Matiu 8 - Nupela Testamen long tokples Kandas

O Iesu i ulangolango pas a lepra

¹ Ra o Iesu i wan pirso tagisapat una tangai, a susut na taro det muri.

² Ara musano, i misait nama lepra, i wan toromi, i kis butkeke nisano, ma i watungi lena, “Labino, ra u nemi, i topas ui sur un ulangolango pas iau.”

³ O Iesu i kodos a lamano, ma i pam a pinino, ra i watungi tano lena, “A nemi ut, un langolango.” Uniutra a lepra i rop gusuni.

⁴ Ra o Iesu i watungi tano lena, “Gong u inanos tar taio nami. Un nan ma un ese mugu tar ui torom a tene etabor torom o God, ma un pitar a etabor torom o God elar nami ra o Moses i sa watung tari. Ra un pami lenra, a taro det in tasmani lena u sa langolango.”

A nurnur anun a mugumugu anun a kum tene inaim

⁵ Ra o Iesu i sa wanpat tong o Kapernaum, ara mugumugu anun a kum tene inaim tagitong o Rom i wan toromi, ra i inanosi sur in waruti.

⁶ I watungi lena, “Labino, ara tultul anung kurong ut una rumu i inep, a pinino rop i mat, ma i taramo a dekdek na ngunungut doko.”

⁷ O Iesu i watungi tano lena, “An nan ma an ulangolango pasi.”

⁸ A mugumugu ra i balu i lena, “Labino, ka tokodos sur un ruk una nung a rumu. Un watung tu wasiso kut, ra anung a tultul in langolango.

⁹ Uni iau a musano ra a ser mur a warkurai anundet ra det labo tang, ma di pitar tar a warkurai kai tang sur a taro na inaim. Ra an watungi tan taio lena, ‘Un nan,’ in nan kut. Ma torom taio kai lenri, ‘Un nan urin,’ in nan kut urin. Ma torom anung a tultul lena, ‘Un pam a utna ri,’ in pami kut.”

¹⁰ O Iesu i longoro anun a wasiso, ra i kisin doko uni, ma i watungi torom a taro ra det muri lena, “A inanos mot nama lingmulus, ka tama tar tu te Israel ra anun a nurnur i labo elar nama musano ri.

¹¹ A watungi tamot lena kura numur a susut na taro det in nan tagitiro na matmatano tobar ma a matmatano lubur, ra det in kis tomo nam o Abaram, o Aisak ma o Jekop una lukaro una matanitu sapat una langit.

¹² Ikut, a taro Israel ra numugu o God i pilok pas det sur det in kis una nun a matanitu, in lu pirso ru a susut tagun det utiro una dumirum. Ra det in tangtangis ma det in ungingit lokondet iai.”

¹³ Ra o Iesu i watungi tan a mugumugu anun a kum tene inaim lena, “Un nan kut. Din pam a utna ut ra u nurnur suri.” Una du bung ut ra anun a tultul i langolango mut.

O Iesu i ulangolango pas a susut na misait

¹⁴ O Iesu i ruk una rumu anun o Pita, ra i tama a inumun o Pita, a ino, i misait nama pinino mararong, kura i inep taru una kabulu.

¹⁵ O Iesu i pam a lamano, ra a mararong i rop mut gusuni. A ino ra i katutur, ra numur i tabor o Iesu nama utna na inangon.

¹⁶ Ra in matanas i sa sup taru, di ben pat a susut na taro torom o Iesu ra a kum laulau na nion kura un det. I lakro ru a kum laulau na nion gusun det nama wasiso kut, ma i ulangolango pas det rop, ra det misait.

¹⁷ A utna ri i wanpat sur din pam sot pas a kum wasiso, ra a poropet Aisaia i sa wasiso taru uni lenri, “I ut i los pas anundat a kum misait, ma i rakon ru anundat a kum ngunungut.” Ais 53:4

Det ra det nem na mur o Iesu

¹⁸ Ra o Iesu i tama a kunur na taro ra det tur talilis pasi, i watungi tan anun a kum nat na ususer lena, “Dat nan utong una ara papor tasi.”

¹⁹ Ma ara tene ususer tagun a Warkurai i wan toromi, ra i watungi tano lena, “Tene Ususer, an mur ui una kum nubual rop ra un nan iai.”

²⁰ Ra o Iesu i watungi tano lena, “A kum lomlom na pap anundet a kum tung ut, ma a kum piko kai anundet a kum pios ut, ikut a Nutun a Musano katu rumu na ininep.”

²¹ Ma ara musano kai, tagun anun a taro na ususer i watungi tano lena, “Labino, un mulaot ru iau munung sur an nan, an por ru tar o tita.”

²² Ikut o Iesu i watungi tano, “Un mur iau, ma un madek ru a kum minat det in por anundet a kum minat.”

O Iesu i turbat a wuwu ma a top

²³ Ra o Iesu i kas una pot, anun a kum nat na ususer det kas numurunu.

²⁴ Numur a dekdek na wuwu doko i wanpat kisin ma i ragoti una du tasi. A top i tapak sapat netes una pot. Ikut o Iesu i inep dumun,

²⁵ ra det wan toromi, det wangun pasi, ma det inanosi lena, “Labino, un ulaun dat. Dat na iru.”

²⁶ Ma i watungi torom det lena, “Anumot a nurnur i natino doko. Sur asau ra mot ngara?” I katutur ra i turbat a wuwu ma a top, ra i mililo rop.

²⁷ Ra a kum nat na ususer det kisin uni, ma det watungi lena, “Osi na ngas na musano mulus ri? A wuwu ma a top der mur anun a wasiso!”

O Iesu i lakro ru a kum laulau na nion gusun aru musano

²⁸ O Iesu i sot una ara papor tasi, una papor anun a taro Gadara. Aru musano ra a kum laulau na nion kura un der, der wan tagitong una kum kulam na minat, ra der wan barato i. Der ngalngalia doko, ma kataio i ser wan sakit tiro una kisapi ra.

²⁹ Der woiwoi lena, “Nutun o God, asau ra u nem na pami un mir? Pepetlai, u wan urin sur un ukadik met? Ke sot utmakai a bung na warkurai.”

³⁰ A kabo liur na boro det wangon milau kut tiro iai.

³¹ Ra a kum laulau na nion det saring o Iesu lena, “Ra un lakro ru met, un tulu ruk tar met utiro una kum boro.”

³² O Iesu i watungi tandet lena, “Mot wan!” Ra a kum laulau na nion det pirso gusun aru musano ra, ma det ruk taru una kum boro. A kum boro det kalabor pirso una palis sur a du tasi, ra det kongo rop.

³³ A taro ra det ser tabor a kabo liur na boro ra, det kalabor eno pas utiro utamon. Ra det wanpat, det inanos una kum utna rop ra i wanpat, ma un der kai, ra a kum laulau na nion numugu kura un der.

³⁴ A taro rop tagun a tamon ra, det wan sur det in tama o Iesu. Ra det tama pasi, det saringi sur in nan gisen gusun anundet a papor.