Кердипэ 29 - Библия опэр крымски романи чиб

О Яков авэл андэ Паддан-Арам

¹ О Яков гело англэ по дром тай ало ки пху ко васточня дюнядэс.

² Отхэ ов дикхляс ханинг ки ливади тай паш латэ трин атарэс бакрэн, вай андар одолэ ханингатэ пиявдярэнас э гайванен. Э ханинг сас пханли барэ барэса.

³ Кана алаи о атарэс кидэнаспэс, о чёбаня пэравэнас опрал ханинг тай пиявдярэнас э бакрэн, ай дэчи тхэнас о бар палэ одолэ тханэстэ.

⁴ О Яков пхучляс ко чёбаня: — Пхралалэн, катар тумэ? — Амэ андар Харан, — пхэнлэ он.

⁵ Ов пхэнляс лэнги: — Джянэн тумэ э Лаванес, э Нахорески турунес? — Ва, джянас, — пхэнлэ он.

⁶ О Яков пучляс: — Лэстэ алаи лачё ? — Лачё, — пхэнлэ он. — Ай аки э Рахиль, лэски чяй, авэл э бакрэнца.

⁷ — О кхам дага учес, — пхэнляс ов, — дага нанай о вахыти тэ кидэс о атарэс. Пиявдярэн э бакрэн тай кувдиен лэн палэ ки ливади.

⁸ — Амэ нащи, — пхэнлэ он, — бискай на кидэнпэс алаи о атарэс, тай о бар на кан пэравэн катар ханинг. Дэчи амэ кан пиявдярас э бакрэн.

⁹ Ов дага зборизэлас лэнца, тай пашыли э Рахиль э бакрэнца: ой чярярэлас э бакрэн.

¹⁰ Кана о Яков дикхляс э Рахиля, пэ какески э Лаванески чяя, ов пашыло, пэравдяс о бар катар ханинг тай пиявдярдяс э Лаванески бакрэн.

¹¹ Дэчи о Яков чюмидиняс э Рахиля тай лачес руно,

¹² пхэнляс э Рахиляки, кай ов — тухуми лаки дадэско тай о чяво э Рэвэкако. Ой прастанили тай пхукавдяс адава пэ дадэски.

¹³ О Лаван шунляс, кай ало лэско племянники о Яков, прастанило мамуй, диняс лэс ангали, чюмидиняс тай андяс пэстэ андэ кхер. О Яков пхукавдяс лэски алаестар,

¹⁴ тай о Лаван пхэнляс: — Ту мо тэни тай мо рат. Кана о Яков бэшло лэстэ чён,

О пхукаипэ катар прандома ки Яковеско

¹⁵ о Лаван пхэнляс лэски: — Хоч ту сан манги тухуми, соски ту камэл тэ керэс манги бути ботени? Пхэн манги, со туки тэ покинав.

¹⁶ Ай ко Лаван сас дуй чяя: э бари бучёлас Лия, ай э тикни — Рахиль.

¹⁷ Ки Лия сас лаче шукара якха, ай ки Рахиль сас шукар ли о муй, ли о тэни.

¹⁸ О Яков дэхляс э Рахиля тай пхэнляс э Лаванески: — Мэ кан керав бути туки эфта брэш андар тэ тикнэ чяятэ ки Рахиль.

¹⁹ О Лаван пхэнляс: — Зиядэ мэ кан дав ла тутэ, ниш кастэ-то аврэстэ. Ачё мандэ.

²⁰ О Яков кердяс иргатлыки эфта брэш, тэ лэл э Рахиля, ай он дикхиндилэ лэски, сар набут дес, вай ов дэхэлас ла.

²¹ Дэчи о Яков пхэнляс э Лаванески: — Дэ ман мэ ромня, тэ бэшав ласа сар ромняса, ало мо вахыти.

²² О Лаван диняс икос алаен, кай бэшэнас агорял, тай кердяс мисяфири.

²³ Ай кана ули бэлвэль, ов лиляс пэ чяя э Лия тай диняс ла ко Яков, тай о Яков пашлило ласа.

²⁴ (О Лаван диняс пэ чяя иргатинка э Зилпа.)

²⁵ Кана уло сабаги, о Яков галило, кай адая э Лия! Ов пхэнляс э Лаванески: — Со ту кердян манца? Мэ вай кердём иргатлыки туки андар Рахиль. Соски ту хохавдян ман?

²⁶ О Лаван пхэнляс: — Амэндэ аякха на керэн, тэ дэс ромэстэ э тикнэ чяя ангал бари.

²⁷ Бэш базари адалэ чяяса, ай дэчи амэ кан дас тут ли э тикня, аврэ эфта брэшэнги иргатлыкески.

²⁸ О Яков аякха да кердяс: бэшло базари э Лияса, ай дэчи о Лаван диняс лэс ромня пэ чяя э Рахиля.

²⁹ О Лаван диняс э Рахиля пэ иргатинка э Билха.

³⁰ О Яков лиляс тэ бэшэл э Рахиляса тай дэхэлас э Рахиля бут, ниш э Лия. Ов керэлас бути э Лаванески генэ эфта брэш.

О пуя э Яковески

³¹ Кана о Сагбус о Яхвэ дикхляс, кай о Яков на дэхэлас э Лия, Ов кердяс, тэ овэн латэ пуя. Ай э Рахиль сас би пуенги.

³² Э Лия насвалили пуёстэ тай аракхлило латэ чяво. Ой пхэнляс: «О Сагбус о Яхвэ дикхляс мо касывэти. Акана мо ром, гэлбэтэм, кан дэхэл ман», тай тхэдяс лэс Рувим.

³³ Ой генэ насвалили пуёстэ, тай кана аракхлило латэ чяво, пхэнляс: «Аякха кай о Сагбус о Яхвэ шунляс, кай ман на дэхэл, Ов диняс ман генэ ли адалэс». Тай ой тхэдяс лэс Симеон.

³⁴ Ой генэ насвалили пуёстэ, тай кана латэ аракхлило чяво, пхэнляс: «Акана мо ром кан колизэл мандэ, вай мандэ аракхлилэ лэски трин чявэ». Оничин ов сас тхэдо Левий.

³⁵ Тай генэ ой насвалили пуёстэ, тай кана аракхлило чяво, пхэнляс: «Адава рази мэ кан махтадияв э Сагбус э Яхвэс». Оничин ой тхэдяс лэс Иуда. Дэчи латэ на аракхлёнас пуя.