Кердипэ 18 - Библия опэр крымски романи чиб

Трин мурша авэн ко Авраам

¹ Десе, кана тхарэлас о кхам, паш ко тэрэкя тэрэбинтя Мамрэ, кана о Авраам сас бэшло ангал пэ катунатэ, лэски сикавдяспэс о Сагбус о Яхвэ.

² О Авраам ваздиняс пэ якха тай дикхляс ангал пэс тринэ муршэн. Ов дикхляс лэн, прастанило катар удар ки катунако мамуй лэндэ тай бангило джи ки пху.

³ Ов пхэнляс: — Сагбус! Ов мандэ миласа, ма накх пашал мандэ Тэ иргатестэ.

⁴ Мэ анэн залак пани, тай мэ халярэн тумарэ пинрэ, тай рагантиен тал адалэ тэрэкестэ.

⁵ Тэ алянус тумэ тумарэ иргатестэ, мэ кан анав тумэнги тэ хан, тумэ кан хан тай кан джян англэ тумаро дром . — Бут лачё, — пхэнлэ он. — Кер, сар пхэнэс.

⁶ О Авраам сигярдяс ки Сарра андэ катуна тай пхэнляс: — Дэба, никал трин тапцыес лачё варо, кер хумэр тай пэк питэс.

⁷ Дэчи ов прастанило ки атара, лиляс э лаче тэрнорэ гуруворэс тай диняс ко иргати, саво чяльти пэкляс лэс.

⁸ Дэчи ов андяс тхуд тай сути, тхэдяс ангал лэндэ э гуруворэс тэ хан. Бискай он ханас, ов сас тэрдо паш лэндэ тал тэрэки.

⁹ — Кай ти ромни э Сарра? — пхучлэ он. — Окотэ, андэ катуна, — пхэнляс ов.

¹⁰ Дэчи о Сагбус о Яхвэ пхэнляс: — Мэ чячес кан авав тутэ авэр брэш, паш адава жэ вахыти, тай ки Сарра, тэ ромнятэ, кан овэл чяво. Э Сарра шунэлас, тэрди пал лэски думэстэ, андэ катуна.

¹¹ О Авраам тай э Сарра сас пхурэ тай барэ брэшэнги, тай одова, со овэл ки джювли, ки Сарра тэрдило.

¹² Оничин э Сарра асанили андар пэстэ, тюшунды: «Мэ вай пхурилём, тай мо сагбус пхуро. Мандэ тэ овэл асавки лош?»

¹³ Дэчи о Сагбус о Яхвэ пхэнляс э Авраамески: — Соски э Сарра асал тай пхэнэл: «Та со, мандэ пхурятэ чячес кан овэл пуёс?»

¹⁴ Си шо-то, со нащи керэл о Сагбус о Яхвэ? Мэ кан авав тутэ авэр брэш андэ вахыти, саво камэл, тай ки Сарра кан овэл чяво.

¹⁵ Э Сарра трашанили тай лиляс тэ лэл пэ зборэс палэ: — Мэ на асанилём. Ай Ов пхэнляс: — На, ту асанилян.

О Авраам мангел э Дэвлэс катар Садом

¹⁶ О мурша ущинэ тай лилэ тэ джян карин Садом. О Авраам гелдяс лэн.

¹⁷ О Сагбус о Яхвэ пхэнляс: — Мэ на кан гаравав катар Авраам, со мангав тэ керав.

¹⁸ Катар Авраам кан овэл баро тай зорало дюняс, тай булуб лэски кан диндён бахт алаи о дюнядэс опэр пху.

¹⁹ Вай Мэ тхэдём лэс, ов тэ пхэнэл пэ пуенги, савэ кан аракхлён, тэ пхерэн о дром э Сагбуски э Яхвэско, тэ керэн о чячипэ тай о цындос. Дэчи Мэ, о Сагбус о Яхвэ, кан керав одова, со пхэнлём э Авраамески.

²⁰ О Сагбус о Яхвэ пхэнляс: — Э бэбэря мамуй ко Садом тай ко Гамора асавки бари, отхэ о мануша керэн пхарэ бэзя.

²¹ Кай тэ фуляв тэ дикхав, алаи си отхэ дошалэ я на. Тэ на, Мэ кан галяв.

²² О мурша болдинэпэс тай гелэ ко Садом, ай о Авраам ачило ангал Сагбус ко Яхвэ.

²³ О Авраам пашыло карин Лэстэ тай пхэнляс: — Ту со, кан мударэс э надошалэс э дошалэса?

²⁴ Со, тэ си андэ диз пэинда надошалэ? Ту со, кан хурдярэс тай на кан ачявэс адая диз булуб пэинда надошалэнги?

²⁵ Нащи Ту керэс асавко, тэ мударэс э надошалэн э дошалэса, нащи керэс э надошалэски тай э дошалэски екх. Нащи Ту керэс аякха! Та со, о Цындомари алаи э пхуяко кан керэл начячипэ?

²⁶ О Сагбус о Яхвэ пхэнляс: — Мэ тэ аракхава андэ Садом пэинда надошалэн, кан аядияв булуб лэнги алаи адая диз.

²⁷ Дэчи о Авраам пхэнляс генэ: — Аки, динём ман зор тэ зборизав э Сагбуса, хоч мэ прахос тай катрани.

²⁸ Со, тэ си надошалэ пандженги залак, ниш пэинда? Кан хурдярэс Ту алаи э диз, кай на рэсэн пандж мануша? — Мэ тэ аракхава отхэ саранду пандж, — пхэнляс Ов, — на кан хурдярав ла.

²⁹ О Авраам пхэнляс Лэски генэ екхвар: — Со, отхэ тэ аракхлёна саранда? Ов пхэнляс: — Булуб саранданги Мэ на кан керав адава.

³⁰ Дэчи одова пхэнляс: — Ма холязэ, Сагбуса, кан мукес ман тэ пхэнав. Со, тэ аракхлёна отхэ екх триянда? Ов пхэнляс: — Мэ на кан керав адава, тэ аракхава отхэ триянда.

³¹ О Авраам пхэнляс: — Аки, мандэ сас асавки зор, кай пхэнлём э Сагбуски. Кай, тэ аракхлёна отхэ екх биш? Ов пхэнляс: — Булуб бишэнги Мэ на кан хурдярав ла.

³² Дэчи о Авраам пхэнляс: — Ма холязэ, Сагбуса, ами мук ман тэ пхэнав генэ екхвар. Со, тэ аракхлёна отхэ екх дэш? Ов пхэнляс: — Булуб дэшэнги Мэ на кан хурдярав ла.

³³ Кана о Сагбус о Яхвэ бытэрды тэ зборизэл э Авраамеса, Ов гело, ай о Авраам ало кхерэ.