Кердипэ 16 - Библия опэр крымски романи чиб

Э Агарь тай о Измаил

¹ Ки Сара, ки ромни ки Аврамески, на аракхлёнас пуя лэски. Латэ сас иргатинка андар Египти, ой бучёлас Агарь.

² Э Сара пхэнляс э Аврамески: — О Сагбус о Яхвэ на диняс ман пуен. Джя, пашлё мэ иргатинкаса. Файма, латар мандэ кан овэн пуя? О Аврам кердяс, сар пхэнляс э Сара.

³ Э Сара, лэски ромни, лиляс пэ иргатинка, э египтянка э Агаря, тай диняс сар ромня пэ ромэстэ. Адава кана уло, о Аврам бэшэлас андэ Ханаан дэш брэш.

⁴ Ов пашлило э Агаряса, тай ой насвалили пуёстэ. Кана э Агарь галили, кай насвали пуёстэ, ой лиляс тэ на гинэл пэ сагбуиса.

⁵ Дэчи э Сара пхэнляс э Аврамески: — Ой кай керэл манги хурлуки, ту сан дошало. Мэ динём э иргатинка тутэ опэр тхан, ай акана ой джянэл, кай насвали пуёстэ, тай на гинэл ман. Мэ керэл о Сагбус о Яхвэ амэнги цындос.

⁶ — Вай ой ти иргатинка. Кер ласа, со мангес, — пхэнляс о Аврам. Дэчи э Сара лиляс аякха тэ тасавэл э Агаря, кай одоя нашли латар.

⁷ О Миляики э Сагбуско э Яхвэско аракхляс э Агаря андэ ливади, надур катар ханинг. Адая ханинг сас паш ко дром ко Шур.

⁸ Ов пхучляс: — Агарь, иргатинка э Сараки, катар ту алян тай кай джяс? — Мэ нашав мэ сагбуисатар катар Сара, — пхэнляс ой.

⁹ Дэчи о Миляики э Сагбуско э Яхвэско пхэнляс лаки: — Джя палэ тэ сагбуисатэ тай шун ла.

¹⁰ Генэ о Миляики э Сагбуско э Яхвэско пхэнляс лаки: — Мэ аякха бут кан керав тэ пуен, кай лэн нащи кан гинэс.

¹¹ Генэ о Миляики э Сагбуско э Яхвэско пхэнляс лаки: — Ту акана насвали пуёстэ, тай кан аракхлёл тутэ чяво. Тхэ лэс Измаил, оничин о Сагбус о Яхвэ шунляс тэ хурлукестар.

¹² Ов кан овэл, сар вэшэско джёро; лэски васта кан овэн мамуй алаендэ, тай о васта алаенги кан овэн мамуй лэстэ, ов кан бэшэл андэ душманлыки алаи пэ пхралэнца.

¹³ Э Сагбуски э Яхвэски, Саво зборизэлас ласа, Агарь диняс нав Эль-Рои, вай ой пхэнляс: — Анкха мэ дикхлём Одолэс, Кон дикхел ман.

¹⁴ Аки соски одоя ханинг бучёлас Бээр-Лахай-Рои. Ой ли анкха отхэ, машкарэ ко Кадэш тай ко Беред.

¹⁵ Ки Агарь аракхлило чяво э Аврамески, тай ов тхэдяс пэ чявэс Измаил.

¹⁶ Э Аврамески сас охтодэша шов брэш, кана лэско чяво о Измаил аракхлило ки Агарь.