A Pas anun o Pol torom a taro Rom 14 - Nupela Testamen long tokples Kandas

Gong dat etakun una kum utna ra ke labo umatan o God

¹ Mot in gas pas taio ra ke dekdek anun a nurnur, ma gong mot tama pisopiso i. Gong mot engaras una kum utna ra ke talapor toromi.

² Ara taro det nurnur lena, i wakak kut ra det in nan a kum utna rop. Ma ara taro ra ke dekdek anundet a nurnur, ka det wan a komonong ina kum wewegua. Det wani kut a utna ra di maruti.

³ Osi ra i nurnur lena i wakak kut ra in nan a kum utna rop, gong i tama pisopiso o naro ra ke wan a kum utna rop. Ma osi ra ke wan a kum utna rop, gong i warkurai o naro ra i wan a kum utna rop lena i pam a sakino petutna, uni o God ut i sa gas pasi.

⁴ Osi ui ra un warkurai a tultul anun taio gisen? Anun a Labino ut in tama i, ra in tur dekdek o in puku. Ikut in tur dekdek ut, uni a Labino in pet lar pasi sur in udekdeki.

⁵ Lenkutkai ra, ara taro det nuki lena, ara bung kut i labo taun a kum bung. Ma ara taro kai det nuki lena, a kum bung rop det elar rop kut. I wakak sur dat rop arara taktakai dat in tasman wakak asau ra i tokodos, elar nama nuknukin dat.

⁶ O naro ra i nuki lena, ara bung i labo, a nuknukino i lenra, sur in ulabo pas a Labino. Ma o naro ra i ser wan a kum utna rop, i pami sur in ulabo pas a Labino, uni i ser watung wakak torom o God. Ma o naro kai, ra i ser wani kut a kum utna ra di maruti, i pami kai, sur in ulabo pas a Labino, ra i ser watung wakak torom o God.

⁷ Ra dat laun awu sur anundat ut a nilaun, ma ra dat mat, awu sur a utna anundat.

⁸ Ra dat laun, dat laun sur a Labino. Ma ra dat mat, dat mat sur a Labino. I lenra, ra dat laun, ma ra dat mat, dat anun a Labino ut.

⁹ I mo ra o Karisito i mat ma i laun melet, sur i a Labino anundet ra det sa mat, ma anundet kai ra det laun.

¹⁰ Ma ui, u lai ra u takun o tisim? U lai ra u tama pisopiso o tisim? Uni dat rop dat in tur numugu tan a kiskis na warkurai anun o God.

¹¹ Elar nami ra di sa tumus tari una Buk Tabu lena, “A Labino i watungi lena, ‘Ra i lingmulus a laun, a wasiso kai ri i lingmulus: A taro rop det in kis butkeke sa numugu tang, ma a taro rop det in watung puaso i lena iau o God.’” Ais 45:23

¹² Lenra, numur dat rop taktakai dat in wasiso puaso torom o God una kum utna rop ra dat sa pam tari.

Gong dat pam tu utna ra in ban laulau a nurnur anun taio

¹³ I mo ra gong mo dat takun etalai dat. Mot in nuknuk wakak sur gong mo mot pam tar tu petutna ra tu tisimot in puku uni.

¹⁴ Uni iau tagun a Labino o Iesu, a tasman mulusi lena, katu utna na inangon in ban ling tar dat sur dat in laulau umatan o God. Ikut, ra taio i nuki lena in laulau umatan o God ra in nan tu ngas na utna, i ut i tasmani lena ke tokodos toromi sur in nani.

¹⁵ Ra un nan tu utna ra i ban purpuruon a nuknukin o tisim, ko upuaso a petutna na marmaris ra. Gong u madek tar tu utna na inangon in ban laulau a nurnur anun tu tisim ra o Karisito i mat suri.

¹⁶ Ra u nuki lena ara utna i wakak, gong u pam tu petutna ra in ban ling tar taio sur in watung laulau a utna ra.

¹⁷ Uni a matanitu anun o God awu sur tagun a utna na inangon ma a ininum. A matanitu anun o God tagun a tokodos na petutna, a malmal ma a gasgas tan a Tokodos na Nion.

¹⁸ Ma osi ra in mur a kum petutna ri una nun a pinapam torom o Karisito, o God in gas nami, ma a taro kai det in tama lele i lena anun a petutna i tokodos.

¹⁹ I mo ra dat in dekdek sur dat in pam a petutna na malmal, ma sur dat in udekdek a nurnur anundat etetalai.

²⁰ Ma gong mot ban laulau a pinapam anun o God, kibino una utna na inangon kut. A kum utna na inangon rop i wakak kut umatan o God, ikut ra taio in nan tu utna ra in ban ling tar taio sur in puku una nun a nurnur, a utna ra i pami ke tokodos.

²¹ I wakak sur gong u wan tar a komonong ina kum wewegua, ma gong u inum a wain, ma tu ngas na utna kai lenra, sako a pinapam ra in ban ling tar o tisim sur in puku.

²² A kum utna rop ra u nuki lena i wakak torom ui, anumur ut nam o God. Osi ra i pam tu utna ma a nuknukino ken takuni uni, i dan.

²³ Ikut osi ra i wangon, ma i wur nuknuk una utna ra i wani, din warkurai i ut uni, uni awu sur i mur anun a nurnur. Ma a kum utna rop ra taio i pami ma anun a nurnur ke mulaot uni, i ra a sakino petutna.