Кердипэ 15 - Библия опэр крымски романи чиб

Э Дэвлэско завети э Аврамеса

¹ Пал атхэ о Сагбус о Яхвэ сикавдяспэс э Аврамески тай пхэнляс: — Ма траша, Аврам. Мэ — то кутардима. То башладима кан овэл бут баро.

² Ай о Аврам пхэнляс: — Вай, Сагбус Яхвэ, со Ту кан дэс ман? Вай мэ ачяв би пуенго, тай мо мангин кан диндёл ко Элиезер андар Дамаск.

³ О Аврам генэ пхэнляс: — Ту на динян ман пуен, тай о иргати, кай аракхлило андэ мэ кхерэстэ, кан лэл мо мангин.

⁴ Тай сас лэски збора э Сагбуски э Яхвэски: — Ов на кан лэл. Кан лэл одова, саво кан овэл тутар.

⁵ Ов никалдяс лэс аври тай пхэнляс: — Дикх карин булутя тай гин о чергэня. Ту кан гинэс лэн? — Тай пхэнляс лэски: — Аборкха кан овэн тутэ пуя.

⁶ О Аврам пакянило э Сагбуски э Яхвэски, тай Ов гиндяс лэс чячес.

⁷ Генэ Ов пхэнляс лэски: — Мэ — о Сагбус о Яхвэ, Саво никалдяс тут андар Ур ки халдеенго, тэ дэл тут адая пху.

⁸ Ай о Аврам пхучляс: — Вай, Сагбус Яхвэ, сар мэ тэ галяв, кай ой кан овэл минри?

⁹ О Сагбус о Яхвэ пхэнляс лэски: — Ан Манги тринэ брэшэнги гурувня, тринэ брэшэнги бузня тай тринэ брэшэнги бакрэс, тай генэ ан голубка тай тэрнэ голубес.

¹⁰ О Аврам аякха ли кердяс. Ов чиндяс лэн дуй котора тай тхэдяс о котора о екх мамуй аврэстэ. Ай э чириклен ов на чиндяс дуй котора.

¹¹ О барэ канлыдэс чирикля кидэнаспэс опэр мулэ тэня, ай о Аврам кувдиелас лэн.

¹² Сар бэшло о кхам, э Аврамес лиляс зорало суно. Атхэ вэркатэ фулистини кали тэмина, тай бари траш лиляс лэс.

¹³ О Сагбус о Яхвэ пхэнляс лэски: — Тэ джянэс, кай тэ пуя кан овэн джятя андэ джяти пху; лэн кан керэн иргатен тай кан тасавэн штаршэл брэш.

¹⁴ Ай Мэ кан тасавав о дюняс, саво кердяс лэн иргатен, тай дэчи он кан никлён отхар барэ мангинэса.

¹⁵ Ту бут пхуро кан мэрэс андэ рагати тай кан овэс тэ дадэндэ.

¹⁶ Атхэ кан авэл о штарто роди тэ породако, вай дага о бэзя э амореенги на улэ джи ко чети.

¹⁷ Кана о кхам бэшло тай уло тэмина, бирдэн ули бари яг тай какаи ангарэнца, андар савятэ ваздиндёлас тхув. Он накхлэ машкарэ ко чиндэ котора.

¹⁸ Андэ одова дес о Сагбус о Яхвэ кердяс завети э Аврамеса тай пхэнляс: — Мэ дав тэ пуен адая пху, катар египтески диряв джи ки бари диряв Евфрат:

¹⁹ э пху э кенеенги, кенезеенги, кадмонеенги,

²⁰ хетеенги, периззеенги, рефаимеенги,

²¹ амореенги, ханаанеенги, гиргашэенги тай евусеенги.