Tamtama 12 - Nupela Testamen long tokples Kandas

A ino ma in labino sui

¹ A labino ukinalong i wanpat sapat una langit. Ara ino i emar pas namin matanas, ma a kalang kura i kis utuntudu ina aru kikino, ma a kukup na king, ra di pami nama noino ma arin nangnang, i kis netes unin lorino.

² A ino ri i tianan, ma i kukukuk nama labino ngunungut, uni milau mo in usus.

³ Sapat una langit, ara ukinalong bulung i wanpat. In labino sui, a pinino i merek, a wonom mawit nin lorino, a noino komino, ma a wonom mawit na kukup na king kura una wonom mawit nin lorino.

⁴ In kurunu i surupu pirso ru ara kukur tagun a tulu dino tagun a kum nangnang tagisapat una bakut, ma i woro pirso ru det urin upiso. Ma in labino sui i tur taru sa numugu tan a ino ra i leser na usus, sur in konom pas o nutunulik una du bung ut ra in usus ru i.

⁵ I usus pas a nat musano, i ra in warkurai dekdek sur a taro tagun a kum gapman rop namin nubuku na aen. Ma di los tito lakit pasi usapat torom o God, ma i wan sur anun a kiskis na king.

⁶ Ma a ino i kalabor song usa una nubual kalako taro uni, una nubual ra o God i sa waninar tari, sur din tamtamabati tiro iai elar nam ara arip ma aru mar ma wonom na noino bung.

⁷ A labino inaim i wanpat sapat una langit. O Maikel ma nun a kum ensel det waim namin labino sui, ra in labino sui ma a kum ensel anunu, det ebalu nama inaim.

⁸ Det winim pas in labino sui, ma katu nubual melet mo anun in labino sui ma a kum ensel anunu sapat una langit.

⁹ Di woro pirso ru in labino sui, in nusui tagun narap, ra di watungi a tene etakun, o Satan, i ra i ben raro a rakrakon bual rop. Di woro pirso ru i tomo nam anun a kum ensel urin upiso.

¹⁰ Ra a longoro in labino walngan ara sapat una langit i watungi lena, “Uniri anundat a God i sa ulaun pas a taro, i sa ese a dekdekino, ma anun a matanitu i sa wanpat, ma a warkurai anun o Karisito i sa wanpat. O Karisito anun o God. Uni di sa woro pirso ru a tene etakun ra i ser takun a kum tistisin dat, i ra i ser takun det umatan o God una kum mirum ma a waspi.

¹¹ A kum tistisin dat det sa winim pasi nama gapin a Barman na Sipsip, ma nama nundet a wasiso puaso. Ma ka det maris bat anundet a nilaun gusun a minat.

¹² I mo ra a langit ma mot ra mot kis uni, mot in gas. Ikut in laulau torom a rakrakon bual ma a tasi kai, uni a tene etakun i sa wan pirso torom mur! Anun a kankan i karangop doko, uni i tasmani lena ke suano i mo anun a du bung.”

¹³ Ra in labino sui i tama i lena di sa woro pirso ru i urin una rakrakon bual, i lu a ino ra i sa usus pas a nat musano.

¹⁴ Di pitar tar aru meben a labino manigulai tan a ino ra, sur in ro nami utiro una nubual ra o God i sa waninar tari una nubual kalako taro uni, sur din tamtamabati tiro iai gusun in nusui, elar nama tulu kilalo ma a kukur.

¹⁵ In nusui i muru ru a danim gusun a wano elar nama labino danim, sur in siliro ru a ino ra.

¹⁶ Ikut a piso i warut a ino ra, i pangango ra i konom pas a danim ra in labino sui i muru ru i.

¹⁷ In labino sui i kankan doko torom a ino ra, ma i wan sur in waim nama ramano kum nutnutun a ino kai ra. Det ra det ser mur a kum Warkurai anun o God, ma det nurnur una wasiso puaso un o Iesu.

¹⁸ Ra in labino sui i tur taru mukut nago usalin.