Matiu 4 - Nupela Testamen long tokples Kandas

O Satan i lar o Iesu

¹ Numur a Tokodos na Nion i ben o Iesu usa una nubual kalako taro uni, sur o Satan in lari.

² Ra i sa wewel pas a wat na noino bung na mirum ma a wat na noino bung na waspi, numur i murak.

³ Ra a tene ululam i wanpat toromi, ma i watungi tano lena, “Ra ui a Nutun o God, un inanos a kum watat ri sur det in nanpat a beret.”

⁴ O Iesu i balu i lena, “Di sa tumus tari una Buk Tabu lena, ‘A taro ka det ser laun nama utna na inangon kut, det ser laun nama kum wasiso rop ra i pirso gusun a wan o God.’” Lo 8:3

⁵ Numur o Satan i ben pasi usapat o Jerusalem, a tamon anun o God, ra i utur tari sapat netes sakit una rumu na etabor.

⁶ Ma i watungi tano lena, “Ra ui a Nutun o God, un sirok pirso, uni di sa tumus tari una Buk Tabu lena, ‘In watungi torom anun a kum ensel sur det in tamtamabat ui. Det in pam pas ui nama kum lamandet, sur gong u tuka a kikim un tu wat.’” Sng 91:11-12

⁷ O Iesu i balu i lena, “Di sa tumus tari kai una Buk Tabu lena, ‘Gong u lar a Labino anum a God.’” Lo 6:16

⁸ O Satan i ben melet pasi usapat netes una labino tangai, ra i ese tar a kum tamon rop una rakrakon bual tomo nama kum minamarin det rop kai tano.

⁹ Ra i watungi tano lena, “Ra un kis butkeke ma un lotu torom iau, a kum utna rop ri an pitar tari tam.”

¹⁰ O Iesu i watungi tano lena, “Satan, un nan gisen, uni di sa tumus tari una Buk Tabu lena, ‘Un lotu torom a Labino anum a God, ma un papam kut toromi.’” Lo 6:13

¹¹ Numur o Satan i wan pas gusuni, ra a kum ensel det wanpat toromi, ma det waruti.

O Iesu i turpas anun a pinapam na warawai una papor Galili

¹² O Iesu i longoro i lena, di sa uruk tar o Jon una karabus, ra i milet melet utong una papor Galili.

¹³ Ra i wan tagitong o Nasaret, i kis tiro o Kapernaum, a tamon ra i kis una usalin nisan a du tasi Galili, una piso anun a kabotaro Sebulon ma a kabotaro Naptali,

¹⁴ sur in pam sot pas a wasiso anun o God ra o Aisaia a poropet i sa wasiso mugu taru uni lena,

¹⁵ “A piso anun a kabotaro Sebulon ma a piso anun a kabotaro Naptali, milau a kisapi ra i wan unago utasi, una papor danim Jodan utong, der kis una papor Galili, ra a taro ra awu sur a taro Juda det kis iai.

¹⁶ A taro ra det kis una dumirum det sa tama a labino talapor, ma det ra a dumirum na minat i pulus bat det, a talapor i sa wanpat torom det.” Ais 9:1-2

¹⁷ Turpasi una kilalo ra, o Iesu i warawai lena, “Mot in nukpukus, uni a matanitu tagisapat una langit i sa milau.”

O Iesu i kabo pas a wat na mugano nat na ususer

¹⁸ Ara bung o Iesu i usal una usalin ina du tasi Galili, ra i tama pas o Saimon, di watungi kai nam o Pita, ma o tisino o Endru. Der woro a uben sa utasi, uni der aru tene woro uben.

¹⁹ I watungi tander lena, “Mur in mur iau, sur an ususer mur sur mur aru tene ben taro.”

²⁰ Uniutra, der katutur pas gusun anunder a kum uben, ma der muri.

²¹ Ra i wan tagitiro, i tama pas o Jems dersino nam o Jon, aru nutnutun o Sebedi. Detul tamano kis taru una pot ma detul mabon anundetul a kum uben. Ra o Iesu i kabo der.

²² Uniutra, der katutur pas ma der wan gusun a pot ma a tamander, ra der mur o Iesu.

O Iesu i ulangolango a kum misait

²³ O Iesu i wan tuptupukus una papor Galili rop, ma i ususer a taro una nundet a kum rumu na lotu. I warawai nama Wakak na Wasiso una matanitu anun o God. Ma i ulangolango pas a taro gusun a kum wur ngas na misait rop.

²⁴ Ma a wasiso un o Iesu i wan sarara una papor Siria rop. Ra det ben rop pas a taro ra a kum wur ngas na misait i ban laulau det, a taro ra a dekdek na ngunungut i ban laulau det, ma det ra a kum laulau na nion kura un det, det kai ra det ser mat lalang ma det ra a pinpinin det i mat. Ra o Iesu i ulangolango pas det rop.

²⁵ Ma a labino kunur na taro taginin una papor Galili ma tagitiro una papor Dekapolis, ma tagisapat o Jerusalem, ma tagun a papor Judia ma tagitong una ara papor danim Jodan det mur o Iesu.