Pilimon 1 - Nupela Testamen long tokples Kandas

¹ Iau, o Pol, a karabus, uni a nurnur un o Karisito Iesu. Mir nam o Timoti a tisindat, mir tumus a pas ri torom ui Pilimon, a wakak na pasamet una pinapam,

² ma torom o Apia a tisindat a ino, ma torom o Arkipus a pasandat una inaim nama Wakak na Wasiso, ma torom a taro na lotu ra mot ser wan tomo una num a rumu.

³ A marmaris ma a malmal anun o God a Tamandat, ma a Labino o Iesu Karisito in kis tomo nam mot.

A marmaris ma a nurnur anun o Pilimon

⁴ Ra a wararing, a ser nuk pas ui, ma a watung wakak torom o God un ui.

⁵ Uni a longoro i lena, u nem a taro rop anun o God, ma u nurnur una Labino o Iesu.

⁶ A wararing lena, un upuaso anum a nurnur un o Karisito torom a taro ma un ususer det uni. Ra un pami lenri, in warut ui sur un mananos una kum wakak na utna rop anundat ra i kis un o Karisito.

⁷ Tisinglik, anum a marmaris torom a taro anun o God i sa pitar tar a labino gasgas tang, ma i uragot iau, uni u ugasgas a nilaun anundet.

O Pol i saring o Pilimon sur o Onesimus

⁸ Ara utna a nem doko i sur un pami. I topas iau sur an wasiso dekdek torom ui uni, uni dar tar tisino un o Karisito.

⁹ Ikut, a saring wakak ui, uni a nem ui. Iau, o Pol, a sa takano, ma uniri a kis na karabus, uni a nurnur un o Karisito Iesu,

¹⁰ a saring pas anum a nimulaot un o Onesimus, a nutunglik una nurnur. I wanpat torom iau ra a kis una karabus, ma i nukpukus. Ra uniri, i elar nama nutunglik mulus ut una nurnur.

¹¹ Numugu ke gas matano sur in papam torom ui, ikut uniri, i a wakak na tene pinapam mo, torom ui ma iau.

¹² Uniri a tulu ru i milet mo torom ui. Ra i wan gusun iau, i elar nam ara kukur tagun anung a nilaun i wan tomo nami.

¹³ A nemi sur in kis mukut tomo nam iau, sur in keles ui Pilimon, ma in warut iau, ra a kis una karabus uni a warawai nama Wakak na Wasiso.

¹⁴ Ikut ka nemi sur an ungongos pas ui sur un warut iau, ui ut un pami elar nama num a gasgas. Kan pam tu utna, tuk ui ut un mulaot.

¹⁵ Kutiro o Onesimus i kis gisen lilik pas kut gusun ui, sur i mo ri, in kis tukum tomo nam ui.

¹⁶ Uniri ken elar melet mo nama tene ititula, in elar nama tisimlik mulus una nurnur. A nem doko i, ikut a tasmani lena, anum a marmaris toromi i labo taun a marmaris ra a marisi nami, uni, i anum a tene pinapam ma a tisimlik kai una Labino.

¹⁷ Ra u nuki lena dar pasano, un gas melet pas o Onesimus, elar nami ra un gas pas iau ut.

¹⁸ Ra i sa pam tar tu sakino torom ui, o i sa los pas anum tu utna, iau mukut an balu i.

¹⁹ Iau o Pol, iau ut a tumus a wasiso ri nama lamang: an balu asau ra torom ui. Kan watung tu utna tam, ui ut u sa tasman tari lena, a matok na nilaun ra u sa los pasi, i kibino ut un iau, ma i elar nama dinau torom ui.

²⁰ A lingmulus, tisinglik, una risan a Labino, a nemi sur un gas melet pas o Onesimus. Ui a tisinglik un o Karisito, un ugasgas anung a nilaun.

²¹ Ra a tumus a pas ri, a tasman mulusi lena, un muri ut anung a sasaring torom ui, ma a tasmani kai lena un pam a utna in labo taun asau ra a saring ui suri.

²² Ara utna kai: A saring ui sur un waninar tu kukur rumu sur iau, uni a nurnur lena, o God in upirso ru iau gusun a karabus sur an milet melet torom mot. Iri a win anumot a kum niaring.

A ururop na wasiso na marmaris

²³ O Epapras, i ra i karabus tomo nam iau, uni i nurnur un o Karisito Iesu, i pitar ru anun a marmaris torom ui.

²⁴ Ma det kai ri, o Mak, o Aristakus, o Demas ma o Luk. Met paspasano tomo una pinapam.

²⁵ A marmaris anun a Labino o Iesu Karisito in kis una niomot.