Luk 9 - Nupela Testamen long tokples Kandas

O Iesu i tulu ru a noino ma aru nat na ususer

¹ O Iesu i kabo tomo pas a noino ma aru nat na ususer, ra i pitar a dekdek ma a warkurai tandet sur det in lakro ru a kum laulau na nion rop, ma sur det in ulangolango pas a taro gusun a kum misait.

² Ma i tulu ru det sur det in warawai una matanitu anun o God, ma det in ulangolango pas a kum misait.

³ Ma i watungi tandet lena, “Gong mot los tu utna una numot a inawan, gong tin nubuku, gong tu rat, gong lako utna na inangon, gong lako mani ma gong kai tin namalu na kelkeles.

⁴ Ra mot in nanpat tiro un tu rumu, mot in kis ut tiro iai tuk una bung ra mot in nan gusun a tamon ra.

⁵ Ra lako taro ka det in gas pas mot, ra mot in nan gusun anundet a tamon, mot in tang ru a kubus gusun a kikimot, sur a ukinalong na utumarong torom det.”

⁶ A kum nat na ususer det wan tuptupukus una kum tamon, det warawai nama Wakak na Wasiso, ma det ulangolango pas a taro una kum tamon rop.

A nuknukin o Erod i talara un o Iesu

⁷ O Erod a mugumugu tagun a gapman i longoro a kum utna ri i wanpat, ra i talara a nuknukino uni, uni ara taro det watungi lena o Jon i sa laun melet gusun a minat.

⁸ Ma ara taro kai det watungi lena o Elaija i sa wanpat. Ara taro kai det watungi lena ara tagun a kum poropet tagun numugu i sa laun melet.

⁹ Ikut o Erod i watungi lena, “A sa tau kutus ru tar in kabaran o Jon, ma iri, osi na musano melet ri, a longoro a kum utna ri uni?” Ra i nem doko i sur in tama o Iesu.

O Iesu i tabor a limo na arip na musano

¹⁰ A kum aposel det milet melet, ra det inanos o Iesu una kum utna ra det sa pam tari. I ben pas det kut, ra det wan gisen sur a tamon a risano o Betsaida.

¹¹ Ikut, a kunur na taro det longoro i, ra det muri. I gas pas det, ra i wasiso torom det una matanitu anun o God, ma i ulangolango pas det ra det misait.

¹² Ra i sa lirop, a noino ma aru nat na ususer det wan torom o Iesu, ra det inanosi lena, “Un tulu ru a kunur na taro sur det in nan sur a kum lamlabino tamon milau, ma a kum natnat na tamon kai, sur det in nangon ma det in inep iai, uni a nubual ri i bakbak gusun a kum tamon.”

¹³ O Iesu i balu det lena, “Mot ut mot in tabor det.” Ra det balu i lena, “A limanin beret sot kut, ma arin kiripo kuri met losi. Kutiro u nemi sur met in kul pas lako utna sur in elar nama kunur na taro rop ri?”

¹⁴ A kunur na taro ra, a niluluk ina kum musano kut i elar nama limo na arip. I watungi tan anun a kum nat na ususer lena, “Mot in tulu det sur det in kis tomo a limlimo na noino det.”

¹⁵ Ra a kum nat na ususer det pami lenutra, ma a taro rop det kis.

¹⁶ O Iesu i los pas a limanin beret ma arin kiripo, i tamtama usapat una langit, i watung wakak pas torom o God uni, i tibiki ra i pitari tan a kum nat na ususer, sur det in tibo a taro nami.

¹⁷ Det rop det wangon ma det masur. Numur det song bukus pas a noino ma aru rat nama utna ra det wangon kopos pas uni.

O Pita i wasiso talapor un o Iesu

¹⁸ Ara bung ra o Iesu sot kut i wararing, a kum nat na ususer det kis milau tari, ra i ting det lena, “A taro det watung iau nam osi?”

¹⁹ Det balu i lena, “Ara taro det watung ui o Jon a Tene Baptaiso. Ara taro det watung ui o Elaija, ma ara taro kai det watung ui, ara tagun a kum poropet tagun numugu, ra i sa laun melet.”

²⁰ Ra i ting det lena, “Ma mot, mot watung iau nam osi?” Ra o Pita i balu i lena, “Ui a Karisito ra o God i tulu ru ui.”

²¹ Ra i turbat dekdek det sur gong det inanos tar taio nami.

O Iesu i wasiso mugu una nun a minat

²² O Iesu i watungi lena, “A Nutun a Musano in taramo a susut na mamaut. A kum mugumugu, a kum lamlabino tene etabor torom o God, ma a kum tene ususer tagun a Warkurai det in rosumur gusuni ma din um doko i. Ra a tulu bung in rop, in katutur melet.”

²³ Ra i watungi tandet rop lena, “Ra taio i nemi sur in mur iau, gong i mur a nuknukino. In los pas anun in nanai kutus una kum bung rop ma in mur iau.

²⁴ Uni osi ra i maris bat anun a nilaun in iru, ikut osi ra in iru, uni i tagun iau, in laun.

²⁵ Osi ra in utur ukai a kum ututna rop taginin una rakrakon bual, ma in ban laulau anun a nilaun uni, ma in iru tukum, in wakak pepetlai toromi?

²⁶ Osi ra in maimai un iau ma una nung a kum wasiso, a Nutun a Musano kai in maimai uni, ra in nanpat tomo nama nun a minamar, ma a minamar anun o Tamano ma anun a kum ensel anun o God.

²⁷ A inanos mot nama lingmulus, lako taro tagun mot ri mot tur nin, ka mot in mat utmakai, ra mot in tama a matanitu anun o God.”

A pinin o Iesu i senene

²⁸ Ra i sa tiwal na bung bat tar a wasiso ri, o Iesu i ben pas o Pita, o Jon ma o Jems, ma det wan toto usapat una tangai sur det in wararing.

²⁹ I wararing, ra in masarino i tamtama senene, ma anun a kum malu kai i kabang doko ma i pilpil.

³⁰ Ma i wasiso tomo nam aru musano, o Moses der nam o Elaija.

³¹ Der wanpat nama minamar, ma detul wasiso una minat anun o Iesu, ra in etoromi sapat o Jerusalem, sur in pam sot pas a nemnem anun o God.

³² O Pita detul, detul inep dumun. Ra detul tuangun pat, detul tama a minamar anun o Iesu, ma aru musano kai ra der tur tomo nami.

³³ Aru musano der nem na wan mo gusun o Iesu, ra o Pita i watungi tano lena, “Tene Ususer, i wakak ra dat in kis nin. Metul in pam lako tulu turturup, ara anumi, ara anun o Moses, ma ara kai anun o Elaija”. Ikut o Pita ke tasman asau ra i watungi.

³⁴ Ra i wasiso utmakai, a du bakut i wanpat ma i pulus bat pas det, ra detul ngara ra a bakut i pulus bat det.

³⁵ Ma in nalngan ara tagisapat una bakut i watungi lena, “Iri a Nutunglik, ra a sa pilok pasi. Mot in longoro i.”

³⁶ Ra i wasiso rop pas, o Iesu sot mukut kura i. Ma ka detul wasiso uni. Ma una kum bung ra, ka detul inanos tar taio una kum utna ra detul sa tama tari.

O Iesu i lakro ru a laulau na nion gusun ara natlik

³⁷ Una bung numur, o Iesu ma a tulu nat na ususer det wan pirso tagisapat una tangai, ma a labino kunur na taro det etorom nam o Iesu.

³⁸ Ra ara musano tagun det i kakabo lena, “Tene Ususer, a saring ui sur un tama o nutunglik a nat musano, i ara sot kut.

³⁹ A laulau na nion i ser solsolongi, ma a nat i ser kisin ma i kukukuk. A laulau na nion i ser gunu dekdeki, ma a wano i ser busu. A laulau na nion ke wan gusuni, ma i ungungut laulau a pinino.

⁴⁰ A saring anum a kum nat na ususer sur det in lakro ru i, ikut ka det pet lar pasi.”

⁴¹ O Iesu i balu i lena, “Mot a taro tagun uniri, ka mot nurnur ma mot a kum tene sakino. A sa kis suano i tomo nam mot. Nangisin mo mot in nurnur? Un ben a nutumlik urin.”

⁴² Ra a nat i wan nanan utmakai torom o Iesu, a laulau na nion i woro piso tari una piso ma i gunu dekdeki. O Iesu i wasiso dekdek torom a laulau na nion ra i lakro ru i, ra a nat i langolango melet. Numur i pitar melet tari torom o tamano.

⁴³ Ma det rop det kisin una dekdekin o God. Ra det kisin utmakai una kum utna ra o Iesu i sa pam tari, i watungi tan anun a kum nat na ususer lena,

O Iesu i wasiso melet una nun a minat

⁴⁴ “Mot in longoro wakak a wasiso ri: Din pitar a Nutun a Musano ulaman a taro.”

⁴⁵ Ikut ka det talapor una kukurai ina wasiso ri. Di munu i kut gusun det, sur gong det talapor uni. Ma det ngara sur det in ting o Iesu uni.

Osi ra i labo sakit

⁴⁶ A kum nat na ususer det engaras epotor tandet sur osi tagun det ra in labo taun det.

⁴⁷ O Iesu i sa tasman a nuknukin det, i los pas ara natlik ma i utur tari tiro nisano.

⁴⁸ Ma i watungi tandet lena, “Osi ra in gas pas a natlik ri una risang, i gas pas iau ut. Ma osi ra in gas pas iau, i gas pasi utkai o naro ra i tulu ru iau urin. Uni i ra i natino tamot rop, i ut ra i labo sakit.”

Osi ra ke turbat mot i warut mot

⁴⁹ O Jon i watungi tan o Iesu lena, “Tene Ususer, met tama ara musano i lakro ru a kum laulau na nion nama risam, ra met lari sur met in turbati, uni i awu sur tagun dat.”

⁵⁰ O Iesu i balu i lena, “Gong mot turbati, uni osi ra ke turbat mot, i warut mot.”

A taro Samaria ka det nem o Iesu

⁵¹ Ra i sa milau a du bung sur din los pas o Iesu usapat una langit, a nuknukino i dekdek sur in nan usapat o Jerusalem, ma i turpas a inawan.

⁵² I tulu ru ara taro, sur det in mugu tano. Det wanpat un ara tamon una papor Samaria, sur det in waninar sur o Iesu.

⁵³ Ikut a kum te Samaria ka det nemi sur in ruk una nundet a tamon, uni in nan ut usapat o Jerusalem.

⁵⁴ Ra anun aru nat na ususer, o Jems ma o Jon der tama a petutna ri, der iting lena, “Labino, u nemi sur mir in saring o God sur in pitar ru a sungun sur in nan rop ru det?”

⁵⁵ O Iesu i ger tupukus, ma i turbat der.

⁵⁶ Ra o Iesu tomo nama nun a kum nat na ususer det wan sur ara tamon gisen.

Det ra det nem na mur o Iesu

⁵⁷ Ra o Iesu ma anun a kum nat na ususer det wan nanan una kisapi, ara musano i watungi tano lena, “An mur ui una kum nubual rop ra un nan iai.”

⁵⁸ Ra o Iesu i watungi tano lena, “A kum lomlom na pap anundet a kum tung ut, ma a kum piko kai anundet a kum pios ut, ikut a Nutun a Musano katu rumu na ininep.”

⁵⁹ I watungi tan ara musano bulung lena, “Un mur iau.” Ikut i balu i lena, “Labino, un mulaot ru iau munung sur an nan, an por ru tar o tita.”

⁶⁰ Ikut o Iesu i watungi tano, “Un madek ru a kum minat det in por anundet a kum minat. Ikut ui, un nan ma un warawai nama matanitu anun o God.”

⁶¹ Ara melet i inanos o Iesu lena, “Labino, an mur ui, ikut un mulaot ru iau munung sur an nan, ma an wasiso na itula taru munung torom det una nung a rumu.”

⁶² O Iesu i watungi tano lena, “Osi ra in turpas a pinapam na kilkil piso, ma i ger unago numur, ke topasi a pinapam una matanitu anun o God.”