Иона 4 - Библия опэр крымски романи чиб

О Дэл сиклярэл э Ионас

¹ О Иона холясаило, бут холясаило.

² Ов лиляс тэ мангел э Сагбус э Яхвэс: — Сагбус Яхвэ, та со, мэ на адава пхэнавас, кана дага сомас кхерэ? Оничин мэ нашлём андэ Таршыш. Мэ джянавас, кай Ту о Дэл, саво керэл лачипэ тай мила, бутэдаяндимаско тай бутэдэхымаско тай Ту касывэтлыс андар бибахталипэ.

³ Ай акана, Сагбус Яхвэ, лэ мо бэшыпэ, вай манги зиядэ тэ мэрав, ниш тэ бэшав.

⁴ Ай о Сагбус о Яхвэ пхэнляс: — Лачё туки тэ холязэс?

⁵ О Иона никлисто тай бэшло карин вастоки катар диз. Отхэ ов кердяс пэски катуна катар веткес, бэшло тэлал андэ салкыни тай лиляс тэ ишандиел, со кан овэл э дизаса.

⁶ Ай о Дэл о Яхвэ кердяс аякха, кай барило кущёки, саво ваздиндило опэр Иона, о салкыни опэр лэски шэрэстэ тэ кутардиел лэс катар кхам, тай о Иона бут лошасаило адалэ кущёкески.

⁷ Ай ангал сабахтанятэ авэр дес о Дэл бичялдяс кермэс, саво халяс о кущёки, тай ов шукило.

⁸ Кана о кхам ваздиндило, о Дэл бичялдяс тхари васточни балвал, тай о кхам лиляс тэ тхарэл о шэро э Ионаско аякха, кай э зор ачявэлас лэс. Ов мангляс тэ мэрэл тай пхэнляс: — Зиядэ си манги тэ мэрав, ниш тэ бэшав.

⁹ Ай о Дэл пхэнляс э Ионаски: — Лачё туки тэ холязэс андар кущёки? — Лачё! — пхэнляс ов. — Лачё на екх тэ холязав, ами джи тэ мэрав.

¹⁰ Ай о Сагбус о Яхвэ пхэнляс: — Ту аядиес о кущёки, саво ту на барярдян. Ов андэ рат барило тай андэ рат шукило.

¹¹ Манги дэчи тэ на аядияв э бари диз э Ниневия, катэ си бут гайваня тай бут шэлэ бишэ бине манушэндар, савэ на джянэн, со си лачё, тай со си джюнгало?