A Wakak na Wasiso un o Iesu Karisito o Mak i tumusi 11 - Nupela Testamen long tokples Kandas

O Iesu i wan usapat o Jerusalem elar nama king

¹ Ra det wan milau o Jerusalem, det wanpat sapat o Betpage ma o Betani una Tangai na Oliw, o Iesu i tulu aru tagun anun a kum nat na ususer.

² Ma i inanos der lena, “Mur in nan sur a tamon kusa numugu tamur. Ra mur in nanpat, uniutra mur in tama ara barman na dongki kura di sa ker ukai tari, ma katutaio utmakai i kas taru uni. Mur in palos pasi ma mur in beni urin.

³ Ra taio in ting mur lena, ‘Mur pami lenra sur asau?’ mur in watungi lena, ‘A Labino i nemi kut munung, ra numur in tulu melet tari urin.’”

⁴ Der wan ra der pastorom a barman na dongki ra di ker tari nisan a matansako ina ra rumu, milau a kisapi, ra der palos pasi.

⁵ Ara taro kura det tur taru tiro iai, det ting der lena, “Ai, mur palos a barman na dongki ra sur asau?”

⁶ Der balu det nama wasiso ra o Iesu i sa watung tari, ra det mulaot ru i tander.

⁷ Der ben tar a barman na dongki torom o Iesu, ma der rakon ru anunder aru saket, ma der ubek tari netes uni, ra o Iesu i kas uni.

⁸ A susut na taro kai det rakon ru anundet a kum saket, ma det talaso i una kisapi. Ma ara taro kai det tau pas a kum turunu duwai sa ubual ma det ubek tari una kisapi.

⁹ Det ra det mugu ma det kai ra det mur, det kukukuk lena, “Osana! O naro ra i wanpat nama risan a Labino i dan!” Sng 118:25-26

¹⁰ “Dat in watung ulabo pas a matanitu anun a tamandat o Dewid ra in nanpat! Osana usapat netes sakit!”

¹¹ Ra o Iesu i wanpat sapat o Jerusalem, i ruk ubalan in noworo ina rumu na etabor. Ra i sa tama tar a kum utna rop, i milet melet utong o Betani tomo nam anun a noino ma aru nat na ususer, uni i sa lirop.

O Iesu i bor in nanai na fig

¹² Una bung numur, ra det wan tagitong o Betani, o Iesu i murak.

¹³ I tama in nanai na fig tagitiro bakbak i lubulubu wakak. I wan sur in tama i sur lako wino. Ra i wanpat tiro, ke tama lako wino, a kum dono rop kut, uni ke taun fig utmakai.

¹⁴ Ra i watungi torom in nanai ra lena, “Turpasi uniri ma numur, kataio melet mo in nangon tagun ui.” Ma anun a kum nat na ususer det longoro anun a wasiso ri.

O Iesu i ruk una rumu na etabor

¹⁵ Ra det wanpat sapat o Jerusalem, o Iesu i ruk unin noworo ina rumu na etabor, ma i lu pirso ru a taro ra det siuru, ma det kai ra det kukul tiro iai. I bulus ru a kum kabulu anun a kum tene keles mani ma a kum kiskis anundet ra det siuru a kum tabun.

¹⁶ Ma ke madek tar taio sur in los a kum utna na siuru epotor ubalan in noworo ina rumu na etabor.

¹⁷ Ra i ususer det, i watungi lena, “Di sa tumus tari una Buk Tabu lenri, ‘Din watung anung a rumu nama rumu na niaring sur a taro tagun a kum gapman rop.’ Ais 56:7 Ikut mot sa pukus pasi sur in elar mukut nama ‘nubual na parparau anun a kum tene wolong.’” Jer 7:11

¹⁸ A kum lamlabino tene etabor torom o God ma a kum tene ususer tagun a Warkurai det longoro i, ra det nuknuk sur tu kisapi sur det in um doko o Iesu uni, uni det ngarani. Det ngara uni a taro rop det kisin una kum etowo anunu.

¹⁹ Ra i sa lirop, o Iesu tomo nam anun a kum nat na ususer det pirso melet gusun in noworo ina tamon Jerusalem.

A etowo tagun in nanai na fig

²⁰ Una kobot raut, det milet melet usapat o Jerusalem, ra det tama in nanai na fig i sa marang, tagisapat netes tuk unago una wakakorino.

²¹ Ma o Pita i nuk pas a wasiso anun o Iesu, ra i watungi tano lena, “Tama i! Tene Ususer, in nanai na fig ra u bor tari, i sa marang rop.”

²² Ma o Iesu i balu i lena, “Mot in nurnur un o God.

²³ A inanos mot nama lingmulus, ra taio in watungi tan a tangai ri lena, ‘Un taragot ma un sirok losop usa utasi,’ ma ke wur nuknuk, i nurnur kut lena din pam a utna ra i sa watung tari, din pam soti ut.

²⁴ Lenra, a inanos mot, a kum utna rop ra mot wararing suri, mot in nurnur kut lena di sa pitar tari tamot, ma din pitari ut torom mot.

^25-26 “Ra mot tur ma mot wararing, ma mot nuk torom tu utna ra taio i pam sako tari un mot, mot in dumano ru i, sur a Tamamot kusapat una langit in unus ru anumot a kum sakino petutna kai.”

Det iting una dekdek ra o Iesu i ser papam nami

²⁷ Det wanpat melet sapat o Jerusalem. Ra o Iesu i wan nanan ubalan in noworo ina rumu na etabor, a kum lamlabino tene etabor torom o God, ma a kum tene ususer tagun a Warkurai, ma a kum mugumugu det wan toromi.

²⁸ Ra det tingi lena, “Asi na ngas na dekdek ra u pam a kum utna ri nami? Osi ra i pitar tar a dekdek ri tam sur un pam a kum utna ri?”

²⁹ O Iesu i balu det lena, “Iau kai an ting mot nam ara iting. Ra mot in balu i, an inanos mot una dekdek ra a ser pam a kum utna ri nami.

³⁰ Tagai a dekdek ra o Jon i baptaiso a taro nami? Tan o God, o tan a taro kut? Mot inanos iau.”

³¹ Ra det wasiso etetalai torom det lena, “Ra dat in watungi lena, ‘Tan o God,’ in balu dat kut lena, ‘Sur asau ra ka mot nurnur uni?’

³² Ikut in pepetlai ra dat in watungi lena, ‘Tan a taro’?” Det ngaran a taro, uni det rop det nurnur un o Jon lena i a poropet.

³³ Ma det balu o Iesu kut lena, “Ka met tasmani.” Numur o Iesu i watungi tandet lena, “Iau kai kan inanos mot una dekdek ra a ser pam a kum utna ri nami.”