Matiu 2 - Nupela Testamen long tokples Kandas

A kum tene mananos det etabor torom o Iesu

¹ Di usus o Iesu una tamon Betliem tiro una papor Judia, una kilalo ra o Erod i king. Numur a ramano kum tene mananos tagun a kum nangnang det wan tagitiro una nubual ra in matanas i pusu pat iai, ra det wanpat sapat o Jerusalem.

² Ra det iting lena, “Awai i a nat ra di ususi, sur in king anun a taro Juda? Uni met tama anun in nangnang tiro una nubual ra in matanas i pusu pat iai, ra iri met wan urin sur met in lotu toromi.”

³ Ra o king Erod i longoro i, i talara a nuknukino ma a nuknukin a taro Jerusalem rop kai.

⁴ Numur i ben tomo rop pas a kum lamlabino tene etabor torom o God ma a kum tene ususer tagun a Warkurai. Ra i ting det lena, “A Karisito ra o God in tulu ru i, din ususi awai?”

⁵ Det balu i lena, “Tong o Betliem una papor Judia, uni a poropet i sa tumus tari lenri,

⁶ ‘Ma ui o Betliem una piso anun a kabotaro Juda, Ui ko natino bing tan a kum mugumugu anun a kabotaro Juda, Uni a mugumugu in nanpat tagun ui, ra in mugu anung a taro Israel elar nama tene tamtamabat anun a kum sipsip.’” Mai 5:2

⁷ Numur o Erod i itula eno pas a kum tene mananos tagun a kum nangnang sur in talapor pas tandet lena, nangisin mulus ra in nangnang i wanpat.

⁸ I tulu ru det utong o Betliem nama wasiso lenri, “Mot nan ma mot in sisio wakak sur a natlik. Ra mot sa sio pasi, mot in inanos iau, sur iau bulung an nan ma an lotu toromi.”

⁹ Det sa longoro tar a king ra det wan. Det tama melet pas in nangnang ra det sa tama tari una nubual ra in matanas i pusu pat iai. I mugu nanan det tuk ra i tur sapat una nubual ra a natlik kura iai.

¹⁰ Ra det tama in nangnang ra, det taramo a labino gasgas.

¹¹ Det ruk una rumu, ra det tama pas a natlik, ma o nano, o Maria. Det kis butkeke ra det lotu torom a natlik. Numur det papos pas anundet a kum bek ma det tabori nama kum etabor ri: a gol, a paura di tuni ra a misino i sangnain wakak ra di watungi nama insens, ma a torok nin nanai sangsangnain kai ra di watungi nama mira.

¹² O God i sa utumarong tar det una ririon, sur gong det milet taru sur o Erod. Ra det milet sur anundet a tamon una se kisapi mukut.

A inawan eno utong o Ijip

¹³ Ra det sa wan taru, a ensel anun a Labino i wanpat torom o Josep una ririon ra i watungi lena, “Un katutur, un ben pas derano, ma motul in kalabor eno utong o Ijip. Ma motul in kis tong iai, tuk una bung ra an inanos melet ui, uni o Erod in sisio sur a natlik sur in um doko i.”

¹⁴ Ra i katutur, i ben pas derano una mirum, ma detul wan utong o Ijip.

¹⁵ Detul kis tiro iai tuk ra o Erod i mat. Una nundetul a kinkinis tiro, di pam sot pas a wasiso anun a Labino, ra a poropet i sa wasiso mugu taru uni lenri, “A kabo pas o nutunglik tagitong o Ijip.” Os 11:1

¹⁶ Ra o Erod i tama i lena a kum tene mananos tagun a kum nangnang det sa toro tari, i kankan doko ra i itula sur din um doko rop ru a kum nat musano tong o Betliem ma una kum tamon kai ra det kis milau. I pitar a warkurai sur din um doko det ra aru kilalo anundet, ma det kai ra ke ru kilalo utmakai anundet, uni a kum tene mananos det sa inanos tari una kilalo anun a natlik.

¹⁷ Ra di sa pam sot pasi maragom a wasiso ra o Jeremaia a poropet i wasiso mugu taru uni lena,

¹⁸ “Tong o Rama di longoro in nalngan ara, a tintinangis ma a ungugaia, O Rakel i domos a kum nutnutunu liklik, uni det sa mat rop, ma ka di umarip lar pasi.” Jer 31:15

O Josep detul tamano milet melet utong o Nasaret

¹⁹ O Erod i sa mat, ra a ensel anun a Labino i wanpat torom o Josep una ririon tiro o Ijip.

²⁰ Ma i watungi tano lena, “Un katutur, un ben pas derano, ma motul in nan utong o Israel, uni det ra det nem na um doko a natlik det sa mat.”

²¹ Numur i katutur, i ben pas derano, ra detul wan utong o Israel.

²² Ikut i longoro i lena, o Akelaus i keles o tamano o Erod, sur i bulung in king tong una papor Judia, ra o Josep i ngara sur in nan utong o Judia. Ra detul wan mukut utong una papor Galili, uni o God i turbat tar o Josep una ririon, sur gong detul wan utong una papor Judia.

²³ Ra detul wan ma detul kis una tamon a risano o Nasaret. Una anundetul a kinkinis tiro, di pam sot pas a wasiso anun a kum poropet lena, “Din watungi lena i a te Nasaret.”