Matiu 17 - Nupela Testamen long tokples Kandas

A pinin o Iesu i tamtama senene

¹ Numur tan a wonom na bung, o Iesu i ben pas o Pita, o Jems ma o Jon, i ra a tisin o Jems, ra i ben gisen pas detul usapat una tangai ra i tur toto bing.

² Tiro iai, detul tama a pinin o Iesu i wanpat senene. In masarino i sisio elar namin matanas, ma anun a kum malu kai i kabang doko elar nama talapor.

³ Uniutra, a tulu nat na ususer detul tama pas o Moses der nam o Elaija der wanpat ra detul wasiso tomo nam o Iesu.

⁴ O Pita i watungi tan o Iesu lena, “Labino, i wakak ra dat in kis nin. Ra u nemi, an pam lako tulu turturup, ara anumi, ara anun o Moses, ma ara kai anun o Elaija.”

⁵ Ra i wasiso utmakai, a du bakut ra i talapor doko i pulus bat pas det. Ma in nalngan ara tagisapat una du bakut ra, i watungi lena, “Iri a Nutunglik, a nat na wakak, a gas doko nami. Mot in longoro i.”

⁶ Ra a tulu nat na ususer detul longoro i, detul ngara doko, ra detul puku pirso nama matandetul una piso.

⁷ Ikut o Iesu i wan torom detul, ra i pam detul ma i watungi lena, “Motul katutur, gong motul ngara.”

⁸ Ra detul tamtama toto, ka detul tama melet taio, o Iesu sot mukut kura i.

⁹ Ra det wan pirso nanan tagisapat una tangai, o Iesu i turbat tar detul lena, “Gong motul inanos tar taio un asau ri motul sa tama tari, tuk una bung ra a Nutun a Musano in katutur melet gusun a minat.”

¹⁰ Ma anun a tulu nat na ususer detul tingi lena, “Sur asau ra a kum tene ususer tagun a Warkurai det watungi lena o Elaija in nanpat mugu?”

¹¹ I balu detul lena, “A lingmulus ut, o Elaija in nanpat mugu ma in ukodos melet a kum utna rop.

¹² Ikut uniri a watungi torom motul lena, o Elaija i sa wanpat taru, ma ka det tasman lele i, det pam a kum sakino petutna uni, elar ut nam anundet a nemnem. Lenkutkai ra torom a Nutun a Musano, in taramo a ngunungut ulaman a taro.”

¹³ Ra a tulu nat na ususer detul tasmani maragom lena, i wasiso torom detul un o Jon a Tene Baptaiso.

O Iesu i lakro ru a laulau na nion gusun ara natlik

¹⁴ O Iesu ma a tulu nat na ususer det wanpat nisan a kunur na taro, ra ara musano i wan torom o Iesu, i kis butkeke numugu nisano,

¹⁵ ma i watungi lena, “Labino, un maris a nutunglik a nat musano, i ser mat lalang, ma i ser taramo a labino ngunungut. A susut na bung i ser puku una sungun, o una danim.

¹⁶ A sa ben tari munung torom anum a kum nat na ususer, ikut ka det pet lar pasi sur det in ulangolango i.”

¹⁷ O Iesu i balu i lena, “Mot a taro tagun uniri, ka mot nurnur ma mot a kum tene sakino. A sa kis suano i torom mot. Nangisin mo mot in nurnur? Mot in ben a nat ra urin torom iau.”

¹⁸ O Iesu i wasiso dekdek torom a laulau na nion, ra i pirso mut gusun a natlik. Ra una du bung utra i langolango.

¹⁹ Numur a kum nat na ususer det wan torom o Iesu, ma det ting eno i lena, “Ilai ra ka met lakro lar pas a laulau na nion gusuni?”

^20-21 Ma i balu det lena, “Uni anumot a nurnur i natino doko. A inanos mot nama lingmulus, ra anumot a nurnur in natino elar namin pitino mastad, mot in pet lar pasi sur mot in watungi tan a tangai ri lena, ‘Un karai taginin utong,’ ra in karai kut. Katu utna in ngangitin torom mot.”

O Iesu i wasiso melet una nun a minat ma a katkatutur melet

²² O Iesu ma anun a kum nat na ususer det wan tomo tong una papor Galili, ra i watungi tandet lena, “Din pitar a Nutun a Musano ulaman a taro

²³ ma det in um doko i. Numur tan a tulu bung o God in ulaun melet pasi.” Ra a kum nat na ususer det longoro i, det tupunuk doko uni.

A takis sur a rumu na etabor

²⁴ O Iesu ma anun a kum nat na ususer det wanpat tong o Kapernaum, ra det ra det ser los takis sur a rumu na etabor, det wan torom o Pita ma det tingi lena, “Anumot a tene ususer i ser pitar a takis sur a rumu na etabor o awu?”

²⁵ Ra i mulaot lena, “Ma.” O Pita i ruk una rumu, ra o Iesu i wasiso mugu mut, ra i tingi lena, “Saimon, asau u nuki, a kum king taginin upiso det ser los a takis ma a ikul tan osi? Tan a kum nutnutun det o tan a taro gisen?”

²⁶ Ra i balu i lena, “Tan a taro gisen.” O Iesu i watungi tano lena, “Ra i lenra, a kum nutnutun det, det langolango, ka det ser kul a takis.

²⁷ Ikut, sur gong dar ban ukankan det, un nan usa utasi ma un boko. In mugano kiripo ra un dat pasi, un pagom a wano, ra un los pas a mani gusuni. Ma un los tari torom det sur a takis anundar rop.”