Иона 2 - Библия опэр крымски романи чиб

О Иона мангел э Дэвлэс

¹ О Сагбус о Яхвэ бичялдяс барэ мачес, тай ов накхавдяс э Ионас. О Иона сас андэ маческо пэр трин дес тай трин ратя.

² Кана сас андэ маческо пэр, о Иона мангелас пэ Дэвлэс э Яхвэс.

³ Ов пхэнляс: — Андэ хурлуки мэ манглём э Сагбус э Яхвэс , тай Ов пхэнляс манги. Андар хорипэ ко дюняс ки мулэнго мэ динём бэбэря — тай Ту шунлян ми бэбэря.

⁴ Ту читян ман андэ хорипэ, андэ ило ки панеско; агорадылар ман о паня. Алаи Тэ кубукенги паня накхлэ опрал мандэ.

⁵ Мэ пхэнлём: «Кувдимэ мэ Тэ якхендар; ай мэ генэ кан дикхав о шужо храми Тинро».

⁶ О паня учярдэ ман, о хорипэ агорады ман, тай э панески чяря колисаилэ мэ шэрэстэ.

⁷ Ко днас, ко кориня ки горадэнги мэ фулистинём, о клидя э пхуяки пханлилэ пал мандэ алаи э вахытески, ай Ту, Яхвэ, Дэл минро, никалдян ман андар хорипэ дживиндэс!

⁸ Кана о бэшыпэ бытиелас андэ мандэ, мэ катар Сагбус Яхвэ тюшундым, тай гело мо мангипэ джи Тутэ, андэ шужо храми Тинро.

⁹ Одола, кон гинэл э чюче дэвлэн, ачявдэ по пакяпэ Туки.

¹⁰ Ай мэ лошанэ гиленца кан анав Туки курбанен. Кай халём совля — кан керав. О кутардипэ — катар Сагбус Яхвэ!

¹¹ О Сагбус о Яхвэ пхэнляс э мачески, тай ов читяс э Ионас опэр пху.