Кердипэ 12 - Библия опэр крымски романи чиб

О Дэл пхэнэл э Аврамески

¹ О Сагбус о Яхвэ пхэнляс э Аврамески: — Ачяв ти пху, то дюняс тай тэ дадэско кхер тай джя ки пху, сави Мэ туки кан сикавав.

² Мэ кан керав тутар баро дюняс, кан алгыштияв тут тай кан керав намлыс то нав. Ту аврэнги кан овэс бахт!

³ Мэ кан дав лачипэ одолэн, кон мангел туки лачипэ, тай кан дав арманя одолэс, кон дэл арманя тут. Булуб туки кан диндён бахт алаи о дюнядэс опэр пху.

⁴ Тай о Аврам гело ко дром, сар пхэнляс лэски о Сагбус о Яхвэ, тай о Лот гело екхетханэ лэса. Кана ов гело андар Харан, э Аврамески сас 75 брэш.

⁵ Ов лиляс пэса пэ ромня э Сара, пэ пхралэски чявэс э Лотес, алаи о мангин, саво он кидинэ, тай э манушэн, савэ лэндэ сас андэ Харан. Он гелэ андэ Ханаан тай ало отхэ.

⁶ О Аврам накхло опэр адалэ пхуятэ джи одолэ тханэстэ андэ Шэхем, катэ сас тэрдо о тэрэки тэрэбинт, саво бучёлас Морэ. Одова вахыти отхэ бэшэнас о ханаанея.

⁷ О Сагбус о Яхвэ сикавдяспэс э Аврамески тай пхэнляс: — Мэ кан дав адая пху тэ пуен. О Аврам кердяс отхэ алтари э Сагбуски э Яхвэски, Саво сикавдяспэс лэски.

⁸ Отхар ов гело андэ горадэнго тхан ко вастоки катар Вефиль. Тай тхэдяс пи катуна аякха, кай сас о Вефиль карин запад, ай о Гай — карин вастоки. Отхэ ов кердяс алтари э Сагбуски э Яхвэски тай мангляс Лэско нав.

⁹ Дэчи о Аврам гело катар тхан тай гело дром ко юги, ко Негев.

О Аврам тай э Сара накхен андэ Египти

¹⁰ Опэр пху сас бокх, бут бари, тай о Аврам накхло ко Египти.

¹¹ Кана он пашонас ко Египти, ов пхэнляс пэ ромняки э Сараки: — Алаи кан дикхен, кай ту шукар джювли.

¹² Кана о египтяня кан дикхен тут, он кан тюшундиен: «Адая лэски ромни», — тай кан мударэн ман, ай тут кан ачявэн дживиндя.

¹³ Пхэн, кай сан ми пхэн. Дэчи булуб туки манца кан овэн лаче, тай кан ачяв дживиндо.

¹⁴ Кана о Аврам ало андэ Египти, о египтяня дикхлэ, кай э Сара бут шукар.

¹⁵ Ай кана ла дикхлэ о князя э фараонески, он махтадылар ла э фараонески, тай э Сара лилэ лэстэ андэ патишайлытико кхер.

¹⁶ Ов кердяс лачипэ э Аврамески булуб э Сараки. Ко Аврам сас бузнэ, бакрэ, гурува, джёрэ тай джёря, иргатя тай иргатинкес, тай камилэс.

¹⁷ Ай о Сагбус о Яхвэ бичялдяс джюнгалэ насвалиматэс опэр фараони тай алаи опэр лэски кхерутнэндэ, андар одолэстэ кай ов лиляс э Сара, э Аврамески ромня, андэ пэ кхерэстэ.

¹⁸ Дэчи о фараони диняс икос э Аврамес тай пхучляс: — Со кердян манца? Соски ту на пхэнлян манги, кай ой — ти ромни?

¹⁹ Соски ту пхэнлян, кай ой ти пхэн? Екх андар адалэстэ мэ манглём тэ лав ла. Аки ти ромни, лэла тай джя атхар!

²⁰ О фараони пхэнляс пэ манушэнги тэ кувдиен э Аврамес отхар екхетханэ э ромняса тай алаеса, со сас лэстэ.