Кердипэ 20 - Библия опэр крымски романи чиб

О Авраам тай э Сарра ко Авимелех

¹ Отхар о Авраам гело андэ Негев тай ачило тэ бэшэл машкарэ ко Кадэш тай Шур. Ов саво-то вахыти бэшэлас андэ Герар.

² Отхэ ов алаенги пхэнэлас, кай э Сарра — лэски пхэн. Оничин о Авимелех, о патишаи э Герареско, бичялдяс пал Сарра тай лиляс ла пэстэ андэ кхер.

³ Ай о Дэл ало ко Авимелех рати андэ суно тай пхэнляс лэски: — Ту кан мэрэс андар джювли, савя ту лилян тутэ андэ кхер. Ой ромэстэ.

⁴ Ай о Авимелех на колисаило латэ, оничин ов пхэнляс: — Сагбуса, та со, Ту кан мударэс надошалэ дюняс?

⁵ Адава мануш ов сам пхэнляс, кай ой лэски пхэн, тай ой аякхажэ пхэнляс. Андэ адалэ дилатэ мэ на кердём бэзя нэ андэ мэ илэстэ, нэ вастэнца.

⁶ О Дэл пхэнляс лэски андэ суно: — Ва, Мэ джянав, кай адава ту кердян шужэ илэса. Адава Мэ астардём тут катар бэзя ангал Мандэ, оничин на муклём тут тэ колизэс латэ.

⁷ Акана дэ палэ э ромня ко ром, вай ов — прароки. Ов кан алгыштиел тут, тай ту кан ачёс дживиндо. Ай ту тэ на дэса ла, джян, кай ту тай тэ тухумя кан мэрэн.

⁸ Авэр дес эртэс сабахтан о Авимелех кидиняс алаи пэ иргатен тай пхукавдяс лэнги, со уло, тай он лачес трашанилэ.

⁹ Дэчи о Авимелех диняс икос э Авраамес тай пхэнляс: — Со ту амэнца кердян? Со джюнгалипэ мэ туки кердём, кай ту тхэдян тэ керас бэзя ман тай алаи мо патишайлыки? Ту кердян манца аякха, сар на камэл тэ керэс.

¹⁰ Тай о Авимелех пхучляс э Авраамес: — Со ту тюшундиесас, кана ту кердян асавко?

¹¹ О Авраам пхэнляс: — Мэ тюшундым, со адалэ тханэстэ о мануша чячес на трашан катар Дэл, тай он кан мударэн ман андар мэ ромнятэ.

¹² Тай генэ ой чячес ми пхэн — огеи мэ дадэстар. Тай ой ули ми ромни.

¹³ Кана о Дэл бичялдяс ман андар кхер мэ дадэско аврэ пхуендэ, мэ пхэнлём лаки: «Сикав манги то дэхыпэ, пхэн, кай мэ то пхрал, кай би амэ тэ на авас».

¹⁴ Дэчи о Авимелех диняс ко Авраам э Сарра тай генэ андяс лэски бузнен, бакрэн, гурувнен, иргатен тай иргатинкен.

¹⁵ О Авимелех пхэнляс: — Ми пху ангал тутэ: бэш, кай мангес.

¹⁶ Э Сарраки ов пхэнляс: — Мэ динём тэ пхралэс бини руп, тэ пхандэл якха алаенги, кон эси туса. Ту анкха ангал алаендэ шужы.

¹⁷ О Авраам мангелас э Дэвлэс, тай о Дэл аиндырды э Авимелехес, лэски ромня тай э иргатинкен, тэ овэн лэндэ пуя.

¹⁸ Ай ангал отхэ андэ кхер ко Авимелех о Сагбус о Яхвэ на дэлас билиекхе джювля пуен андар Сарра, ки ромни ки Авраамески.