Кердипэ 50 - Библия опэр крымски романи чиб

О мэрипэ тай о парома э Яковеско

¹ О Иосиф пэло опэр пэ дадэстэ, руно опэр лэстэ тай чюмидиняс лэс.

² Ов пхэнляс пэ иргатенги э враченги тэ керэн бальзамирования лэски дадэски, тай о врачя кердэ бальзамирования э Израилески.

³ О врачя керэнас адава саранда дес. Дэчи эфтадэша дес о египтяня ровэнас пал муло.

⁴ Кана накхлэ о деса э роимаски, о Иосиф пхэнляс э фараонески иргатенги: — Тэ аракхлём мэ мила андэ тумарэ якхендэ, манген андар мандэ э фараонес тай пхэнэн лэски:

⁵ «Мо дад пхэнляс манги тэ хав совля тай пхэнляс: "Мэ мэрав; тхэ ман андэ склепи, саво мэ гортярдём манги ки пху Ханаан". Мук ман тэ джяв тэ пароскерав мэ дадэс. Пал отхэ мэ кан авав».

⁶ О фараони пхэнляс: — Джя, пароскер тэ дадэс аякха, сар ту халян совля.

⁷ О Иосиф гело тэ пароскерэл пэ дадэс, тай лэса гелэ алаи о иргатя тай о барэ мануша э фараонески, тай алаи о барэ мануша э Египтески,

⁸ тай алаи о кхер э Иосифеско, тай лэски пхрала, тай алаи о кхер лэски дадэско. Андэ Гошэн ачилэ екх лэнги пуя тай о атарэс о барэ тай э тикнэ гайваня.

⁹ Лэнца сас бричкес тай атлыдэс; адава сас баро табури.

¹⁰ Он алэ ко тхан Горен-Атад, кай сас пал Иордани, тай отхэ лилэ лачес тэ ровэн. Отхэ о Иосиф эфта дес ровэлас пэ дадэски.

¹¹ Кана о ханаанея, о мануша одолэ пхуяки, дикхлэ роипэ ко Горен-Атад, он пхэнлэ: «Ко египтяня баро роипэ тай касывэти». Аки соски одова тхан паш ко Иордани бучёл Авел-Мицраим.

¹² Аякха о чявэ э Яковески кердэ, со ов пхэнляс:

¹³ он гелдэ лэс ки пху Ханаан тай пароскердэ андэ пищера ки ливади Махпела, паш ко Мамрэ. Адая пищера о Авраам киндяс ко хетеи ко Эфрон екхетханэ э ливадяса, тэ овэл лэстэ тхан паромаски.

¹⁴ Кана о Иосиф пароскердяс пэ дадэс, ов екхетханэ пэ пхралэнца тай алаенца, кон гело лэса тэ пароскерэл э дадэс, гело палэ ко Египти.

О Иосиф апувикерэл пэ пхралэн

¹⁵ Кана о дад муло, о пхрала э Иосифески тюшундылар: «Кай о Иосиф тэ гаравэл холи амэнги тай акана тэ кан покинэл амэнги андар алаи ко джюнгалипэ, саво амэ лэски кердям?»

¹⁶ Тай он бичялдэ ко Иосиф тэ пхэнэн: — Ангал мэрипэ о дад ачявдяс асавке пхэнлиматэс:

¹⁷ «Аки со тумэ камэл тэ пхэнэн тумарэ пхралэски э Иосифески: "Мэ мангав тут, апувикер тэ пхралэн лэнги дош тай о бэзя, савэ он кердэ, кай кердэ туса асавко джюнгалипэ. Акана мангав тут, апувикер о бэзя э иргатенги э Дэвлэски тэ дадэскерэски"». О Иосиф ровэлас, кана лэски пхэнэнас адала зборэс.

¹⁸ Лэски пхрала алэ, пэлэ ангал лэстэ тай пхэнлэ: — Амэ — тэ иргатя.

¹⁹ О Иосиф пхэнляс: — Ма трашан. Та со, мэ о Дэл?

²⁰ Тумэ тюшундынус мамуй мандэ джюнгалипэ, ай о Дэл болдиняс лэс андэ лачипэ тай кутарды о бэшыпэ бутэ манушэнги.

²¹ Оничин ма трашан: мэ кан хавдярав ли тумэн, ли тумарэ пуен. Ов лошаскердяс лэн тай зборизэлас лэнца лачимаса.

О мэрипэ э Иосифеско

²² О Иосиф бэшэлас андэ Египти екхетханэ э хорандаса пэ дадэскерэса, тай бэшло шэлу дэш брэш.

²³ Ов сас джи, кана сас э трито порода о пуя э Ефремески. Аякхажэ о Иосиф дикхляс тай астардяс опэр кочендэ э пуен э Махирескерэн, саво сас о чяво э Манассияско.

²⁴ О Иосиф пхэнляс пэ пхралэнги: — Мэ мэрав, ай о Дэл кан авэл тэ керэл ярдыми тумэнги тай кан никалэл тумэн андар адалэ пхуятэ ки пху, сави Ов халяс совля тэ дэл ко Авраам, э Исаак тай э Яков.

²⁵ О Иосиф пхэнляс э Израилески чявэнги тэ хан совля: — О Дэл кан авэл тумэндэ тэ керэл ярдыми, тай дэчи тумэ камэл тэ никалэн атхар мэ кокала.

²⁶ Кана о Иосиф муло, лэски сас шэлу дэш брэш. Лэски кердэ бальзамирования тай тхэдэ андэ склепи андэ Египти.