Кердипэ 4 - Библия опэр крымски романи чиб

О Каин тай о Авель

¹ О Адам сас э Еваса пэ ромняса, тай ой насвалили пуёстэ тай аракхлило о Каин. Ой пхэнляс: «Э ярдымеса э Сагбуски Яхвэскерэса мэ диндилём манушэс».

² Дэчи латэ аракхлило лэско пхрал о Авель. О Авель чярявэлас э бакрэн тай бузнен, ай о Каин барярэлас опэр пху.

³ Вахытестар о Каин андяс имиша э пхуяки, сар башладипэ э Сагбуски э Яхвэски,

⁴ о Сагбус о Яхвэ махтады э Авелес тай лэско башладипэ,

⁵ ай э Каинэс тай лэско башладипэ Ов на махтады. О Каин холясаило, тай лэско муй калило катар холи.

⁶ Дэчи о Сагбус о Яхвэ пхэнляс э Каинэски: — Соски ту холязэс? Соски то муй калило?

⁷ Ту тэ керэса чячипэ, та со, ту на кан ваздэс то муй? Ай ту тэ керэс начячипэ, дэчи тэ ударэстэ гаравдэпэс бэзя: ов манген тэ овэн опэр тутэ, ай ту камэл тэ овэс опэр лэстэ.

⁸ О Каин пхэнляс пэ пхралэски: — Гадэ ки ливади. Кана он сас ки ливади, о Каин читяспэс опэр пэ пхралэстэ ко Авель тай мудардяс лэс.

⁹ Дэчи о Сагбус о Яхвэ пхэнляс э Каинэски: — Кай то пхрал о Авель? — На джянав, — пхэнляс одова. — Та со, мэ дикхав пал мэ пхралэстэ?

¹⁰ О Сагбус о Яхвэ пхэнляс: — Со ту кердян? О рат тэ пхралэско пхэнэл Манги андар пху.

¹¹ Акана ту дино арман, кувдимэ андар пху, сави пхутэрдили, тэ лэл о рат тэ пхралэско, чёрдо тэ вастэса.

¹² Кана ту кан керэс бути опэр пху, ой на кан дэл тут пэ имиша. Ту кан пхерэс опэр пху акарин-окорин, сар би кхерэско.

¹³ О Каин пхэнляс э Яхвэ Сагбуски: — Мо хурлуки пхаро, ниш ми зор тэ накхав.

¹⁴ Анкха ту кувдиес ман катар муй ки пхуяко, тай мэ кан овав гаравдо Тутар. Мэ кан пхерав опэр пху акарин-окорин, сар би кхерэско, тай кон кан дикхел ман, одова кан мударэл ман.

¹⁵ Ай о Сагбус о Яхвэ пхэнляс лэски: — На. Кон кан мударэл э Каинэс, одова кан диндёл эфтавар бут. Тай о Сагбус о Яхвэ кан керэл э Каинэски метка, тай никхон, тэ дикхела лэс, тэ на мударэл лэс.

¹⁶ О Каин гело катар Сагбус Яхвэ тай бэшэлас андэ пху Нод, ко вастоки катар Эдэми.

О пуя э Каинэски

¹⁷ О Каин сас пэ ромняса, тай ой насвалили пуёстэ тай аракхлило о Ханох. Одова вахыти о Каин тхэлас диз тай тхэдяс ла о нав пэ чявэско Ханох.

¹⁸ Ко Ханох аракхлило о Ирад, ко Ирад аракхлило о Мехиаэл, ко Мехиаэл аракхлило о Метушаэл, тай ко Метушаэл аракхлило о Ламех.

¹⁹ О Ламех лиляс пэски ромнян до джювлен: екх бучёлас Ада, авэр — Цылла.

²⁰ Ки Ада аракхлило о Явал: ов уло о дад одолэнго, кон бэшэл андэ катунэс тай барярэл гайванен.

²¹ Лэско пхрал бучёлас Ювал: ов уло о дад алаенго, кон кхелэл опэр арфа тай дурули.

²² Ли ки Цылла сас чяво, Тувал-Каин, саво керэлас вэрсавэ шэя катар бронза тай састэр. Э пхэн э Тувал-Каинэски сас Наама.

²³ О Ламех пхэнляс пэ ромненги: — Ада тай Цылла, шунэн ман, ромня э Ламехески, шунэн мэ зборэс. Мэ мудардём муршэс андар одолэстэ, кай ов чиндяс ман, тэрнагарэс андар одолэстэ, кай ов чялавдяс ман.

²⁴ Андар Каин тэ си о душманлыки эфтавар бут, андар Ламех — эфтадэша эфтавар бут.

О Сиф тай о Енос

²⁵ О Адам генэ сас пэ ромняса, тай латэ аракхлило чяво тай тхэдяс лэс Сиф, пхэнляс: «О Дэл башлады ман авэрэ пуёс ко тхан ки Авелеско, савэс мудардяс о Каин».

²⁶ Ли ко Сиф сас чяво, тай ов тхэдяс лэс Енос. Одова вахыти о мануша лилэ тэ манген о нав э Сагбуски Яхвэско.