Tamtama 7 - Nupela Testamen long tokples Kandas

Di ukinalong ara mar ma wat na noino ma wat na arip na taro

¹ Numur tan a kum utna ri, a tama pas a wat na ensel det tur una wat na matmatano wuwu una rakrakon bual. Det pam bat pas a wat na matmatano wuwu sur gong det wup a bual, a tasi, ma a kum duwai.

² A tama pas ara ensel bulung i wanpat tagun a matmatano tobar, i pam pas a ukinalong anun o God, ra i laun. I kakabo namin labino walngano torom a wat na ensel ra di sa pitar tar a dekdek tandet sur det in ban laulau a bual ma a tasi.

³ I watungi lena, “Gong mot ban laulau a bual, a tasi ma a kum duwai, tuk ra met sa ubek tar a ukinalong una kum masarin a kum tultul anun anundat a God.”

⁴ A longoro a nilulukin det ra di sa ukinalong tar det. Det ara mar ma wat na noino ma wat na arip tagun a kum kamkabo taro Israel rop.

⁵ Di sa ukinalong tar a noino ma aru arip tagun a kabotaro anun o Juda, a noino ma aru arip tagun a kabotaro anun o Ruben, a noino ma aru arip tagun a kabotaro anun o Gat,

⁶ a noino ma aru arip tagun a kabotaro anun o Aser, a noino ma aru arip tagun a kabotaro anun o Naptali, a noino ma aru arip tagun a kabotaro anun o Manase,

⁷ a noino ma aru arip tagun a kabotaro anun o Simion, a noino ma aru arip tagun a kabotaro anun o Liwai, a noino ma aru arip tagun a kabotaro anun o Isakar,

⁸ a noino ma aru arip tagun a kabotaro anun o Sebulon, a noino ma aru arip tagun a kabotaro anun o Josep, a noino ma aru arip tagun a kabotaro anun o Benjamin.

A kunur na taro det lotu torom o God

⁹ Numur tan a kum utna ri, a tamtama, ma a tama pas a labino kunur na taro, ra kataio in luk lar pas det. A taro tagun a kum gapman rop, tagun a kum kamkabo taro rop, tagun a kum tamon rop ma tagun a wur ngas na wasiso rop, det tur sa numugu tan a kiskis na king ma a Barman na Sipsip. Det emar nama kum kabang na malu, ma det pam a kum dono baibai.

¹⁰ Det kukukuk nama kum labino walngandet lena, “Anundat a God, ra i kis una kiskis na king, ma a Barman na Sipsip, der pam ukai a dekdek sur der in ulaun a taro.”

¹¹ A kum ensel rop det tur talilis pas a kiskis na king ma a kum mugumugu ma a wat na utna ra det laun. Det puku na urur nama matandet unago upiso numugu tan a kiskis na king, ma det lotu torom o God,

¹² det watungi lena, “Amen! Din watung ulabo pas anundat a God, din watung wakak toromi, ma din ru i. I utur ukai a minamar, a mananos, ma a dekdek, ken rop, ma ken rop. Amen!”

¹³ Ra ara tagun a kum mugumugu i ting iau lena, “Osi det ri det emar nama kum kabang na malu, ma det wan tagai?”

¹⁴ A balu i lena, “Labino, ui ut u tasmani.” Ra i watungi tang lena, “Det ri, a taro ra det sa laun sikot tagun a labino ngunungut ra i monong det, ma det sa gos kamkabang pas anundet a kum malu nama gapin a Barman na Sipsip.

¹⁵ I mo ra, det ser tur sa numugu tan a kiskis na king anun o God, det papam toromi una nun a rumu na etabor una kum mirum ma a waspi. Ma o naro ra i kis una kiskis na king in pulus bat det nam anun a rumu na sel sur det in kis tomo nami.

¹⁶ Ka det in murak, ma ka det in muruk melet mo. In matanas ken sa det, ma katu utna ra i mararong doko kai in tun det.

¹⁷ Uni a Barman na Sipsip ra i kis epotor una kiskis na king, i anundet a tene tamtamabat. In mugu det sur a kum matmatano danim na nilaun. Ma o God in wus ru a kum lurlur na matandet rop.”