Кердипэ 11 - Библия опэр крымски романи чиб

Вавилонски башня

¹ Андэ алаи ко дюняс сас екх чиб тай екх зборэс.

² О мануша джянас ко вастоки тай никлистэ опэр шужы ливади андэ Шынари тай ачилэ тэ бэшэн отхэ.

³ Он пхэнлэ екхаврэски: — Элан керас кирпичя катар глина тай тэ тхарас лэн лачес. Аякха о мануша ки барэнго тхан тхэнас кирпичя, савэ он колискерэнас смоласа.

⁴ Дэчи он пхэнлэ: — Элан тхас амэнги диз башняса джи ко булутя. Аякха амэ кан махтадияс амаро нав, тай на кан дуряс опэр алаи ки пху.

⁵ О Сагбус о Яхвэ фулистино тэ дикхел карин диз тай башня, савэ тхэнас о чявэ э манушэнги,

⁶ тай пхэнляс: — Алаи о мануша — екх дюняс, лэндэ екх чиб. Тай он токо лилэ тэ керэн алаи. Акана со тэ на манген, алаи кан керэн.

⁷ Элан фуляс тэ намискерас лэнги зборэс, тэ на галён екхаврэс.

⁸ Тай о Сагбус о Яхвэ дурярдяс лэн отхар опэр алаи ко муй ки пхуяко, тай он тэрдилэ тэ тхэн одоя диз.

⁹ Аки соски ов сас тхэдо Вавилон — вай о Сагбус о Яхвэ намискердяс отхэ о зборэс алаи э дюняски. Отхар о Сагбус о Яхвэ дурярдяс лэн опэр муй алаи ки пхуяко.

О пуя катар Сим

¹⁰ Аки о пхукаипэ катар Сим тай лэски пуендар. Э Симески сас шэл брэш, кана лэстэ аракхлило о Арпахшад. Адава уло до брэшэндар пал ко бугулдима.

¹¹ Пал ко аракхлима ки Арпахшадеско о Сим бэшло 500 брэш, тай лэстэ сас генэ чявэ тай чяя.

¹² Кана о Арпахшад бэшло 35 брэш, лэстэ аракхлило о Шэлах.

¹³ Пал ко аракхлима ки Шэлахеско о Арпахшад бэшло 403 брэш, тай лэстэ сас генэ чявэ тай чяя.

¹⁴ Кана о Шэлах бэшло 30 брэш, лэстэ аракхлило о Эвер.

¹⁵ Пал ко аракхлима ки Эвереско, о Шэлах бэшло 403 брэш, тай лэстэ сас генэ чявэ тай чяя.

¹⁶ Кана о Эвер бэшло 34 брэш, лэстэ аракхлило о Пелег.

¹⁷ Пал ко аракхлима ки Пелегеско о Эвер бэшло 430 брэш, тай лэстэ сас генэ чявэ тай чяя.

¹⁸ Кана о Пелег бэшло 30 брэш, лэстэ аракхлило о Реу.

¹⁹ Пал ко аракхлима ки Реуско о Пелег бэшло 209 брэш, тай лэстэ сас генэ чявэ тай чяя.

²⁰ Кана о Реу бэшло 32 брэш, лэстэ аракхлило о Серуг.

²¹ Пал ко аракхлима ки Серугеско о Реу бэшло 207 брэш, тай лэстэ сас генэ чявэ тай чяя.

²² Кана о Серуг бэшло 30 брэш, лэстэ аракхлило о Нахор.

²³ Пал ко аракхлима ки Нахореско о Серуг бэшло 200 брэш, тай лэстэ сас генэ чявэ тай чяя.

²⁴ Кана о Нахор бэшло 29 брэш, лэстэ аракхлило о Терах.

²⁵ Пал ко аракхлима ки Терахеско о Нахор бэшло 119 брэш, тай лэстэ сас генэ чявэ тай чяя.

²⁶ Пал отхэ сар о Терах бэшло 70 брэш, лэстэ аракхлилэ о Аврам, о Нахор тай о Аран.

О пуя Терахески

²⁷ Аки о пхукаипэ катар Терах тай лэски пуендар. Ко Терах аракхлилэ о Аврам, о Нахор тай о Аран. Ко Аран аракхлило о Лот.

²⁸ Кана лэско дад о Терах сас дага дживиндо, о Аран муло андэ диз Ур, катэ бэшэнас о халдея, андэ пху, кай ов аракхлило.

²⁹ О Аврам тай о Нахор лилэ пэски ромнян. Э ромни э Аврамески бучёлас Сара, ай э ромни э Нахорески — Милка. О Аран — о дад э Милкако тай э Искако.

³⁰ Ки Сара на сас пуя, вай латэ нащи аракхлёнас пуя.

³¹ О Терах лиляс пэ чявэс э Аврамес, пэ турунес э Лотес, э чявэс э Аранескерэс, тай пэ боря э Сара, э ромня э Аврамески, тай екхетханэ он гелэ андар Ур, катэ бэшэнас о халдея, андэ Ханаан. Тай алэ джи ко Харан, катэ ачилэ тэ бэшэн.

³² О Терах бэшэлас 205 брэш тай муло андэ Харан.