Luk 23 - Nupela Testamen long tokples Kandas

O Iesu i tur una warkurai numugu tan o Pailat

¹ A taro na kiwung rop det tur, ra det ben o Iesu torom o Pailat.

² Ra det turpasi sur det in takuni lena, “Met pastorom a musano ri i ben raro anumet a taro. I turbat met sur gong met pitar a takis torom a Sisa, ma i warango i kai lena, i a Karisito, a king.”

³ O Pailat i tingi lena, “Ui a king anun a taro Juda?” Ra o Iesu i balu i lena, “I ut ra u sa watung tari.”

⁴ O Pailat i watungi tan a kum lamlabino tene etabor torom o God ma a kunur na taro lena, “Ka tikin pas tu petutna a musano ri i raro uni.”

⁵ Ikut, det ngongos makai lena, “Anun a etowo i ukatutur a balan a taro, sur det in lakai a warkurai anun a gapman una papor Judia rop. I turpasi tong o Galili ra i tuk taru ut nin.”

O Iesu i tur una warkurai umatan o Erod

⁶ Ra o Pailat i longoro i, i iting un o Iesu lena, “I a te Galili?”

⁷ Ra i sa tasmani lena o Iesu tagitong una papor Galili, ra o Erod i mugumugu iai, i tulu ru i toromi. Una bung ra, o Erod kai i kis sapat o Jerusalem.

⁸ Ra o Erod i tama pas o Iesu, i gas doko, uni tagun numugu utmakai i nemi sur in tama i, uni i sa longoro tar a wasiso uni, ra i nemi sur in tama tu utna na ukisin ra in pami.

⁹ Ma o Erod i ting o Iesu nama susut na iting, ikut o Iesu ke balu i.

¹⁰ A kum lamlabino tene etabor torom o God ma a kum tene ususer tagun a Warkurai kura det tur tiro iai, det takun dekdek o Iesu.

¹¹ O Erod ma anun a taro na inaim det urongon laulau uni, det nongoni, det mar tari namin wakak na malu sakit, ra det tulu melet ru i torom o Pailat.

¹² Numugu o Erod ma o Pailat der ebar, ikut una bung ra, der emarom maragom.

O Pailat i warkurai o Iesu sur in mat

¹³ O Pailat i kabo tomo pas a kum lamlabino tene etabor torom o God, ma a kum mugumugu, ma a taro,

¹⁴ ra i watungi tandet lena, “Mot sa ben tar a musano ri torom iau, elar nam ara ra i ukatutur a balan a taro, sur det in lakai a warkurai anun a gapman. Ra iri a sa ting tari umatamot, ma ka tikin pas tu petutna ra a musano ri i raro uni.

¹⁵ Ma o Erod kai, ke pastorom tu niraro, ra i tulu melet ru i urin torom dat. Tama i, ke pam tar tu utna sur in iru uni.

^16-17 I mo ra an miras tatari kut, ra an palos ru i.”

¹⁸ Ra a taro rop det kukukuk lena, “A musano ri in iru. Palos ru o Barabas torom met.”

¹⁹ O Barabas i ara musano ra di uruk tari una karabus, uni i waim nama gapman una tamon Jerusalem, ma i ser um doko a taro kai.

²⁰ O Pailat i ting melet det, uni i nemi ut sur in palos ru o Iesu.

²¹ Ikut, det kukukuk dekdek kut lena, “Sak wati unin nanai kutus! Sak wati unin nanai kutus!”

²² Ra i mantul nami i ting det lena, “Asau a kibino? Asi na sakino utna ra i sa pam tari? Ka pastorom tu sakino petutna sur in iru uni. I mo ra an miras tatari kut, ra an palos ru i.”

²³ Ikut, det dekdek nama kukukuk nama labino walngandet, sur din sak wati mukut unin nanai kutus. Ra det kukukuk taun a wasiso anun o Pailat.

²⁴ Ra o Pailat i mulaot mukut sur din pami elar nama nundet a nemnem.

²⁵ Ra i palos ru o Barabas ra i kis una karabus, uni i waim nama gapman ma i um doko a taro, i ra det sasaring suri. Ma i pitar tar o Iesu torom a kum tene inaim elar nama nemnem anun a taro.

Di sak wat o Iesu unin nanai kutus

²⁶ Ra det ben pas o Iesu sur din sak wati unin nanai kutus, det dat pas ara te Sairini, a risano o Saimon, ra i wan tagitong un ara tamon sur in nan usapat o Jerusalem. Ra det ubek tar in nanai kutus usapat netes uni, sur in los murmur o Iesu nami.

²⁷ A labino kunur na taro det mur o Iesu. Epotor tandet a wardain utkai, ra det tupunuk ma det tangisi.

²⁸ O Iesu i tupukus, ma i watungi tandet lena, “A wardain Jerusalem, gong mot tangis iau, mot in tangis mot ut, ma a kum nutnutu mot.

²⁹ Uni a kum bung na mamaut in nanpat ra a taro det in watungi lena, ‘A kum pobo na ino, ra ka det usus ma ka det ugu nat, det dan.’

³⁰ Ma ‘det in watungi torom a kum tangai lena, “Mot in puku sapat netes un met!” ma torom a kum du tultul lena, “Mot in por met!” ’ Os 10:8

³¹ Ra det pam a kum utna ri ra in nanai i laun utmakai, asau ra det in pami ra i sa marang?”

³² Ma aru kai, aru laulau na musano, di ben der tomo nam o Iesu sur din sak wat der tomo nami.

³³ Ra det wanpat una nubual ra di watungi nama, “Nubual na Lor na Minat,” tiro iai det sak wat o Iesu unin nanai kutus, ma aru sakino musano kai, ara una papor sot, ma ara kai una kair.

³⁴ Ra o Iesu i watungi lena, “Tita, un unus ru anundet a sakino petutna, uni ka det tasman asau ri det pami.” Ma det pilai laki sur det in isuaro anun a kum malu torom det taktakai.

³⁵ A taro det tur ra det ieli, ma a kum mugumugu det urongon laulau un o Iesu, det watungi lena, “I ulaun pas a taro gisen. Ra i a Karisito anun o God, anun a nat na pipilok, i wakak sur in ulaun pasi ut.”

³⁶ Ma a kum tene inaim kai det urongon laulau uni. Det wan toromi, det pitar tar a wain ra i mititir tano,

³⁷ ra det watungi lena, “Ra ui a king anun a taro Juda, uniri un ulaun pas ui mo.”

³⁸ Di tumus tari kai a tumtumus sapat netes unin nanai kutus lena, “iri a king anun a taro juda.”

³⁹ Ara tagun aru sakino musano ra der kete tomo nam o Iesu, i watung laulau i kut o Iesu lena, “Ui a Karisito, niko? Un ulaun pas ui ma mir kai!”

⁴⁰ Ma ara pasander i kankan toromi, ra i watungi lena, “Pepetlai, ui ko ngara sur o God? Uni ui kai u los ara ngas na warkurai kut elar nami.

⁴¹ I tokodos ut un dar, uni dar los a minabalu una nundar a sakino petutna. Ikut, a musano ri ke pam tu niraro.”

⁴² Ra i watungi tan o Iesu lena, “Iesu, nuk pas iau, ra un ruk una num a matanitu.”

⁴³ Ma i balu i lena, “A inanos ui nama lingmulus, uniri un kis tomo nam iau una Paradais.”

O Iesu i mat

⁴⁴ Una du bung ra, i noino ma aru pakano bung una suan, ra a bual rop i dumirum tuk una tulu pakano bung una lirop,

⁴⁵ uni in matanas ke sisio. Ra in namalu ra di mabat kutus nami sa urumu una rumu na etabor i tararos potor sur aru dino.

⁴⁶ Ra o Iesu i kukuk dekdek lena, “Tita, a pitar tar a niong un aru lamam.” Ra i sa watung tari lenri, i mat.

⁴⁷ A mugumugu anun a kum tene inaim i tama a utna ri i wanpat, ra i watung ulabo pas o God lena, “I lingmulus ut, a musano ri a tene tokodos.”

⁴⁸ A kunur na taro kura det tur tomo taru sur det in tama a utna ri. Ra det tama i, det raprapus a kum romrobon det nama tupunuk ra det milet melet.

⁴⁹ Ikut, a kum paspasan o Iesu, ma a wardain ra det muri tagitong o Galili, det tur bakbak taru ut, ma det tama a kum utna ri.

Di inep o Iesu una kulam na minat

^50-51 Ara musano, a risano o Josep, tagitong o Arimatia una papor Judia. I ara wakak na musano, ma a tene tokodos, ma i kiskis langlang sur a matanitu anun o God. I ara tagun a taro na kiwung, ikut, ke mulaot tomo nam det una nundet a warkurai ma una utna ra det pami.

⁵² I wan torom o Pailat ma i saring pas a minatin o Iesu tano.

⁵³ I los pirso pasi, i pulus pasi namin wakak na malu, ra i inep tari una kulam na minat, ra di sa kil tari una papor wat, ra katu minat utmakai i inep taru uni.

⁵⁴ A bung ra, a bung na waninar, ma milau mo a Bung na Sabat in turpasi.

⁵⁵ A wardain ra det wan tomo nam o Iesu tagitong o Galili, det mur o Josep, ra det tama tar a kulam na minat, ma a ngas na ininep ra di pami una minatin o Iesu.

⁵⁶ Ra det milet melet, ma det waninar pas a kum utna ra i sangsangnain wakak, ma a wel ra i sangsangnain kai. Ma una Bung na Sabat, det mana elar ut nama warkurai.