Matiu 22 - Nupela Testamen long tokples Kandas

A wasiso elelar una lukaro na unolin

¹ O Iesu i wasiso melet torom det nama wasiso elelar lenri,

² “A matanitu tagisapat una langit i elar nama king ra i sa waninar tar a lukaro na unolin sur o nutunu, a musano.

³ Ra i tulu ru anun a kum tultul torom det, ra di sa inanos mugu tar det, sur det in ben pas det sur a lukaro. Ikut det putut rop kut.

⁴ I tulu ru i bulung anun a ramano kum tultul gisen nama wasiso lena, ‘Mot in inanos det ra di sa inanos mugu tar det lena, “A sa waninar rop tar a utna na inangon. A sa um doko tar a kum bulumakau ma a kum matok na butbut na bulumakau, a kum utna i sa waninar rop. Mot in nan urin una lukaro na unolin.” ’

⁵ “Ikut ka det tarom, det wan gisgisen kut. Ara i wan sur anun a du piso, ara kai sur anun a rumu na siuru.

⁶ Ma ara taro kai ra di wan sur det, det pam ukai pasi kut a kum tultul, ma det ban laulau det ma det um doko det.

⁷ A king ra, in balano i sungun doko, i tulu ru anun a taro na inaim, ra det um doko ru a kum tene umum doko taro ra, ma det tun ru anundet a tamon.

⁸ “I watung meleti tan anun a kum tultul lena, ‘Di sa waninar tar a lukaro na unolin, ikut det ra di sa inanos mugu tar det, ka det tokodos sur det in kis una lukaro.

⁹ Mot nan una kum kisapi ma osi ra mot in etoromi, mot in inanosi lena in nan urin sur a lukaro.’

¹⁰ Ra a kum tultul det wan una kum kisapi, ma det ben tomo det rop ra det etorom det, a kum sakino taro ma a kum wakak na taro kai, ma a lukaro na unolin i bukus nam det.

¹¹ “Ra a king i ruk sur in tama a taro, i tama torom pas ara musano ra ke emar nam tin namalu na lukaro na unolin.

¹² Ma i tingi lena, ‘Le, u ruk lai taru urin? Uni ka tin namalu na lukaro na unolin anum.’ A musano ra ke balu i.

¹³ Ra a king i watungi tan anun a kum tultul lena, ‘Mot in ker pas aru kikino ma aru lamano ma mot in woro pirso ru i unago utamon una dumirum. Tiro iai di tangtangis ma di ungingit lokondi iai.’

¹⁴ “Di sa kabo pas a susut, ikut di pilok pas a pak na taro kut.”

A iting una takis

¹⁵ Numur a kum Parisi det wan tomo taru, ra det epak pas lena det in lar o Iesu sur tu wasiso anunu, sur det in takuni nami.

¹⁶ Det tulu ru anundet a kum nat na ususer tomo nama kum paspasan o Erod torom o Iesu, ma det watungi lena, “Tene Ususer, met tasmani lena ui a tokodos na musano, ma u ser ususer a taro una kisapi anun o God nama lingmulus. Ko nuknuk bing un asau ra a taro det watungi un ui, uni a magiram i takai kut torom a taro rop.

¹⁷ Un inanos met, asau a nuknukim? I tokodos sur din pitar a takis torom a Sisa o awu?”

¹⁸ Ikut, o Iesu i tasmani lena, a nuknukin det i laulau, ra i watungi tandet lena, “Mot a kum tene torotoro, ilai ra mot nemi sur mot in lar iau?

¹⁹ Mot in ese iau nam tu mani na takis.” Ra det pitar tar a mani tano.

²⁰ Ma i ting det lena, “In masarin osi ri, ma a tumtumus ri uni anun osi?”

²¹ Det balu i lena, “Anun a Sisa.” Ra i watungi tandet lena, “Asau ra anun a Sisa, mot in pitari torom a Sisa. Ma asau ra anun o God, mot in pitari torom o God.”

²² Ra det longoro i, det kisin doko ma det wan gusuni.

A iting una nilaun melet gusun a minat

²³ Una bung ut ra a kum Sadusi, ra det ser ipul kut lena katu nilaun melet gusun a minat, det wan torom o Iesu, ma det tingi lena,

²⁴ “Tene Ususer, o Moses i watungi lena, ra tu musano in mat pas gusun anun a ino, ma katu nutunder, o tisinolik in ben pasi ra in nolin nami, sur in ulabo tar lako kum nat una risan o tisino ra i sa mat.

^25-26 Ara kabo tisino, a wonom mawit na musano det, det kis epotor tamet. A mugano i nolin, ra i mat pas gusun anun a ino, ma katu nutunder. Ra a murmur tano bulung i nolin nama ino ra, ma i bulung i mat kut gusuni. Numur a mantul nami bulung. Ra i lenra torom a wonom mawit, det rop det nolin pas nami, ikut katu nutun tu pasandet.

²⁷ Ra numur a ino bulung i mat.

²⁸ “Una nilaun melet gusun a minat, a ino ra, anun osi na pasandet mo tagun a wonom mawit ra? Uni det rop det sa nolin pas nami.”

²⁹ O Iesu i balu det lena, “Mot raro doko, uni ka mot tasman a Buk Tabu ma a dekdekin o God kai.

³⁰ Una nilaun melet gusun a minat, ka det in nolin melet mo, det in elar mukut nama kum ensel sapat una langit.

³¹ Ra mot ipul lena a kum minat ka det in katutur melet gusun a minat, pepetlai, ka mot luki utmakai a wasiso ra o God i sa watung tari tamot? I watungi lena,

³² ‘Iau a God anun o Abaram, a God anun o Aisak ma a God anun o Jekop.’ Kis 3:6 O God awu sur a God anun a kum minat, i a God anundet ra det laun.”

³³ Ra a kunur na taro det longoro i, det kisin doko una nun a ngas na etowo.

A warkurai ra i labo sakit

³⁴ A kum Parisi det longoro i lena, o Iesu i sa duku sot pas a kum Sadusi, ra det wan tomo toromi.

³⁵ Ma ara pasandet, a tene mananos tagun a Warkurai, i lari nama iting lena,

³⁶ “Tene Ususer, asi na warkurai ra i labo sakit taun det rop?”

³⁷ Ma i balu i lena, “‘Un nem a Labino anum a God namin balam rop, a niom rop, ma a nuknukim rop.’ Lo 6:5

³⁸ A warkurai ri i labo sakit tandet rop, ma i a mugano warkurai.

³⁹ Ma iri i a manru na warkurai, ra i ling na elar nami, ‘Un nem o pasam elar nami ra u nem ui ut.’ Wkp 19:18

⁴⁰ Aru warkurai ri, der a kimkibin a kum wasiso na Warkurai rop anun o Moses ma a kum etowo anun a kum poropet.”

A Karisito i a Labino anun o Dewid

⁴¹ Ra a kum Parisi det kis tomo, o Iesu i ting det lena,

⁴² “Asau ra mot nuki una Karisito? I a nutun osi?” Det balu i lena, “A nutun o Dewid.”

⁴³ O Iesu i watungi tandet lena, “Ra i lenra, ilai ra a Tokodos na Nion i mugu o Dewid ra i watung a Karisito lena ‘anung a Labino’? Uni o Dewid i watungi lena,

⁴⁴ ‘A Labino i watungi torom anung a Labino lena, “Un kis una papor sot na lamang, tuk ra an winim pas anum a kum ebar sur det in kis utuntudu in anum a warkurai.” ’ Sng 110:1

⁴⁵ O Dewid i watung a Karisito lena, i anun a Labino. Ra i lenra, der tamano pepetlai?”

⁴⁶ Ma kataio i nuk pas tu wasiso melet sur in balu i nami. Turpasi una bung ra, kataio melet mo i wan toromi nam tu iting, uni det ngara.