Pilipai 1 - Nupela Testamen long tokples Kandas

¹ Iau o Pol, mir nam o Timoti, aru tultul anun o Karisito Iesu, mir tumtumus torom mot, a taro rop anun o God, tiro una tamon Pilipai. Torom mot ra mot laun un o Karisito Iesu, ma mot kai a kum mugumugu na lotu ma a kum tene warut.

² A marmaris ma a malmal tan o God a Tamandat ma a Labino o Iesu Karisito in kis tomo nam mot.

A niaring anun o Pol sur a taro Pilipai

³ A watung wakak torom anung a God una kum du bung rop ra a nuk pas mot.

⁴ Ma una nung a kum niaring rop sur mot rop, a ser wararing nama gasgas,

⁵ uni mot tur tomo nam iau una Wakak na Wasiso, turpasi ut una mugano bung ra mot longoro i tuk uniri.

⁶ A tasman mulusi lena, o God ra i turpas a wakak na pinapam un mot, in pam nanani, tuk ra in uropi, una bung ra o Karisito Iesu in nan pirso melet.

⁷ I tokodos sur an nuknuk lenri un mot rop, uni mot kis mulus una nuknuking. Dat rop dat tur tomo una pinapam ra o God i pitar tari tang una nun a marmaris. Dat tur tomo ra a kis una karabus, ra a wasiso balu det ra det watung laulau a Wakak na Wasiso, ra a upuaso i torom a taro.

⁸ O God i tasmani lena, a nem doko i sur an tama mot rop, uni a nem doko mot nama marmaris anun o Karisito Iesu.

⁹ A wararing sur anumot a marmaris in labo ma in labo bing, ma a mananos ma a tastasman in lubung una numot a nilaun.

¹⁰ Ra in lenra, mot in pet lari sur mot in tasman lele asau ra i wakak o ke wakak, sur a magiramot in tokodos umatan o God, ma katu etakun in los mot una bung ra o Karisito in nanpat.

¹¹ Ma a wararing sur mot in bukus nama tokodosino, ra o Iesu Karisito in pam pati una numot a nilaun, sur a taro det in watung ulabo pas o God, ma det in rakon lekeleke pasi.

A kinkinis anun o Pol una karabus i ulubung a Wakak na Wasiso

¹² A kum tistising, a nemi sur mot in tasmani lena, a kum mamaut ra a taramo i, i ulubung a Wakak na Wasiso sur in nan sarara.

¹³ Uni i talapor torom a kum tene inaim rop ra det tamtamabat a rumu anun a king, ma torom a taro rop kai lena, a kis una karabus uni iau anun o Karisito.

¹⁴ Anung a kinkinis na karabus i sa uragot a susut na taro ra met nisnisino una Labino, ma ka det ngara sur det in wasiso puaso nama wasiso anun o God nama dekdek.

¹⁵ A lingmulus, ara taro det warawai un o Karisito uni det nuknuk laulau un iau. Ma ara taro kai, det warawai uni det nem na turbat iau gusun anung a kinkinis na mugumugu. Ikut, ara taro det warawai nama wakak na nuknukin det.

¹⁶ Det warawai uni a marmaris i kis un det. Det tasmani lena, a kis una karabus sur an wasiso balu a taro ra det watung laulau a Wakak na Wasiso.

¹⁷ Ikut ara taro det warawai un o Karisito uni det nem na ulabo pas det ut, ma ke lingmulus a nuknukin det. Det nem na wot meleti kut anung a kum mamaut, ra a kis una karabus.

¹⁸ Ikut katu utna ra det warawai nama sakino nuknuk, o a wakak na nuknuk. Det rop ri det warawai kut un o Karisito. Iri a kibino ra a gas. A lingmulus, an gas bolbolos,

¹⁹ uni a tasmani lena, una numot a kum niaring, ma a warut anun a Nion o Iesu Karisito, asau ra i wanpat un iau din pukusi sur an langolango.

²⁰ A nurnur lena, kan pam tu utna ra an maimai uni. An tur dekdek ma kan ngara, sur an ulabo pas o Karisito una nung a kum petutna rop elar nami ra numugu a ser pami. Sako an laun o an mat, an ulabo pasi ut.

²¹ Uni a nuknuking i lenri: Ra a laun, a laun sur o Karisito. Ra an mat, an rakon pas a labino utna sakit.

²² Ra a laun, anung a pinapam in wu a wakak na wino. Ka tasmani osi na pasander mo ra an pilok pasi, a nilaun, o a minat.

²³ Aru nuknuking. Ara, a nem doko i, sur an nan ma an kis tomo nam o Karisito, i ra i wakak sakit tan ara pasander.

²⁴ Ikut i wakak sakit sur an laun, ra an warut mot.

²⁵ A tasman mulusi lena, an laun ma an kis tomo nam mot, sur mot in lubung, ma mot in gas una nurnur.

²⁶ Ra dat in tamtama tomo melet, anumot a gasgas un o Karisito Iesu in bukus ma in tiltilingis, kibino un iau.

²⁷ Asau ra in nanpat, anumot a nilaun in mur sot pas a Wakak na Wasiso anun o Karisito. Ra an nan sur an tama mot, o ra an kis bakbak ma an longoro i kut a wasiso un mot, an tasmani lena, mot tur dekdek un ara nuknuk sot kut, ra mot papam tomo nam ara nuknuki mot kut sur a taro det in nurnur una Wakak na Wasiso,

²⁸ ma ka mot in ngaran a kum ebar. Iri a ukinalong torom anumot a kum ebar ra det in iru, ikut torom mot, o God in ulaun mot. O God ut in pam a kum utna ra.

²⁹ Uni o God i udan mot. Awu sur i udan mot nama numot a nurnur kut un o Karisito, awu, i udan mot nama mamaut kai, ra mot taramo i uni mot tagun o Karisito.

³⁰ Mot taramo a mamaut uni mot sa tur tomo nam iau una inaim. A inaim ra numugu mot tama i ra a pami, ma uniri mot longoro i ra a ser pami utmakai.