Tamtama 21 - Nupela Testamen long tokples Kandas

A matok na langit ma a matok na rakrakon bual

¹ Numur a tama a matok na langit ma a matok na rakrakon bual, uni a mugano langit ma a mugano rakrakon bual der sa rorom, ma kalako tasi mo.

² Ma a tama a matok na Jerusalem, a tamon anun o God, i wan pirso tagisapat una langit tan o God. Di sa waninar tari elar nami ra di sa mar wakak tar a toraro na ino sur anun a musano, sur der in nolin.

³ Ma a longoro in labino walngan ara tagisapat una kiskis na king i watungi lena, “Tama i, a tamon anun o God i sa kis torom a taro, ma i ut in kis tomo nam det. Ma det anun a taro, o God in kis tomo nam det, ma i ut a God anundet.

⁴ Ma in wus ru a lurlur na matandet rop. Katu minat melet mo, kalako tupunuk, kalako tinangis ma kalako ngunungut mo, uni a kum utna tagun numugu det sa rorom.”

⁵ Ma o naro ra i kis una kiskis na king i watungi lena, “Tama i, uniri a umatok a kum utna rop!” Ma i watungi kai lena, “Un tumus ukai a kum wasiso ri, uni a kum wasiso ri det lingmulus ma i topasi sur din nurnur uni.”

⁶ Ma i watungi tang lena, “I sa rop! Iau a Alpa ma a Omega, a turturkibino ma a ururopino. Osi ra i muruk an inumi nama danim tagun a matmatano danim, a danim na nilaun, ra ken kuli.

⁷ Osi ra i winim pas a inaim, in rakon pas a kum utna rop ri, ma iau an God anunu, ma i o nutunglik.

⁸ “A kum tene nginara, ma det ra ka det nurnur, ma det ra anundet a petutna i dur, ma a kum tene um doko a taro, ma det ra det pam a kum petutna na pamuk, a kum tene sangsagor, a kum tene lotu torom a kum torotoro na god, ma a kum tene torotoro rop, anundet a nubual, in labino tung na sungun ma a salfa. Iri a manru na minat.”

A matok na Jerusalem

⁹ Ara tagun a wonom mawit na ensel, ra det pam a wonom mawit na dis ra i bukus nama wonom mawit na ururop na ukadik, i wanpat ma i watungi tang lena, “Wan urin, an ese tar ui una matok na nolin, a ino anun a Barman na Sipsip.”

¹⁰ A bukus nama Tokodos na Nion, ma a ensel ra, i los tito pas iau usapat una labino tangai ra i tur sakit usapat netes. Ma i ese tar iau un o Jerusalem, a tamon anun o God, i wan pirso tagisapat una langit tan o God.

¹¹ I talapor nama minamarin o God, a talaporino i pilpil elar nama wat ra matano i ka doko, di watungi nama jaspa, i talapor elar nama galas.

¹² In labino woro ino i tur sakit usapat netes, ma a noino ma aru matansako ino, ma a noino ma aru ensel det tur nisan a noino ma aru matansako. Ma una kum matansako ra, di sa tumus tar a kum risan a noino ma aru kabotaro Israel.

¹³ A tulu matansako detul tamtama sur a nubual ra in matanas i wanpat iai, a tul una matmatano lubur, a tul una matmatano tobar, ma a tul detul tamtama sur a nubual ra in matanas i sup iai.

¹⁴ In kibin noworo ina tamon ra, di pami nama noino ma aru wat. Ma una kum watat ra, di sa tumus tar a risan a noino ma aru aposel anun a Barman na Sipsip.

¹⁵ Ma ara ensel ra mir wasiso, i pam pas in nanai ra di pami nama gol, ra di ser mak a kum utna nami, sur in mak a tamon Jerusalem nami, ma in maki kai a kum matansako ino, ma in noworo ino.

¹⁶ A tamon ra, a wat na paporino, det elar rop kut. A walosino ma a perere ino der elar kut. Ra i mak a tamon nama nun in nanai, i elar nam a noino ma aru arip na stadia a walosino, a perere ino ma a lekeleke ino, detul elar rop kut.

¹⁷ A ensel i mak a but ina in noworo, i elar nama ara mar ma a wat na noino ma wat na kubit. I maki nama mak ra a taro det ser mak nami.

¹⁸ In noworo di pami nama jaspa, a wat ra i bulu ma i grin, ma a tamon di pami nama gol rop kut, ra i talapor doko elar nama galas.

¹⁹ Ma a kum kibin a kum papor woro ina tamon ra, di mar det nama kum ngas na watat rop ra matandet i ka doko. A mugano di pami nama jaspa, a manru nami a sapaia, a bulu na wat, a mantul nami a aget, a grin na wat, ma a manwat nami a emeral, a grin na wat,

²⁰ a manlimo nami a sadonik, a wat i kabang ma i merek, a wonom nami a konilian, a merek na wat, a wonom mawit a krisolit, a lupu na wat, a tiwal nami a beril, a grin na wat, a lisu nami a topas, a lupu na wat, a noino nami a krisopras, a grin na wat, a noino ma ara nami a jakin, a bulu na wat, ma a noino ma aru nami a ametis, a merek na wat.

²¹ A noino ma aru matansako, det ra, a noino ma aru wat tagitiro ubalan a kabokabol, ra a matandet i ka. Ara matansako ara wat. A kisapi ina tamon, di pami nama gol rop kut, i tamtama talapor elar nama galas.

²² Ka tama tu rumu na etabor una tamon ra, uni a Labino o God, i ra i dekdek sakit, ma a Barman na Sipsip, der ut ra a rumu na etabor una tamon ra.

²³ A tamon ra ke sibo sur in matanas ma a kalang sur der in utalapori, uni a minamarin o God ut i utalapori, ma a Barman na Sipsip i ut ra a lam taguni.

²⁴ A taro tagun a kum gapman rop det in nanan una talaporino, ma a kum king anun a rakrakon bual det in los ruk anundet a kum minamar usapat uni.

²⁵ Katu bung melet mo ra a kum matansako det in tagar, uni ken mirum melet mo.

²⁶ A taro tagun a kum gapman rop det in los ruk anundet a kum utna na ululeng, ma anundet a kum minamar usapat uni.

²⁷ Katu dur na utna melet mo in ruk usapat uni, ma kataio ra i ser pam a kum utna na maimai, ma kataio kai ra i ser toro. Det ra di sa tumus tar a risandet una buk na nilaun anun a Barman na Sipsip, det kut det in ruk.