Tamtama 9 - Nupela Testamen long tokples Kandas

¹ A limo nami, a ensel ra i wup anun in tuwuru, ra a tama in nangnang ra i sa puku pirso taru tagisapat una bakut ma i sa puku taru netes una rakrakon bual. Di pitar tar a ki tano tagun in labino tung ra katu tuktukino.

² Ra i papos in labino tung ra, in nimis i tur pat taguni, elar namin nimis tagun a labino sungun ra i karangop doko. Ma in matanas ma a bakut i dumirum namin nimis tagun in labino tung ra.

³ A kum ko det wan pirso tagun in nimis ra, ma det kis una rakrakon bual, ma di pitar tar a dekdek tandet, elar nama dekdekin a kum bukalo.

⁴ Di len tandet lena gong det ban laulau a wuliso una rakrakon bual, ma a kum duwai kai. Det in ban laulau det kut ra katu ukinalong anun o God una kum masarindet.

⁵ Awu sur di pitar tar a dekdek tandet sur det in um doko det, awu, sur det in ukadik det kut a limo na kalang. Ma anundet a ukadik in elar nama ngunungut ina bukalo ra i bir a taro.

⁶ Una kum bung ra, a susut na taro det in sisio sur a minat in nanpat un det, ikut ka det in mat. Det in nemi sur det in mat, ikut a minat in walip det kut.

⁷ A kum ko ra, det tamtama elar nama kum os ra di sa waninar tar det sur a inaim. Una lorindet, a kum utna i elar nama kum kukup na king ra i tamtama elar nami ra di pami nama gol, ma a kum masarindet i elar nama masarin a kum mulusino.

⁸ A iwu na lorindet i walos elar nama iwu na lorin a wardain, ma a kum loklokon det i elar nama kum loklokon a kum laion.

⁹ Di ubek bat a kum romrobon det nama kum utna ra i tamtama elar nama du pino aen ra a tene inaim i ubek bat a romrobono nami. A wungu ina kum mebendet i elar nama wungu ina susut na karis ma a susut na os ra det kalabor lakit sur a inaim.

¹⁰ A kum kurundet i elar nama kurun a kum bukalo ma a minibirin det i elar nama minibirin a kum bukalo. Ma a dekdek i kis una kurundet sur det in ban laulau a taro nami una limo na kalang.

¹¹ A ensel tagun in labino tung ra katu tuktukino, i ra anundet a king. Di watungi o Abadon una wasiso Ibru, ma o Apolion una wasiso Grik.

¹² I sa rop a mugano ukadik. Aru ukadik mukut kura utmakai.

¹³ A wonom nami, a ensel ra, i wup anun in tuwuru, ra a longoro in nalngan ara i wanpat tagun a wat na utna, ra i tamtama elar nama wat na kom, ra i tur netes una wat na tuktuk ina kabulu na tuntun etabor. A kabulu ra, di pami nama gol, ma i tur numugu tan o God.

¹⁴ In nalngan ara i watungi tan a ensel ra lena, “Un palos ru a wat na ensel ra di sa ker ukai tar det, una labino danim Iupretis.”

¹⁵ A wat na ensel ra, di sa waninar tar det sur a du bung ri, a bung, a kalang ma a kilalo ri. Di palos ru det, sur det in um doko ara kukur tagun a tulu dino tagun a taro rop.

¹⁶ A niluluk ina taro na inaim ra det kis una kum os det elar nam aru mar na milien rop. A longoro i lenra.

¹⁷ Una nung a tamtama, a kum os ma det ra det kis netes un det, det tamtama lenri: A kum utna ra det ubek bat a kum romrobon det nami, i merek elar nama sungun, i bulu ma i lupu elar nama salfa. A lorin a kum os det elar nama lorin a kum laion. A sungun, in nimis ma a salfa detul pirso tagun a kum wandet.

¹⁸ Ara kukur tagun a tulu dino tagun a taro rop det iru una tulu laulau na ukadik ri, a sungun, in nimis ma a salfa ra detul pirso tagun a kum wandet.

¹⁹ A dekdekin a kum os i kis una kum wandet ma a kum kurundet. A kum kurundet i elar nama kum sui, ma a kum lorin a kum sui det in ukadik a taro.

²⁰ Ma a taro ra a laulau na ukadik ri ke um doko det, ka det nukpukus gusun a kum toktok ra det pami nama lamandet. Ka det mana gusun a lotu torom a kum laulau na nion ma a kum torotoro na god ra di pam a malalarindet nama gol, a silwa, a bras, a wat, o a nuduwai. A kum malalar ra ka det tamtama, ka det longoro ma ka det wanan.

²¹ Ma ka det nukpukus kai gusun a um doko a taro, a sangsagor, a kum pamuk na petutna ma a wolong.