Delja 12 - Библия опэр крымски романи чиб

О линдипэ тай о мукипэ э Пётарэско

¹ Андэ адава вахыти о патишаи о Ирод линдярдяс сарсавэ манушэн андар кхангери, тэ керэл лэнги джюнгалипэ.

² Ов пхэнляс тэ мударэл камаса э Яковес, э пхралэс э Иоаннескерэс.

³ Кана ов дикхляс, кай о иудея адалэски лошазэн, ов линдярдяс ли э Пётарэс. Адава уло андэ вахыти, кана сас о мисяфири э Писное Питэнго.

⁴ Э Пётарэс линдярдэ, пханлэ андэ пханли тай тхэдэ штар группэс по штар салдатя тэ дикхен пал лэстэ. О Ирод мангелас пал ки Пэсах тэ никалэл э Пётарэс ко дюняс.

⁵ О Пётар сас андэ пханли, ай э кхангери лачес мангелас андар лэстэ э Дэвлэс.

⁶ Рати ангал отхэ, кай о Ирод камэлас тэ никалэл лэс ко цындос, о Пётар суто сас машкарэ ко дуй салдатя, пханло до джянджирэнца, ай о барэ тэрдэ ангал удар тай дикхен пал пханли.

⁷ Бирдэн ало миляики э Сагбуско, тай э пханли тхабили ярэкеса. О миляики диняс бутуря э Пётарэс андэ риг тай джянгавдяс лэс. — Ущи дэба! — пхэнляс ов, тай о джянджира пэлэ катар васта ко Пётар.

⁸ О миляики пхэнляс: — Пхандэ кустик тай уряв минидэс. О Пётар кердяс адава. — Уряв тэ савутя тай джя пал мандэ, — пхэнляс о миляики.

⁹ О Пётар никлисто пал миляики андар пханли, на галёлас, кай алаи, со керэл о миляики, си чячес. Лэски сикавдёлас, кай ов дикхел дикхипэ.

¹⁰ Он накхлэ пашал ангалунэ барэ, дэчи пашал авэра тай пашылэ ки састурни бар, кай гелэл андэ диз. Э бар ой сам пхутэрдили ангал лэндэ, тай он никлистэ. Он накхлэ екх улица, тай бирдэн о миляики на уло.

¹¹ Кана о Пётар галилопэс, ов пхэнляс: — Акана мэ чячес джянав, кай о Сагбус бичялдяс Пэ миляикес тай кутарды ман катар васт ки Иродеско тай одолэ хурлукестар, саво мангелас манги о иудейски дюняс.

¹² Галило, со уло, о Пётар гело андэ кхер ки Мария, ки дай ки Иоаннески, савэски генэ пхэнэнас Марк, катэ кидиндилэ тэ манген э Дэвлэс бут дюняс.

¹³ О Пётар мардяс э бар, тай гели тэ пхутрэл э иргатинка Рода.

¹⁴ Ой пэнджярдяс э Пётарэс катар сэси тай бристэрдяс катар лош тэ пхутрэл э бар, прастанили палэ тэ пхэнэл, кай о Пётар тэрдо ки бар.

¹⁵ — Ту дэнилилян! — пхэнлэ лаки. Ай ой пхэнэлас, кай си адава чячипэ. — Адава лэско миляики, — гиндэ он.

¹⁶ О Пётар озаман генэ марэлас, тай кана он пхутэрдэ э бар тай дикхлэ лэс, улэ шаштимэна.

¹⁷ О Пётар сикавдяс лэнги вастэса тэ тэныкизэн тай пхукавдяс, сар о Сагбус никалдяс лэс андар пханли. — Пхукавэн адалэстар э Яковески тай аврэ пхралэнги, — пхэнляс ов лэнги тай гело отхар андэ аврэ тханэстэ.

¹⁸ Сабахтан машкарэ ко салдатя уло баро прастаипэ, никхон на джянэлас, со уло э Пётарэса.

¹⁹ О Ирод пхэнляс тэ родэн лэс, тай на аракхлэ. Ов зораса пхучляс ко барэ тай пхэнляс тэ мударэн лэн. Дэчи о Ирод гело андар Иудея андэ Кесария тай ачило отхэ саво-то вахыти.

О мэрипэ э Иродеско

²⁰ О Ирод сас холямэ опэр мануша андар Тир тай Сидон. Одола зборисаилэ машкарэ пэстэ, алэ лэстэ. Он динэ икос пумарэ ригатэ э Бластэс, саво дикхел пал ки патишаеско кхер. Он мангенас лачипэ тэ овэл машкарэ лэндэ, вай лэнги область лэлас о хапэ катар область ки патишаески.

²¹ Андэ пхэнло дес о Ирод урявдяс патишаитико мантия, бэшло опэр цындомаритико тхан тай пхэнляс лэнги.

²² О мануша лилэ тэ пхэнэн: — Адава о сэси э дэвлэско, ами на мануш!

²³ Тай озаман о миляики э Сагбуско мудардяс э Иродес, вай ов на махтады э Дэвлэс, тай о Ирод, хало э кермэнца, муло.

²⁴ Э збора э Дэвлэски джялас дур тай дур.

²⁵ О Варнава тай о Савл кердэ андэ Иерусалими о хэзмэти, саво тхэдо опэр лэндэ, лилэ пэса э Иоаннес, савэски генэ пхэнэнас Марк, тай гелэ палэ.