдилэ о пэнчерэс э булутенги,

¹² тай опэр пху чёрдёлас о брышым саранда дес тай саранда ратя.

¹³ Андэ одова жэ дес динэ андэ кавчеги о Ной, лэски чявэ о Сим, о Хам тай о Яфет, э ромни э Ноески тай о ромня лэски тринэ чявэнги.

¹⁴ Лэнца динэ андар алаи о породэс вэрсавэ гайваня: вэрсавэ породэс вэшэски гайваня, кхерутнэ гайваня, алаи о породэс, кай балакадиен опэр пху, алаи о породэс о чирикля, алаи о дживиндэ э пхакенца.

¹⁵ Алаи, андэ кастэ тэнышы бэшымаско, алэ ко Ной тай динэ андэ кавчеги парэнца,

¹⁶ мурш тай джювли андар алаи ко породэс, сар пхэнляс э Ноески о Дэл. Тай дэчи о Сагбус о Яхвэ пханляс пал лэстэ о удар.

¹⁷ О бугулдима сас опэр пху саранда дес, тай о паня бутёнас, ваздинэ о кавчеги, тай ов диняс джялдави опрал пху.

¹⁸ О паня бутёнас тай ваздиндёнас, ай о кавчеги дэлас джялдави опэр пани.

¹⁹ Он ваздиндилэ опэр пху аякха учес, кай учярдэ алаи о уче горадэс тал булутя.

²⁰ О паня ваздиндилэ тай учярдэ алаи о горадэс учес, ниш дэшупандж куня.

²¹ Алаи о дживиндо, со кхелавэласпэс опэр пху, муло: чирикля, гайваня, вэшэски гайваня, алаи, со бэшэл бут опэр пху, тай алаи о мануша.

²² Алаи опэр шукипэ, андэ каски хэрнендэ сас тынышы бэшымаско, муло.

²³ Алаи о дживиндо сас кхосло опрал пху: о мануша тай о гайваня, тай савэ балакадиен, тай о чирикля э булутенги. Ачило екх о Ной тай одола, кон сас лэса андэ кавчеги.

²⁴ О пани авэлас тай авэлас опэр пху шэлупэинда дес.