A Wakak na Wasiso un o Iesu Karisito o Mak i tumusi 1 - Nupela Testamen long tokples Kandas

O Jon a Tene Baptaiso i warawai

¹ Iri a Wakak na Wasiso un o Iesu Karisito, a Nutun o God.

² I turpasi elar nama wasiso anun o God ra a poropet Aisaia i sa tumus tari lena, “Tama i, iau an tulu ru anung a tene los wasiso sur in mugu tam, i ra in waninar anum a kisapi.

³ Una nubual kalako taro uni, in nalngan ara i kakabo lena, ‘Mot in waninar a kisapi anun a Labino, mot in pam kodos anun a kum kisapi.’” Ais 40:3

⁴ A musano ra, i o Jon a Tene Baptaiso. I kis una nubual kalako taro uni, ra i ser warawai lena, a taro det in nukpukus ma din baptaiso det, sur o God in unus ru anundet a kum sakino petutna.

⁵ A taro rop tagisapat o Jerusalem ma tagun a kum tamon rop kai una papor Judia, det wan toromi. Det watung puaso anundet a kum sakino petutna, ra i baptaiso det una danim Jodan.

⁶ O Jon i ser emar namin namalu di pami nama iwu na kamel, ma i ser ker wati namin pino bulumakau. I ser wan a kum ko ma a polono tatos.

⁷ I ser watungi lena, “O naro ra in mur tang, a dekdekino i labo taun a dekdeking. Ka elar sur an par piso, ma an palos aru su gusun aru kikino, uni a natino doko tano.

⁸ Iau, a baptaiso mot nama danim, ikut i, in baptaiso mot nama Tokodos na Nion.”

O Jon i baptaiso o Iesu, ra numur o Satan i lari

⁹ Una ara bung, o Iesu i wan tagitong o Nasaret una papor Galili, ra o Jon i baptaiso i tiro una danim Jodan.

¹⁰ Uniutra o Iesu i saur gusun a danim, ra i tama a langit i papos, ma a Tokodos na Nion i wan pirso toromi elar namin natabun.

¹¹ In nalngan ara tagisapat una langit i watungi lena, “Ui a Nutunglik, a nat na wakak, a gas doko nam ui.”

¹² Uniutra a Tokodos na Nion i tulu ru o Iesu usa una nubual kalako taro uni,

¹³ ra i kis tiro a wat na noino bung, ra o Satan i lari. I kis tomo nama kum kuabor ma a kum ensel det waruti.

O Iesu i kabo pas a wat na musano ra a kum tene woro uben

¹⁴ Ra di sa uruk tar o Jon una karabus, o Iesu i wan utiro una papor Galili, i warawai nama Wakak na Wasiso anun o God.

¹⁵ I watungi lena, “A du bung i sa sot, ma a matanitu anun o God i sa milau. Mot in nukpukus, ma mot in nurnur una Wakak na Wasiso.”

¹⁶ O Iesu i usal una usalin ina du tasi Galili, ra i tama pas o Saimon dersino nam o Endru. Der woro a uben sa utasi, uni der aru tene woro uben.

¹⁷ I watungi tander lena, “Mur in mur iau, sur an ususer mur sur mur aru tene ben taro.”

¹⁸ Uniutra der katutur pas gusun anunder a kum uben, ma der muri.

¹⁹ I wan lilik melet, ra i tama pasi bulung o Jems dersino nam o Jon, aru nutnutun o Sebedi. Der kis taru una pot ma der mabon anunder a kum uben.

²⁰ Uniutra, o Iesu i kabo der, ma der wan gusun a tamander ma a kum tultul kura una pot, ra der muri.

O Iesu i lakro ru a laulau na nion gusun ara musano

²¹ Det wan utong o Kapernaum. Ra una Bung na Sabat o Iesu i ruk utiro una rumu na lotu, ma i ususer a taro.

²² Ra det kisin una nun a kum etowo, uni i ususer det elar nam ara, ra a warkurai kura ut tano. Ke ususer det elar nama kum tene ususer tagun a Warkurai.

²³ Uniutra ara musano, a laulau na nion kura uni, i ruk utiro una nundet a rumu na lotu, ma i kakabo lena,

²⁴ “Iesu, a te Nasaret u ling na pam asau un met? U wanpat sur un ban laulau met? A tasman ui, ui a Tasur na Musano anun o God.”

²⁵ O Iesu i sakbati lena, “Gong u wasiso! Pirso gusun a musano ra!”

²⁶ Ma a laulau na nion i gunu dekdek tari, ra i kukukuk ma i pirso gusuni.

²⁷ A taro rop det kisin doko, ra det ting etetalai det lena, “Asau ri? A matok na ususer. A musano ri i ususer nama dekdek, ma a warkurai kura ut tano. I ser wasiso tan a kum laulau na nion, ra det ser mur anun a wasiso.”

²⁸ Ra a wasiso un o Iesu i wan sarara lakit utiro una kum tamon rop una papor Galili.

O Iesu i ulangolango pas a susut na misait

²⁹ O Iesu tomo nama nun a kum nat na ususer, det pirso gusun a rumu na lotu. Uniutra, det wan tomo nam o Jems ma o Jon ra det wan utiro una rumu anun o Saimon der nam o Endru.

³⁰ Ara ino a inumun o Saimon, i misait nama pinino mararong, kura i inep. Uniutra det inanos o Iesu uni.

³¹ Ra o Iesu i wan toromi, i pam a lamano, ma i ukatutur pasi, ra a mararong i rop mut gusuni. Numur a ino ra i tabor det mo nama utna na inangon.

³² Ra in matanas i sa sup taru, a taro det ben pat a kum misait rop torom o Iesu, ma det kai ra a kum laulau na nion kura un det.

³³ A taro rop tagun a tamon ra, det wanpat ma det bukus una matansako.

³⁴ Ra i ulangolango a susut ra det misait nama kum wur ngas na misait. I lakro ru a susut na laulau na nion gusun det, ma i turbat a kum laulau na nion sur gong det wasiso, uni det tasmani ut o Iesu.

O Iesu i warawai tiro una papor Galili

³⁵ Una lar, o Iesu i tuangun ra i pirso. I wan sur a nubual kalako taro uni, ma i wararing tiro iai.

³⁶ O Saimon ma det ra det wan tomo nami, det sisio suri.

³⁷ Ra det sa sio pasi, det inanosi lena, “A taro rop det sisio sur ui.”

³⁸ Ra o Iesu i balu det lena, “Dat in nan gisen bulung utiro un lako kum tamon milau, sur an warawai kai torom det. Uni i a kibino ra a wanpat suri.”

³⁹ Ra i wan tuptupukus una papor Galili rop. I warawai una nundet a kum rumu na lotu, ma i lakro ru a kum laulau na nion gusun a taro.

O Iesu i ulangolango pas ara lepra

⁴⁰ Ara musano, i misait nama lepra, i wan torom o Iesu, ra i kis butkeke, ma i saring dekdeki lena, “Ke ngangitin torom ui. Ra u nemi, un ulangolango pas iau.”

⁴¹ O Iesu i maris doko i. I kodos a lamano, ma i pam a pinino ra i watungi tano lena, “A nemi ut, un langolango.”

⁴² Uniutra, a lepra i rop mut gusuni, ra i langolango melet.

⁴³ Uniutra, o Iesu i tulu ru i, ma i pak dekdek tari lena,

⁴⁴ “Gong u inanos tar taio nami. Un nan ma un ese mugu tar ui torom a tene etabor torom o God, ma un pitar a kum etabor torom o God elar nami ra o Moses i sa watung tari, sur un talapor umatan o God. Ra un pami lenra, a taro det in tasmani lena u sa langolango.”

⁴⁵ Ikut a musano ri, i wan ma i wasiso tuptupukus, ra a wasiso uni, i wan sarara. I mo ra, o Iesu ke wan puaso melet un tu tamon. I wan ra i ser kis tuptupukus mukut tiro una kum nubual kalako taro uni. Ikut a taro tagun a kum tamon det ser wan toromi.