Delja 8 - Библия опэр крымски романи чиб

О родипэ тай о нашыпэ э пакялэнго

¹ О Савл сас екхетханэ одолэнца, савэ мудардэ э Стэфанес. Одолэ десестар уло баро кувдипэ опэр Иерусалимски кхангери, тай алаи, булуб катар апостоля, нашлэ андэ алаи ко пхуя ки Иудеяки тай ки Самарияки.

² Э Дэвлэски мануша пароскердэ э Стэфанес тай лачес ровэнас пал лэстэ.

³ Ай о Савл лачес кувдиелас э кхангери. Ов челаспэс андэ кхера ки пакялэнги, никалэлас э муршэн тай э джювлен тай челас лэн андэ пханли.

О Филипп сиклярэл андэ Самария

⁴ Озаман о нашлэ пхукавэнас о Лошано Габэри катэ, он накхенас.

⁵ О Филипп ало андэ екх диз ки Самарияки тай пхукавэлас отхэ катар Христос.

⁶ Бут дюняс лачес шунэнас одова, со ов пхэнэлас. Он шунэнас лэски зборэс тай дикхенас чюдэс, савэ ов керэлас.

⁷ Андар бут мануша никлёнас барэ бэбэряса бишужэ духя, тай о бут астардэ тай о банге аиндиенас.

⁸ Тай андэ диз одолатэ сас бари лош.

⁹ Сас отхэ екх мануш, саво бучёлас Симон, саво керэлас андэ адалэ дизатэ магия, шаштэрдиелас э манушэн э Самариякерэн. Ов пэстар пхэнэлас, кай си саво-то баро.

¹⁰ Алаи о мануша, ли о простоя, ли о намлыдэс, шунэнас лэс, пхэнэнас: — Адава мануш — бари зор э Дэвлэски.

¹¹ Он шунэнас лэс одолэски, кай ов бут вахыти шаштэрдиелас манушэн пэ магияса.

¹² Ай кана он пакянилэ э Филиппески, кай пхукавэлас катар Патишайлыки ки Дэвлэско тай катар нав ки Исусеско Христоско, о мурша тай джювля лилэ болдипэ.

¹³ Ли о Симон пакянило. Ов болдяспэс тай вэркатэ пхерэлас пал Филипп, дикхелас сикаиматэс тай барэ чюдэс тай шаштиелас.

¹⁴ Кана о апостоля андэ Иерусалими шунлэ одолэстар, кай андэ Самария пакянилэ э збораки э Дэвлэскеряки, он бичялдэ лэндэ э Пётарэс тай Иоаннес.

¹⁵ Одола алэ тай мангенас э Дэвлэс, тэ дэл лэн Шужо Духос.

¹⁶ Опэр никхастэ андар лэндэ о Духос дага на ало, он екх сас болдэ андэ нав ки Сагбуско Исусеско.

¹⁷ Пал отхэ о Пётар тай о Иоанн тхэдэ опэр лэндэ пумарэ васта, тай он диндилэ о Шужо Духос.

¹⁸ О Симон дикхляс, кай о Духос си дино, кана тхэн пумарэ васта о апостоля, ов дэлас лэн ловэ

¹⁹ тай пхэнляс: — Дэн ли ман асавки зор, тай одова, опэр кастэ мэ кан тхав мэ васта, тэ диндёл о Шужо Духос.

²⁰ Ай о Пётар пхэнляс: — То руп мэ нашавдёл екхетханэ туса, ту тэ тюшундиес тэ кинэс о башладипэ э Дэвлэско ловэнги!

²¹ Ту нащи овэс андэ адалэ дилатэ, вай то ило нанай чячё ангал Дэл.

²² Ачяв адава джюнгалипэ тай манг э Сагбус, файма, Ов кан апувикерэл туки асавке тюшундиматэс.

²³ Мэ дикхав, кай ту пхэрдо керкипэ тай пханло джянджирэнца начячимаскерэнца.

²⁴ О Симон пхэнляс: — Манген андар мандэ э Сагбус, манца тэ на овэл ништо, со пхэнлянус тумэ.

²⁵ О апостоля пхукавэнас тай пхэнэнас отхэ э збора э Сагбуски. Дэчи он гелэ палэ андэ Иерусалими тай опэр дром пхукавэнас о Лошано Габэри андэ бут самарийскя гава.

О пакяпэ э евнухеско андар Эфиопия

²⁶ О миляики э Сагбуско пхэнляс э Филиппески: — Джя ко юги, опэр дром, кай гелэл андар ливади андар Иерусалими ки Газа.

²⁷ О Филипп ущино тай гело. Бирдэн опэр дром ов дикхляс э евнухес андар э Эфиопия. Ов сас намлыс мануш э Кандакияко, э патишаинкако э эфиопенги, тай дикхелас пал алаи лаки барвалимастэ. Ов алосас тэ бангёл ангал Дэл андэ Иерусалими

²⁸ тай акана джялас кхерэ. Ов бэшло андэ пэ урдонестэ тай драпкерэлас прароки Исаия.

²⁹ О Духи пхэнляс э Филиппески: — Пашо адалэ урдонестэ тай джя пашэ.

³⁰ О Филипп прастанило ко урдон тай шунляс, андэ лэстэ кай драпкерэл прароки Исаия. — Ту галёс одова, состар драпкерэс? — пхучляс о Филипп.

³¹ — Сар манги тэ галяв би галяримаско? — мангляс одова э Филиппес тэ ваздэлпэс тай тэ бэшэл лэса.

³² Ай драпкерэлас ов адава тхан андар Яздипэ: «Сар бакря, Лэс гелэнас ко чиндипэ, сар бакроро си тэрдо би зборэнго ангал одолэстэ, кай моравэл, аякха ли Ов на пхутрэла о ушта Пинрэн.

³³ Лэстар асанас тай лилэ о тхэдипэ э чяче цындоско. Кон кан пхукавэл Лэски породатар? Вай Лэско бэшыпэ линдёл катар пху».

³⁴ О евнух пхучляс ко Филипп: — Пхэн манги, кастар атхэ пхэнэл о прароки, пэстар я кастар-то аврэстар?

³⁵ Дэчи о Филипп лиляс тэ галярэл акалэ тханэстар ки Яздимаско тай пхукавдяс лэски Лошано Габэри катар Исус.

^36-37 Он дага джянас опэр дром тай одова вахыти пашылэ савэ-то панестэ. — Дикх, аки пани, — пхэнляс о евнух. — Со на дэл ман тэ лав болдипэ?

³⁸ Ов пхэнляс тэ тэрдярэн о урдон, ли о дуй он, о Филипп тай о евнух, динэ андэ пани, тай о Филипп болдяс лэс.

³⁹ Ай кана он никлистэ андар пани, о Духос э Сагбуско гелдяс э Филиппес, тай о евнух лэс генэ на дикхляс. Лошано ов гело по дром.

⁴⁰ Ай о Филипп уло андэ диз Ашдод. Ов пхерэлас тай пхукавэлас о Лошано Габэри андэ алаи ко диза, бискай на ало андэ Кесария.