Matiu 15 - Nupela Testamen long tokples Kandas

A taro det unatino pas a wasiso anun o God

¹ A ramano kum Parisi ma a kum tene ususer tagun a Warkurai det wan tagisapat o Jerusalem torom o Iesu, ma det tingi lena,

² “Ilai sur anum a kum nat na ususer ka det ser mur a kum etowo anun anundat a taro tagun numugu? Ra det wangon, ka det ser gos mugu pas a lamandet.”

³ Ma i balu det lena, “Sur asau ra ka mot mur a Warkurai anun o God? Mot muri kut a kum etowo anun anumot a taro tagun numugu.

⁴ Uni o God i watungi lena, ‘Un ru o tamam ma o nam,’ Kis 20:12 ra i watungi kai lena, ‘Osi ra in wasiso laulau un o tamano ma o nano, din um doko i.’ Kis 21:17

⁵ Ikut mot, mot ususer a taro lena, i wakak kut ra taio in watungi tan o tamano ma o nano lena, ‘Asau ra an warut mur nami, a sa tabor tar o God nami.’

⁶ Ikut ra ke warut o tamano, ke ru i. Ra mot pami lenra, mot unatino pas a wasiso anun o God sur mot in muri kut a kum etowo anun anumot a taro tagun numugu.

⁷ Mot a kum tene torotoro. A wasiso anun o Aisaia i lingmulus ut, ra i wasiso na poropet mugu taru un mot lena,

⁸ ‘A taro ri det ru iau kut nama wandet, ikut a balandet i bakbak doko gusun iau.

⁹ Det lotu oros kut torom iau, uni det ususer nama kum warkurai kut anun a taro.’” Ais 29:13

A kum utna ra in udur a taro umatan o God

¹⁰ O Iesu i kabo pas a kunur na taro toromi, ra i watungi tandet lena, “Mot in longoro iau ma mot in tasman lele anung a wasiso.

¹¹ Asau ra in ruk una wan tu musano, ken uduri umatan o God. Ikut, asau ra i watungi nama wano, i ra in uduri umatan o God.”

¹² Numur anun a kum nat na ususer det wan toromi ra det tingi lena, “Pepetlai, u sa tasmani lena a kum Parisi det balano mamaut una num a wasiso?”

¹³ I balu det lena, “A kum duwai ra o Tita, ra i kis sapat una langit, ke marut det, din gat rop ru det.

¹⁴ Mot in madek ru a kum Parisi. Det a kum pulu na mugumugu. Ra tu pulu in ben tu pulu, der rop der in puku dorong un tin nutung.”

¹⁵ Ma o Pita i tingi lena, “Un palos a wasiso elelar ri torom met.”

¹⁶ Ra o Iesu i watungi lena, “Pepetlai, mot kai ka mot talapor utmakai?

¹⁷ Pepetlai, ka mot tasmani lena, a kum utna rop ra i ruk una wan a musano, i ruk unin balano ma i upirso melet ru i?

¹⁸ Ikut a kum wasiso rop ra i watungi nama wano, i wanpat gusun a nuknukino, i ra in uduri.

¹⁹ Iri a kum utna ra i ser wanpat tagun a nuknukino: a kum sakino nuknuk, a petutna ra di um doko a taro, a petutna ra di pam a sakino nam tu ino anun taio o nam tu musano anun taio, a kum petutna na pamuk, a wolong, a etakun torotoro, ma a petutna ra di mang laulau ara.

²⁰ A kum utna ri det udur a taro umatan o God. Ikut ra det wangon ma ka det gos mugu pas a lamandet, awu sur in udur det umatan o God.”

A nurnur anun a ino ra awu sur a ino Israel

²¹ O Iesu i wan tagitiro, ra i wanpat milau a tamon Tair ma o Saidon.

²² Ara ino Kenan tagitiro una papor ra, i wanpat ma i kabo o Iesu lena, “Labino, a Nutun o Dewid un maris iau. A nutunglik a ino, a laulau na nion kura uni, ra i ser ban laulau i.”

²³ Ikut o Iesu ke balu i. Anun a kum nat na ususer det wan toromi, ma det inanos dekdeki lena, “Un tulu ru i mukut, uni i woiwoi murmur dat.”

²⁴ O Iesu i watungi lena, “O God i tulu ru iau urin sur a taro Israel kut, ra det raro elar nama kum sipsip.”

²⁵ Ikut a ino ra i wan torom o Iesu, i kis butkeke numugu tano ra i watungi tano lena, “Labino, un warut iau.”

²⁶ Ra o Iesu i balu i lena, “Ke tokodos sur din los a utna ana kum nat, ma din woro i tan a kum pap.”

²⁷ A ino ra i balu i lena, “Labino, a lingmulus ut ra. Ikut, a kum pap kai det ser wan a kum mumumut na utna ra i ser puku tagun a kabulu na inangon anun a kum tamtaman det.”

²⁸ Ra o Iesu i balu i lena, “Le, i labo doko anum a nurnur! A utna ra u nemi, an pami ut torom ui.” Ma una du bung ut ra, o nutunulik i langolango.

O Iesu i ulangolango a kum misait

²⁹ O Iesu i wan tagitiro, ma i usal nanan una usalin una du tasi Galili. Numur i wan toto una tangai ra i kis sapat.

³⁰ Ma a labino kunur na taro det wan toromi. Det los det ra a kikindet i mat, ma det ben a kum pulu, a kum pio, a kum ngat, ma a susut na misait utkai toromi. Ma det inep tar det nisano, ra i ulangolango pas det.

³¹ A kunur na taro det tama a kum ngat det wasiso, ma a kum pio det tur, ma det ra a kikindet i mat det wan tokodos, ma a kum pulu kai det tamtama. Det kisin doko ra det watung ulabo pas a God anun a taro Israel.

O Iesu i tabor a wat na arip na musano

³² O Iesu i kabo pas anun a kum nat na ususer toromi ma i watungi tandet lena, “A maris doko a taro ri, uni det sa kis tomo nam iau nin a tulu bung, ma kalako utna na inangon sur det in nani. Ka nemi sur an tulu ru det kut nama munurak, sako det in bengbeng nanan una kisapi.”

³³ Anun a kum nat na ususer det inanosi lena, “A nubual ri, kalako taro uni. Tagai mo lako utna na inangon sur dat in tabor a kunur na taro ri nami?”

³⁴ O Iesu i ting det lena, “A isin beret kura mot losi?” Det balu i lena, “A wonom mawit na beret ma a kabanin natnat na kiripo.”

³⁵ Ra i inanos a taro rop sur det in kis.

³⁶ I los pas a wonom mawit nin beret ma a kabanin kiripo ra, i watung wakak pas uni torom o God, i tibiki ma i pitari torom a kum nat na ususer sur det in tabor a taro nami.

³⁷ A taro rop det wangon ma det masur. Numur det song bukus pas a wonom mawit na rat nama kum utna ra det wangon kopos pas uni.

³⁸ A kum ino tomo nama kum nat liklik ma a kum musano det rop det wangon. A niluluk ina kum musano kut i elar nama wat na arip.

³⁹ Numur o Iesu i tulu ru a kunur na taro, i kas pas una pot, ra i wan sur a papor Magadan.