Matiu 9 - Nupela Testamen long tokples Kandas

O Iesu i ulangolango pas a musano ra a pinino i mat

¹ O Iesu i kas una pot, ra i wan kutus utiro una ara papor du tasi sur anun a tamon.

² Ra a ramano kum musano det los pat ara musano toromi, a pinino i mat, ma i inep taru kut una lu. O Iesu i tama anundet a nurnur, ra i inanos a musano ra lena, “Nutunglik, gong u ngara, di sa unus ru anum a kum sakino petutna.”

³ A ramano kum tene ususer tagun a Warkurai det wasiso etalai torom det ut lena, “A musano ri i watung laulau o God, uni i wasiso lar i o God.”

⁴ Ma o Iesu i tasman a nuknukin det, ra i ting det lena, “Sur asau ra mot nuknuk laulau?

⁵ Osi na wasiso ra ke ngangitin sur an watungi? Pepetlai, an watungi lena, ‘Di sa unus ru anum a kum sakino petutna,’ o, an lena, ‘Un katutur, ma un nan’?

⁶ A wasiso ra an watungi, an watungi sur mot in tasmani lena, o God i pitar a warkurai torom a Nutun a Musano, sur in unus ru a kum sakino petutna nin upiso.” Ra i watungi torom a musano a pinino i mat lena, “Un katutur, un los anum a lu, ra un nan sur anum a rumu.”

⁷ I katutur mut, ra i wan sur anun a rumu.

⁸ A kunur na taro det tama i, ra det kisin doko uni, ma det rakon lekeleke pas o God, uni i pitar a dekdek lenri torom a taro.

O Iesu i kabo pas o Matiu

⁹ Ra o Iesu i wan nanan tagitiro iai, i tama pas ara musano, a risano o Matiu, i kis una rumu na los takis. O Iesu i inanosi lena, “Un mur iau.” Ra o Matiu i katutur ma i muri.

¹⁰ Numur o Iesu ma anun a kum nat na ususer, det wangon tiro una rumu anun o Matiu. A susut na tene los takis ma a kum tene sakino det wan torom o Iesu, ra det wangon tomo nam det.

¹¹ Ra a kum Parisi det tama i, det ting anun a kum nat na ususer lena, “Sur asau ra anumot a tene ususer i wangon tomo nama kum tene los takis ma a kum tene sakino?”

¹² O Iesu i longoro i ra i watungi lena, “A dokta ke wanpat sur det ra det langolango. Awu! I wanpat sur det kut ra det misait.

¹³ Mot in nan, ma mot in sisio sur a kukurai ina wasiso ri tagun a Buk Tabu, ‘A nem a marmaris, ma ka nem a etabor ra di ser tuni.’ Os 6:6 Uni ka wanpat sur an kabo pas a kum tene tokodos, awu. A wanpat sur an kabo pas a kum tene sakino.”

A iting una winewel

¹⁴ A kum nat na ususer anun o Jon det wan torom o Iesu, ra det tingi lena, “Sur asau ra met ma a kum Parisi met wewel, ikut anum a kum nat na ususer awu?”

¹⁵ O Iesu i balu det lena, “A kum paspasan a musano ra i nolin matok, det in domos pepetlai, ra kura utmakai i tomo nam det? Ikut tu bung in nanpat, ra din ben ru i gusun det, ra det in wewel maragom.

¹⁶ “Katutaio in mabon a du matok na malu tomo nama turaino ra i tararos, uni a du matok na malu in raros a turai na malu, ra in tararos bing.

¹⁷ Kataio in titior a matok na wain utiro unin turai na koto ra di pami namin pino meme, sako in nokoto in tupurus ma in laulau, ra a wain in tilingis. Din titior a matok na wain ut utiro unin matok na koto na wain, sur der rop der in kis wakak.”

O Iesu i ulaun pas a inolik, ma i ulangolango pas ara ino

¹⁸ Ra o Iesu i wasiso utmakai torom det, ara mugumugu i wan toromi, ra i kis butkeke sa numugu tano, ra i watungi lena, “A nutunglik a ino, unikutri i mat. Aiap, dar in nan ma un ubek a lamam sapat netes uni, sur in laun.”

¹⁹ Ra o Iesu i katutur ra der wan, det tomo nam anun a kum nat na ususer.

^20-21 Ara ino ra i misait nama gap elar nama noino ma aru kilalo, i nuki lena, “Ra an tulani kut anun a saket, an langolango.” Ra i wan numur tan o Iesu, ma i tulan tar a sinisir ina saket anunu.

²² O Iesu i tur tupukus ra i tama a ino ra, ra i watungi tano lena, “Nutunglik, gong u ngara, anum a nurnur i sa ulangolango pas ui.” Ra una du bung ut ra, a ino ra i langolango mut.

²³ O Iesu i wanpat una rumu anun a mugumugu, ra i tama a taro ra det ese anundet a tupunuk una minat. Det wup a kum tulal, ma a susut na taro kai det domos.

²⁴ I watungi tandet lena, “Mot in pirso saro i. A inolik ri awu sur i mat, i inep dumun kut.” Ra det urongon kut uni.

²⁵ Ra di sa tulu pirso ru tar a taro, o Iesu i ruk ra i pam a laman a inolik, ra i katutur mut.

²⁶ A wasiso una utna ri i wan sarara una papor rop ra.

O Iesu i utamtama pas aru pulu

²⁷ O Iesu i wan tagitiro, ra aru musano, aru pulu, der muri, der kakabo sapat lena, “Nutun o Dewid, un maris mir.”

²⁸ Ra i ruk una rumu, aru pulu der wan toromi, ma i ting der lena, “Pepetlai, mur nurnur ut un iau sur an pam sot pas a utna ri?” Der balu i lena, “Ma, Labino.”

²⁹ Ra i pam arin matander ma i watungi lena, “Din pami torom mur, elar ut nama numur a nurnur.”

³⁰ Uniutra der tamtama. Ra o Iesu i sakbat dekdek tar der lena, “Gong mur inanos tar taio nami.”

³¹ Ikut, der wan ra der inanos nanan nam o Iesu una papor rop ra.

O Iesu i lakro ru a laulau na nion gusun ara ngat

³² Ra aru pulu der wan nanan utmakai gusun o Iesu, di ben tar ara musano bulung toromi, i ngat, ma a laulau na nion kura uni.

³³ O Iesu i lakro ru a laulau na nion gusuni, ra a musano ra i wasiso maragom. Ma a kunur na taro det kisin, ra det watungi lena, “Telek ri di tama a utna lenri nin o Israel.”

³⁴ Ikut a kum Parisi det watungi lena, “I ser lakro ru a kum laulau na nion nama dekdekin a labino anun a kum laulau na nion.”

A kum tene pasong ka det susut

³⁵ O Iesu i wan nanan una kum lamlabino tamon ma a kum natnat na tamon rop. Ra i ususer a taro una nundet a kum rumu na lotu, ma i warawai nama Wakak na Wasiso una matanitu anun o God, ma i ulangolango pas a taro gusun a kum wur ngas na misait rop.

³⁶ Ra i tama a kunur na taro, i maris doko det, uni i talara a nuknukin det, ma det pot na marmaris, elar kut nama kum sipsip ra katu tene tamtamabat anundet.

³⁷ Ra i watungi tan anun a kum nat na ususer lena, “A kinobot i sa makus, ma i sa labo doko, ikut kalako susut na tene pasong.

³⁸ I mo ra mot in saring a Labino, i ra a taman a kinobot, sur in tulu ru a kum tene pasong sur ana kinobot.”