A Pas anun o Pol torom a taro Rom 9 - Nupela Testamen long tokples Kandas

O Pol i tupunuk una nun a taro

¹ A watung a lingmulusino ri umatan o Karisito, ka toro. Ma a Tokodos na Nion i upuaso i una nuknuking lena, a wasiso ri i lingmulus ut.

² A nuknuking i maut doko, ma ka mana nama tupunuk.

³ Ra gunuk an pet lar pasi, a nemi sur an tur keles a kum tistising, anung a taro Juda, ma din ubek tari mukut anundet a warkurai na minabalu un iau, ma din rakon ru iau gusun o Karisito, sur din ulaun pas det.

⁴ Det a taro Israel, ra o God i ras pas det sur det a kum nutnutunu. I ese anun a minamar tandet, i pam a kum kunubus tomo nam det, i pitar tar a kum Warkurai tandet, i ese tar det una kisapi na lotu mulus, ma i uliliman tar det.

⁵ Det a kabotaro anun o Abaram, o Aisak ma o Jekop. Ra o Karisito i wanpat a musano mulus, i wanpat tagun det, i a Karisito ra i warkurai sur a kum utna rop, ma i ut ra o God. Dat in watung ulabo pasi, ma ken rop. Amen.

A pinapam anun o God torom a taro Israel

⁶ Ra a watungi lenra, awu sur a watungi lena o God ke pam sot pas anun a liliman torom a taro Israel, awu. Uni awu sur a taro Israel rop, det a taro Israel mulus umatan o God.

⁷ Ma awu kai sur det rop ra det wanpat tagun o Abaram, det a kum nutnutun o Abaram mulus. Awu. O God i watungi tan o Abaram lenri, “A kum tumtubum det in nanpat tagun o Aisak.” Stat 21:12

⁸ Awu sur det rop ra det wanpat tagun o Abaram, ra din watung det lena a kum nutnutun o God. Awu. Det kut ra di usus det una liliman anun o God, det ra, o God i watung det lena, a kum nutnutun o Abaram mulus.

⁹ Uni a liliman anun o God i lenri, “Ra a bung in sot, an milet melet, ma o Sara i sa usus pas a nat musano.” Stat 18:10, 14

¹⁰ Awu sur i kut ra, o Rebeka kai i usus pas a ru nutnutunu, ma ara tamander kut, o Aisak, a tubundat.

^11-12 Ra ka di usus der utmakai, o God i watungi torom o Rebeka lena, “A mugano in papam torom a murmur.” Stat 25:23 I watung a wasiso ri, ra aru nat ka der pami utmakai tu wakakino o tu sakino. O God i pami lenra, sur anun a pipilok in elar ut nam anun a nemnem. O God, i ra i ser kabo pas a taro, i pilok pas det ra i nem det, awu sur un tu pinapam ra det sa pam tari.

¹³ Elar nami ra di sa tumus tari una Buk Tabu lena, “O Jekop a nemi, ikut o Iso a ngeti.” Mal 1:2-3

¹⁴ I mo ra, asau mo dat in watungi? Pepetlai, o God ke pam a tokodos na petutna? Awu!

¹⁵ Uni o God i watungi torom o Moses lena, “An maris osi ra a nemi sur an marisi, ma an pam a wakakino torom osi ra a nemi sur an pam a wakakino toromi.” Kis 33:19

¹⁶ I mo ra a pipilok anun o God, awu sur i kibino una nemnem anun taio, o un tu pinapam ra taio i pami. Anun a pipilok i kibino ut una nun a marmaris.

¹⁷ Elar nama wasiso una Buk Tabu, ra o God i watungi torom o Pero tong o Ijip lena, “A ubek tar ui sur un king, sur an ese a dekdeking una sau ra an pami un ui, sur a risang in nan sarara una rakrakon bual rop.” Kis 9:16

¹⁸ I mo ra o God i maris osi ra i nemi sur in marisi, ma i udekdek in balan osi ra i nemi sur in udekdek in balano.

¹⁹ Kutiro taio in ting iau lena, “Ra o God i pami lenra, sur asau ra i takun dat? Katutaio in turbat lar pas o God sur in pam sot pas anun a nemnem.”

²⁰ Osi ui ra u nuki lena un balu a wasiso anun o God? Ui a musano kut ui. Ra taio i pam tu utna, pepetlai, a utna ra i pami, i elar sur in watungi torom o naro ra i pami lenri, “Sur asau ra u pam iau lenri?”

²¹ Ra a tene pam kuro i nemi sur in pam lako ru kuro gusun ara du piopap kut, i ut i warkurai suri. In pam ara wakak na kuro sur a kum lamlabino balon, ma ara kai sur a kum bung oros kut.

²² Lenutkai ra o God i pami una taro. O God i ling sur in ese anun a kankan ma a dekdekino. Ikut i kis langlang utmakai, ma ke pitar lakit a minabalu torom a taro ra det kis utuntudu ina nun a kankan, det ra det sa waninar sur a iniru.

²³ I pami lenra sur in ese anun a labino minamar torom det ra det kis utuntudu ina nun a marmaris. Det ra i waninar tar det numugu utmakai sur det in kis tomo nami una nun a minamar. Ma uniri det kis langlang suri.

²⁴ Osi det? Dat ut, ra i sa kabo pas dat. Awu sur a taro Juda kut, a taro gisen kai.

²⁵ I elar nama wasiso anun o God una taro ra awu sur a taro Israel, ra a poropet Hosea i sa tumus tari lena, “A taro ra awu sur anung, an watung det anung a taro, ma det ra ka maris det, an maris det.” Os 2:23

²⁶ Ma o Hosea i watungi kai lena, “Una tamon ra numugu o God i watung tari tandet lena, ‘Mot awu sur anung a taro,’ din watung det ‘a kum nutnutun o God, ra i laun.’” Os 1:10

²⁷ Ikut o Aisaia i wasiso dekdek una taro Israel lenri, “A taro Israel det susut elar nama woio nago utasi, ikut o God in ulaun pas a pak na taro kut.

²⁸ A Labino in pam sot lakit pas anun a warkurai una rakrakon bual, ma in pam sot rop pasi.” Ais 10:22-23

²⁹ I elar nama wasiso ra o Aisaia i watung tari numugu lenri, “A Labino i dekdek sakit. Gunuk ra ken madek tar lako taro tagun anundat a kabotaro, dat sa iru rop elar nama taro tagitiro o Sodom ma o Gomora.” Ais 1:9

A taro Israel ka det nurnur

³⁰ I mo ra asau mo dat in watungi una kum utna ri? Det ra awu sur a taro Israel awu sur det dekdek sur det in tokodos umatan o God. Ikut o God i watung det lena det tokodos umatano, kibino una nundet a nurnur.

³¹ A taro Israel det dekdek sur det in mur a kum Warkurai, sur det in utokodos pas det, ikut ka det pet lari.

³² Asau a kibino? Uni ka det nurnur, det nuki kut lena det sa tokodos umatan o God, kibino una nundet a kum pinapam. Det tutuka una wat na tutuka, ma det puku.

³³ Elar nami ra di sa tumus tari una Buk Tabu lenri, “Tama i, a ubek tar a wat sapat o Saion, ra a taro det in tutuka uni, ma det in puku. Ma osi ra in nurnur uni, ken maimai.” Ais 8:14; 28:16