Кердипэ 49 - Библия опэр крымски романи чиб

О Яков алгыштиел пэ чявэн

¹ О Яков диняс икос пэ чявэн тай пхэнляс: — Кидэнтумэн агорял, тай мэ кан пхэнав, со кан овэл тумэнца андэ деса, кай авэн.

² Кидэнтумэн тай шунэн, о чявэ э Яковески, шунэн тумарэ дадэс э Израилес!

³ Рувим, ту — мо баштутно, ми зор, о баштутно имишы мэ муршыканэ зорако; ов алаендар зорало тай лэс алаи гинэн.

⁴ Ай, сар пани, тут нащи тэрдярэс. Акана ту на кан овэс баштутно, вай ту пашлилян опэр тхан тэ дадэско тай гарамладын мо тхан.

⁵ О Симеон тай о Левий — пхрала, лэнги камадэс керэн хурлуки.

⁶ Мэ на кан овав андэ лэнги дилэндэ, мэ на кан овав лэнца екх, вай он холясаилэ тай мударэнас э муршэн, манглэ тай чиндэ э гурувэн.

⁷ Дини арман лэнги холи, вай джюнгали, тай о канлылыки, вай бут баро! Мэ кан чяв лэн машкарэ ко пуя ки Яковески тай кан дурярав лэн андэ Израиль.

⁸ Иуда, тэ пхрала кан махтадиен тут, то васт кан овэл опэр мэн тэ душманенги, о чявэ тэ дадэски кан бангён туки.

⁹ Ту — тэрно леви, Иуда; ту авэс хамаса, мо чяво. Сар леви, ов пэрэл ки пху тай пашлёл, сар львица — кон кан мангел лэс тэ астарэл?

¹⁰ О скипетр на кан ачявэл э Иудас, тай о пуя лэски екхараи кан астарэн э ровли э патишаенги, бискай на кан авэл о Шыло, Кас кан тхэн кан о дюнядэс.

¹¹ Ов кан пхандэл пэ джёрэс ки дракхаки лазас, пэ джёрорэс — ки зиядэ ветка. Ов кан халярэл пэ савутя андэ винастэ, о уряипэ пинро — андэ рат ки дракхако.

¹² О якха лэски — калэ катар винас, о данда лэски — катар сути парнэ.

¹³ О Завулон кан бэшэл паш ки моря тай лэстэ кан авэн караблядэс; лэски четя кан сидэнпэс джи ко Сидон.

¹⁴ О Иссахар — зорало джёро, пашло машкарэ ко пхарэ гонэ.

¹⁵ Ов дикхляс, со лачё лэско тхан э рагатеско тай со лачи лэски пху; ов кан бангярэл пэ пхике тал пхарипэ тай кан керэл бути сар иргати.

¹⁶ О Дан диндёл тэ керэл цындос пэ дюняски сар екх андар порода ки Израилески.

¹⁷ О Дан кан овэл э сапэнги паш ко дром, гадюка ки ливади, сави дандэлэл э грастэс чянгатар, тай о атлыс пэрэл тэлэ.

¹⁸ О Сагбус о Яхвэ, Тутэ родав мэ кутардипэ!

¹⁹ Опэр Гад кан пэрэн чёра, ай ов кан пэрэл опэр лэндэ палэ тай кан кувдиел.

²⁰ О хапэ э Асиреско кан овэл бут; ов кан анэл патишайлытико хапэ.

²¹ О Неффалим — мукли лани, сави анэл шукарэ пуен.

²² О Иосиф — имишэнго дракхако кущёки, имишэнго кущёки паш ко пани, савэски веткес ваздэнпэс опэр стинас.

²³ Холинаса пэрэнас опэр лэстэ тай мукенас андэ лэстэ стриладэс.

²⁴ Ай о луки лэско ачило зорало, э зор лэски вастэнги — о зорало Дэл э Яковеско, о нав э Чёбанеско тай о Бар э Израилеско.

²⁵ Ов — о Дэл тэ дадэско, Саво кан керэл туки ярдыми. Ов — о Дэл Баро-Зорало, Саво кан алгыштиел тут. Ов кан дэл тут алгыштима э булутенго опрал, тай безднако тэлал, тай алгыштима э дэенго, савэ хавдярэн э пуен.

²⁶ О алгыштима тэ дадэско зиядэ, ниш алгыштима э пуранэ горадэнго, ниш алгыштима э пуранэ ливаденго. Мэ овэн он алаи опэр шэро ки Иосифеско, опэр чикат ки тхэдэ князеско машкарэ пэ пхралэндэ.

²⁷ О Вениамин — джюнгало рув; сабахтан ов хал со астардяс, бэлвэле палящиел, со чёрдэ.

²⁸ Аки касавке си дэшудуй породэс э Израилески. Аки со пхэнляс лэнги о дад, кана алгыштиелас лэн; кажнес ов диняс лэнго алгыштима.

О мэрипэ тай о парома э Яковеско

²⁹ О Яков пхэнляс лэнги: — Мэ джяв мэ дадэндэ. Пароскерэн ман мэ дадэнца андэ пищера ки ливади ки хетеески ки Эфронески,

³⁰ андэ пищера ки ливади Махпела паш ко Мамрэ андэ Ханаан, сави о Авраам киндяс ко хетеи ко Эфрон сар паромаско тхан.

³¹ Отхэ сас пароскердэ о Авраам тай лэски ромни э Сарра, отхэ сас пароскердэ о Исаак тай лэски ромни э Рэвэка, тай отхэ мэ пароскердём э Лия.

³² Э ливади тай э пищера сас киндэ ко хетея.

³³ О Яков бытэрды тэ пхэнэл пэ чявэнги, ваздиняс пэ пинрэ опэр тхан, мукляс по тынышы тай гело пэ дадэндэ.