Luk 4 - Nupela Testamen long tokples Kandas

O Satan i lar o Iesu

¹ O Iesu i bukus nama Tokodos na Nion. Ra i wan tagitong una danim Jodan, a Tokodos na Nion i mugu i utiro una nubual kalako taro uni.

² I kis tiro iai a wat na noino bung ra o Satan i lari. Ke wan tu utna ubalan a kum bung ra. Numur i murak.

³ Ra o Satan i watungi tano lena, “Ra ui a Nutun o God, un inanos a wat ri sur in nanpat a beret.”

⁴ O Iesu i balu i lena, “Di sa tumus tari una Buk Tabu lena, ‘A taro ka det ser laun nama utna na inangon kut.’” Lo 8:3

⁵ O Satan i ben pasi sur ara nubual sapat netes, ra i ese tar a kum tamon rop una rakrakon bual tano una nat na du bunglik kut.

⁶ Ra i watungi tano lena, “An tabor ui nama dekdekin det rop ma a kum minamarin det rop, uni di sa pitar tari tang, ma an pitari torom taio ra a nemi.

⁷ Ra un lotu torom iau, a kum utna ri, anum rop kut.”

⁸ O Iesu i balu i lena, “Di sa tumus tari una Buk Tabu lena, ‘Un lotu torom a Labino anum a God, ma un papam kut toromi.’” Lo 6:13

⁹ Numur o Satan i ben pasi usapat o Jerusalem, ma i utur tari sapat netes sakit una rumu na etabor. Ma i watungi tano lena, “Ra ui a Nutun o God, un sirok pirso taginin,

¹⁰ uni di sa tumus tari una Buk Tabu lena, ‘In inanos anun a kum ensel sur det in tamtamabat wakak ui.’

¹¹ Ma, ‘Det in pam pas ui nama kum lamandet, sur gong u tuka a kikim un tu wat.’” Sng 91:11-12

¹² O Iesu i balu i lena, “Di sa watung tari una Buk Tabu lena, ‘Gong u lar a Labino anum a God.’” Lo 6:16

¹³ Ra o Satan i sa lar tari nama kum ululam rop ri, i wan munung gusuni.

O Iesu i turpas anun a pinapam tong o Galili

¹⁴ O Iesu i milet melet utong una papor Galili nama dekdekin a Tokodos na Nion, ma a wasiso uni, i wan sarara una papor rop ra.

¹⁵ O Iesu i ususer a taro una nundet a kum rumu na lotu, ma det rop det watung ulabo pasi.

Di lu ru o Iesu tagitong o Nasaret

¹⁶ O Iesu i wanpat tiro o Nasaret, a tamon ra i labo pat iai, ma i ruk una rumu na lotu una Bung na Sabat, elar nama nun a petutna ut, ma i tur sur in luluk.

¹⁷ Ra di pitar tar a buk anun a poropet Aisaia toromi. I palos pas a buk ra di sa pul tari, ma i tama a dino ra di sa tumus tari lenri,

¹⁸ “A Nion a Labino i kis un iau, uni i sa pilok pas iau sur an warawai nama wakak na wasiso torom a kum sibo na taro. I tulu ru iau sur an warawai lenri, din palos ru det ra di sa ker ukai tar det, din utamtama melet a kum pulu, din ulangolango ru det ra det taramo a mamaut ra di sa pam tari un det,

¹⁹ ma an wasiso puaso una kilalo na marmaris anun a Labino, ra uniri i sa wanpat.” Ais 61:1-2

²⁰ I pul melet tar a buk ra, i pitar tari torom a tene pinapam tagun a rumu na lotu, ma i kis melet. A taro rop una rumu na lotu det tama dekdeki,

²¹ ma i watungi tandet lena, “A wasiso ri mot longoro i, uniri a sa pam sot pasi.”

²² Det rop det watung ulabo pasi, ma det kisin una nun a wakak na wasiso. Ra det iting lena, “A musano ri, a nutun o Josep, niko?”

²³ Ra i watungi tandet lena, “Kutiro mot in watung a wasiso elelar ri un iau: ‘Dokta, un ulangolango pas ui ut! A kum utna rop ra met longoro i lena u sa pam tari tiro o Kapernaum, i wakak ra un pami utkai nin una num a tamon.’”

²⁴ Ra o Iesu i watungi kai tandet lena, “A inanos mot nama lingmulus, katu poropet di ser gas pasi una nun a tamon ut.

²⁵ A lingmulus ut ra a susut na ula det kis tiro o Israel una kilalo ra o Elaija i kis tong, ra a tulu kilalo ma wonom na kalang ke bato, ma a labino munurak i monong a kum tamon rop.

²⁶ Ikut o God ke tulu o Elaija torom tu ino Israel, torom ara ula kut tagun a tamon Sarepat una papor Saidon.

²⁷ A susut na lepra det kis tong o Israel una kilalo anun a poropet Elisa, ikut o God ke ulangolango taio tagun det, o Neman kut a te Siria.”

²⁸ Ra det longoro a kum wasiso ri, a taro rop ra det kis una rumu na lotu, det kankan doko.

²⁹ Det katutur, ra det lu ru o Iesu tagun anundet a tamon. Det dat pasi usapat una tangai ra di pam tar anundet a tamon uni, sur det in woro pirso i una papor wat.

³⁰ Ikut i wan kut epotor tan a kunur na taro, ra i wan mut gusun det.

O Iesu i lakro ru a laulau na nion gusun ara musano

³¹ Numur o Iesu i wan utong o Kapernaum, una papor Galili, ma una Bung na Sabat, i ususer a taro.

³² Ra det kisin una nun a kum etowo, uni i ususer det elar nam ara, ra a warkurai kura ut tano.

³³ Una rumu na lotu ara musano, a laulau na nion kura uni, i kakabo dekdek lena,

³⁴ “Ai! Iesu, a te Nasaret, u ling na pam asau un met? U wanpat sur un ban laulau met? A tasman ui, ui a Tasur na Musano anun o God.”

³⁵ O Iesu i sakbati lena, “Gong u wasiso! Pirso gusun a musano ra!” Ma a laulau na nion i woro pirso tari epotor tandet rop, i pirso gusuni, ma katu du pinino i laulau.

³⁶ A taro rop det kisin doko, ra det ting etetalai det lena, “A ngas na wasiso sau ri? A warkurai ma a dekdek kura ut tano, ra i ser wasiso tan a kum laulau na nion, ra det ser pirso mut.”

³⁷ Ra a wasiso un o Iesu i wan sarara utiro una kum tamon rop una papor ra.

O Iesu i ulangolango pas a susut na misait

³⁸ O Iesu i pirso gusun a rumu na lotu, ra i wan sur a rumu anun o Saimon. Ara ino a inumun o Saimon kura urumu, a pinino i mararong doko, ra det saring o Iesu sur in waruti.

³⁹ Ra o Iesu i tur taru nisan a bano, ma i wasiso torom a misait, ra a mararong i rop gusuni. Ra i tur mut, ra i tabor det mo nama utna na inangon.

⁴⁰ Ra in matanas i ling na sup, a taro det ben pat det rop ra det misait nama kum wur ngas na misait torom o Iesu. Ma i ubek aru lamano netes un det taktakai, ra i ulangolango det rop.

⁴¹ Ma a kum laulau na nion kai det pirso gusun a susut, ra det kakabo lena, “Ui a Nutun o God.” Ra o Iesu i turbat det, sur gong det wasiso, uni det tasmani ut lena i a Karisito.

⁴² Ra i sa waspi, o Iesu i wan gusun a tamon ra, sur a nubual kalako taro uni. A kunur na taro det sisio suri. Ra det sa sio pasi, det ling na turbati sur gong mo i wan gusun det.

⁴³ Ikut i balu det lena, “An warawai nama Wakak na Wasiso una matanitu anun o God una ramano kum tamon gisen kai. Uni i a kibino ra di tulu ru iau urin.”

⁴⁴ Ra i warawai nanan una kum rumu na lotu una papor Judia.