Tamtama 13 - Nupela Testamen long tokples Kandas

A kuabor na wewegua i burak pat sa utasi

¹ Numur a tama pas a kuabor na wewegua i burak pat sa utasi. A noino komino ma a wonom mawit nin lorino, ma a noino kukup na king det kis netes una kum komino. Ma unin tekteken lorino di sa tumus tar a kum rising ra i watung laulau o God nami.

² A kuabor na wewegua, ra a tama i, i elar nama lepat, ikut aru kikino i elar nama ru kikin a bea, ma a wano i elar nama wan a laion. In labino sui i pitar tar a tulu utna torom a kuabor na wewegua. A tulu utna ri: a dekdekino, ma anun a kiskis na king, ma a labino dekdek sur in warkurai nami.

³ Teken lor na kuabor na wewegua i tamtama elar nami ra di sa so doko tari, ikut a inangon ra, i sa maus melet. A rakrakon bual rop det kisin ma det mur a kuabor na wewegua.

⁴ A taro det lotu torom in labino sui, uni i sa pitar tar a dekdek sur in warkurai nami, torom a kuabor na wewegua. Ma det lotu kai torom a kuabor na wewegua, ma det watungi lena, “Osi mo ra i elar nama kuabor na wewegua? Kataio. Osi mo ra i pet lar pasi sur in umi? Kataio.”

⁵ Di mulaot tar a kuabor na wewegua sur in watung a kum wasiso na uman labino ma a kum wasiso ra in watung laulau o God nami, ma in papam nam anun a warkurai a wat na noino ma aru kalang.

⁶ I papos a wano sur in watung laulau o God, ma a risano, a nubual ra i kis iai ma det ra det kis sapat una langit.

⁷ Di pitar tar a dekdek tano sur in waim nama taro anun o God, ma in winim pas det. Di pitar tar a dekdek tano sur in warkurai a taro tagun a kum kamkabo taro rop, tagun a kum tamon rop, tagun a wur ngas na wasiso rop, ma tagun a kum gapman rop.

⁸ Ma det rop ra det kis una rakrakon bual, ra a risandet ke kis una buk na nilaun, ra di sa tumus tari numugu ra o God ke ukisi utmakai a rakrakon bual, det in lotu torom a kuabor na wewegua. A buk na nilaun ra, anun a Barman na Sipsip, ra di um doko ru i.

⁹ Osi ra arin talngano kura, i wakak sur in longoro nami.

¹⁰ Ra o God i sa mulaot tar taio sur in karabus, in karabus ut. Ra i sa mulaot tar taio sur din tau doko i namin totok na inaim, din um doko i ut nami. Ra i lenra, i wakak sur a taro anun o God det in tur dekdek ma det in nurnur.

A kuabor na wewegua i burak pat una piso

¹¹ Numur a tama ara kuabor na wewegua bulung i burak pat una piso. Aru komino i elar nama kom ina barman na sipsip, ikut i wasiso elar namin labino sui.

¹² I papam nama dekdek rop tan a mugano kuabor na wewegua, sur in warut a mugano kuabor na wewegua nami. I ungongos a rakrakon bual ma det ra det kis uni, sur det in lotu torom a mugano kuabor na wewegua, i ra a inangon kura uni i sa maus melet.

¹³ A kuabor na wewegua ra i burak pat una piso, i pam a kum ukinalong. Ara ukinalong ra i pami, i kabo pirso pas a sungun tagisapat netes una langit urin, una rakrakon bual umatan a taro.

¹⁴ I toro a taro ra det kis nin una rakrakon bual, kibino una kum ukinalong ra i pami nama dekdek, ra di pitar tari tano sur in warut a mugano kuabor na wewegua nami. I inanos det sur det in pam a malalar ina mugano kuabor na wewegua sur det in urur uni. A mugano kuabor na wewegua ra numugu di so tari namin totok na inaim, ikut i laun ut.

¹⁵ Di pitar tar a dekdek tano sur in tabor a malalar ina mugano kuabor na wewegua nama wuwu na nilaun, sur in wasiso ma in itula sur din um doko det, ra ka det nem na lotu toromi.

¹⁶ A manru na kuabor na wewegua i ungongos pas a taro rop, sur din ubek a ukinalong una sot na lamandet o una masarindet. I ungongos pas a kum lamlabino ma det ra ka di ulabo pas det, a kum tene ululeng ma a kum sibo na taro, a kum tene ititula, ma det ra awu sur a kum tene ititula.

¹⁷ Osi ra katu ukinalong kura uni, ken kukul lar pas ma ken siuru kai. A ukinalong ra, a risan a kuabor na wewegua ma a namba ina risano.

¹⁸ Osi ra i mananos in talapor wakak sur a utna ri. Osi ra i mananos, in pam pat pas a kukurai ina namba anun a kuabor na wewegua, uni a namba i tur ukinalong ara musano. Anun a namba a wonom na mar ma wonom na noino ma a wonom (666).