Matiu 21 - Nupela Testamen long tokples Kandas

O Iesu i wan usapat o Jerusalem elar nama king

¹ Ra det wan milau o Jerusalem, det wanpat sapat o Betpage una Tangai na Oliw, o Iesu i tulu aru nat na ususer.

² I watungi tander lena, “Mur in nan sur a tamon kusa numugu tamur. Ra mur in nanpat, uniutra mur in tama ara dongki kura di sa ker ukai tari, tomo nam o nutunulik. Mur in palos pas der, ma mur in ben der urin torom iau.

³ Ra taio in ting mur un der, mur in watungi lena, ‘A Labino i nem der,’ ra uniutra in madek ru der torom mur.”

⁴ Di pam a utna ri sur din pam sot pas a wasiso anun o God ra a poropet i sa watung tari numugu lena,

⁵ “Mot in inanos a taro Saion lena, ‘Tama i, anumot a king i mo ra pat i wan nanan torom mot, i unatino pasi, ma i kas una dongki, a barman na dongki.’” Sek 9:9

⁶ Aru nat na ususer der wan, ma der pami elar nama wasiso ra o Iesu i sa watung tari tander.

⁷ Der ben pas a dongki tomo nam o nutunu, der rakon ru anunder aru saket, ma der ubek tari netes una aru dongki, ra o Iesu i kas un der.

⁸ A labino kunur na taro kai det rakon ru anundet a kum saket, ma det talaso i una kisapi. Ma ara taro kai det tau pas a kum turunu duwai ma det ubek tari una kisapi.

⁹ A kunur na taro ra det mugu tano, ma det kai ra det mur, det kukukuk lena, “Osana torom a Nutun o Dewid! O naro ra i wanpat nama risan a Labino i dan!” Sng 118:25-26 “Osana usapat netes sakit!”

¹⁰ Ra o Iesu i wanpat sapat o Jerusalem, a taro Jerusalem rop det kisin ra det iting lena, “Osi ra?”

¹¹ Ra a taro ra det wan tomo nami, det watungi lena, “A musano ri i o Iesu, a poropet tagitong o Nasaret una papor Galili.”

O Iesu i ruk una rumu na etabor

¹² O Iesu i ruk unin noworo ina rumu na etabor, ra i lu pirso ru a taro rop ra det siuru, ma det kai ra det kukul tiro iai. I bulus ru a kum kabulu anun a kum tene keles mani, ma a kum kiskis anundet ra det siuru a kum tabun.

¹³ Ma i watungi tandet lena, “Di sa tumus tari una Buk Tabu lenri, ‘Din watung anung a rumu nama rumu na niaring.’ Ais 56:7 Ikut mot pukusi sur in elar mukut nama ‘nubual na parparau anun a kum tene wolong.’” Jer 7:11

¹⁴ A kum pulu ma det ra a kikindet i mat det wan toromi ubalan in noworo ina rumu na etabor ma i ulangolango pas det.

¹⁵ Ra a kum lamlabino tene etabor torom o God, ma a kum tene ususer tagun a Warkurai, det tama a wakak na utna sakit ri i pami, ra det longoro i kai a kum nat liklik det kukukuk ubalan in noworo ina rumu na etabor lena, “Osana torom a Nutun o Dewid,” det kankan doko.

¹⁶ Ra det ting o Iesu lena, “Pepetlai, u sa longoro tar a kum wasiso ri anun a kum nat liklik?” O Iesu i balu det lena, “Ma! Pepetlai, ka mot luki utmakai a wasiso tagun a Buk Tabu? I watungi lena, ‘U sa ususer tar a kum nat liklik sur det in watung ulabo pas ui.’” Sng 8:2

¹⁷ Ra i wan gusun det tiro iai, ra i wan utong o Betani ra i inep pas ara bung na mirum tong.

O Iesu i bor in nanai na fig

¹⁸ Una kobot raut o Iesu i milet melet usapat o Jerusalem, ra i murak.

¹⁹ I tama in nanai na fig i tur taru una papor ina kisapi, ra i wan milau i. Ikut ke tama lako wino, a kum dono rop kut. Ra i watungi torom in nanai ra lena, “Turpasi uniri ma numur, kon wu melet mo.” Uniutra, in nanai i marang.

²⁰ Ra a kum nat na ususer det tama i, det kisin, ra det tingi lena, “In nanai na fig ri, i marang lakit lai?”

²¹ O Iesu i balu det lena, “A inanos mot nama lingmulus, ra mot nurnur, ma ka mot in wur nuknuk, mot in pam a pinapam ri a pami unin nanai na fig. Awu sur i kut ri ra mot in pami, awu. Ra mot in watungi kai torom a tangai ri lena, ‘Un taragot ma un sirok losop usa utasi,’ in pami kut.

²² Ra mot nurnur, a kum utna rop ra mot wararing suri, din pitari ut torom mot.”

A iting una dekdek ra o Iesu i ser papam nami

²³ O Iesu i ruk ubalan in noworo ina rumu na etabor, ma i ususer a taro. A kum lamlabino tene etabor torom o God ma a kum mugumugu anun a taro det wan toromi. Ra det tingi lena, “Asi na ngas na dekdek ra u pam a kum utna ri nami? Osi ra i pitar tar a dekdek ri tam?”

²⁴ Ra o Iesu i balu det lena, “Iau kai an ting mot nam ara iting. Ra mot in balu i, an inanos mot una dekdek ra a ser pam a kum utna ri nami.

²⁵ Tagai a dekdek ra o Jon i baptaiso a taro nami? Tan o God, o tan a taro kut?” Ra det wasiso etetalai torom det lena, “Ra dat in watungi lena, ‘Tan o God,’ in balu dat kut lena, ‘Sur asau ra ka mot nurnur uni?’

²⁶ Ikut ra dat in watungi lena, ‘Tan a taro,’ dat ngaran a taro, uni det rop det nurnur un o Jon lena, i a poropet.”

²⁷ Ra det balu o Iesu kut lena, “Ka met tasmani.” Numur o Iesu i watungi tandet lena, “Iau kai, kan inanos mot una dekdek ra a ser pam a kum utna ri nami.”

A wasiso elelar una ru nutnutun a musano

²⁸ O Iesu i inanos det lena, “Asau mot nuki? Ara musano aru nutnutunu, aru nat musano. I wan torom a mugano, ra i watungi tano lena, ‘Nutunglik, uniri un nan sur a kinobot na wain ma un papam.’

²⁹ Ra o nutunulik i watungi lena, ‘Iau kan nan,’ ikut numur i pukus melet a nuknukino, ra i wan.

³⁰ Ra o tamano i wan bulung torom ara pasander, ra i inanosi utkai lenra, ra o nutunulik i balu i lena, ‘I wakak kut tita, an nan ut,’ ikut ke wan.

³¹ Osi na pasander ra i mur a wasiso anun a tamander?” Det balu i lena, “A mugano.” O Iesu i watungi tandet lena, “A inanos mot nama lingmulus, a kum tene los takis ma a kum pamuk na ino, kuri det ruk mugu nanan tamot, una matanitu anun o God.

³² O Jon i wanpat ra i ususer mot una tokodos na petutna, ra ka mot nurnur uni, ikut a kum tene los takis ma a kum pamuk na ino det nurnur uni. Mot tama tar det ut, ikut ka mot nukpukus kai sur mot in nurnur uni.”

A wasiso elelar una kum tene pinapam una kinobot na wain

³³ “Mot in longoro ara wasiso elelar bulung ri: Ara musano i marut tar a kinobot na wain, ra i pam bat tari namin noworo. Tiro ubalan a kinobot, i kil tar in nutung sur din pas reseng a wino wain uni, sur a polono in nanpat. Ma i pam tar a nat na rumu lekeleke sur a tene tamtamabat. Numur i pitar tar a kinobot munung tan a ramano kum tene pinapam sur det in tamtamabati, ra i wan sur ara tamon gisen.

³⁴ Ra i milau a kalang sur din git tomo a wino wain, i tulu ru anun a kum tultul torom a taro na pinapam, sur det in los pas anunu lako kum kur wain.

³⁵ A taro na pinapam ra, det pam ukai pas anun a kum tultul, det um ara, det um doko ara ma ara kai det duku doko i nama kum watat.

³⁶ I tulu melet anun a ramano kum tultul, det susut tandet ra det mugu, ikut a taro na pinapam det pam meleti kut lenra un det.

³⁷ Numur i tulu ru o nutunulik ut torom det, uni i nuki lena det in urur uni.

³⁸ Ikut, ra a taro na pinapam det tama pas o nutunulik det wasiso tomo pas lena, ‘I ra in keles o tamano, i mo ra i wan urin. Mot iap, dat in um doko i, sur anundat mo a kinobot.’

³⁹ Ra det pam ukai pasi, det sugut pirso ru i tagun a kinobot, ma det um doko ru i.”

⁴⁰ Numur o Iesu i ting a taro lena, “Ra a taman a kinobot na wain in nanpat, asau ra in pami torom a taro na pinapam?”

⁴¹ Det balu i lena, “In um doko rop ru a sakino taro ra, ma in pitar tar a kinobot ra torom lako taro na pinapam gisen, sur det in tamtamabati. A taro na pinapam maragom ra, det in pitar tar anunu lako kum kur wain toromi una kalang na nginigit.”

⁴² O Iesu i watungi tandet lena, “Pepetlai, ka mot luk a wasiso ri una Buk Tabu? I watungi lena, ‘A wat ra a kum tene pam rumu det lakro ru tari, i ut ra, i wanpat a wakak na wat ra i udekdek a rumu. A utna ri, a Labino ut i sa pam tari, ma i wakak sakit una numet a tamtama.’ Sng 118:22-23

⁴³ I mo ra a watungi tamot lena, din rakon ru a matanitu anun o God gusun mot, ma din pitari tan ara taro ra det in wu a wakak na windet.”

⁴⁴ Osi ra in puku taru una wat ri, in tiginogino, ma osi ra a wat ri in puku taru uni, in tiginogino rop elar nama kubus.

⁴⁵ Ra a kum lamlabino tene etabor torom o God ma a kum Parisi det longoro a kum wasiso elelar anun o Iesu, det tasmani ut lena i wasiso kut un det.

⁴⁶ Ra det sisio sur tu kisapi sur det in pam ukai pasi, ikut det ngaran a kunur na taro, uni a taro det nurnur uni lena i a poropet.