Luk 19 - Nupela Testamen long tokples Kandas

O Iesu ma o Sakias

¹ O Iesu i ruk utiro una tamon Jeriko, sur in nan sakit usapat o Jerusalem.

² Ra ara musano i kis tiro iai, a risano o Sakias, a mugumugu anun a kum tene los takis, ma i a tene gongon.

³ I nemi sur in tama o Iesu, ikut o Sakias a kukur na musano kut, ma ke pet lar pasi sur in tama i, kibino una kunur na taro.

⁴ Ra i kalabor usa numugu, ra i ka toto unin nanai, sur in tama o Iesu, uni in nan sakit una kisapi ra.

⁵ Ra o Iesu i wanpat tiro iai, i tatado usapat netes unin nanai, ra i watungi tano lena, “Sakias, un pirso lakit urin. Uniri an kis tomo nam ui una num a rumu.”

⁶ Ra i pirso lakit, ra i ben pas o Iesu utiro una nun a rumu nama gasgas.

⁷ A taro rop det tama i, ra det ururai uni lena, “A musano ri i wan sur in kis tomo nama tene sakino una nun a rumu.”

⁸ O Sakias i tur ra i watungi tan a Labino lena, “Tama i, Labino, ara kukur utna tagun anung a ululeng an tabor a kum sibo na taro nami. Ra a sa toro pas lako utna tan taio, an balu meleti toromi a wat na dino.”

⁹ Ra o Iesu i watungi tan o Sakias lena, “Uniri, di sa ulaun pas det ra det kis una rumu ri, uni o Sakias kai tagun a kum tumtubun o Abaram.

¹⁰ Uni a Nutun a Musano i wanpat sur in sisio sur det ra det raro ma in ulaun pas det.”

A wasiso elelar una kum tultul ra di pitar tar a mani torom det

¹¹ A taro det longoro a kum wasiso ri, ra det nuki lena a matanitu anun o God in nanpat lakit, uni o Iesu i sa milau o Jerusalem. Ra i watungi kai ara wasiso elelar

¹² lena, “Ara mugumugu i wan sur ara tamon bakbak, sur din mulaot tari sur in king, ra numur in milet melet.

¹³ Numugu tan anun a inawan, i kabo pas anun a noino tultul toromi, ra i pitar tar ara noino mani tandet, ra i watungi lena, ‘Mot in ulabo i, tuk ra an milet melet.’

¹⁴ Ikut a taro tagun anun a tamon det ngeti, ra det tulu ru ara taro sur det in muri, ma det watungi lena, ‘Ka met nem a musano ri sur in king anumet.’

¹⁵ “Ra di sa ukis tari sur in king, i milet melet. I itula sur anun a kum tultul ra i pitar tar a mani tandet, sur in mananos un asau ra i sa wanpat una anundet a pinapam.

¹⁶ Ma a mugano i wan toromi ra i watungi lena, ‘Labino, a sa ulabo melet pas a noino tagun anum a mani.’

¹⁷ I balu i lena, ‘Wakak sakit, ui a wakak na tultul! An ubek tar ui sur un tamtamabat a noino lamlabino tamon, uni u lingmulus una nat na utna.’

¹⁸ Ara bulung i wan toromi ra i watungi lena, ‘Labino, a sa ulabo melet pas a limo tagun anum a mani.’

¹⁹ Ra i balu i lena, ‘Ui kai un tamtamabat a limo na lamlabino tamon.’

²⁰ Ma ara tultul bulung i wan toromi ra i watungi tano lena, ‘Labino, anum a mani i melet mo ri, a pulus tari namin namalu ra a ubek eno wakak tari.

²¹ A ngaran ui, uni ui a tene ngalngalia. U los a utna ra awu sur u ubek tari, ma u ser pasong pas a utna ra ko marut tari.’

²² A labino i watungi tano lena, ‘Ui a laulau na tultul, an warkurai ui elar nama num a wasiso ut. U sa tasman tari lena iau a tene ngalngalia. A ser los a utna ra awu sur a ubek tari, ma a pasong a utna ra ka marut tari.

²³ Ilai ra ko ubek tar anung a mani una beng sur an los pas anung a mani ma tu sibano kai una bung ra an nanpat uni?’

²⁴ “Ra i watungi tandet ra det tur milau taru tiro iai lena, ‘Mot in los ru a mani gusuni, ma mot in pitar tari torom o naro ra anun ara noino.’

²⁵ Ma det watungi tano lena, ‘Labino, i anun ara noino kura mo tano.’

²⁶ I balu det lena, ‘A watungi tamot, osi ra a susut kura tano, din tabor meleti nama susut. Ikut osi ra kalako, din rakon ru i utkai asau lik ra kura tano.

²⁷ “‘Ra mot in ben pas anung a kum ebar ra ka det nemi sur an king anundet, mot in um doko det nin ut umatang.’”

O Iesu i wan usapat o Jerusalem elar nama king

²⁸ Ra o Iesu i sa watung tar a wasiso elelar ri, i mugu melet usapat o Jerusalem.

²⁹ Ra i wan milau o Betpage ma o Betani una tangai di watungi nama Tangai na Oliw, i tulu aru tagun anun a kum nat na ususer, nama wasiso lenri,

³⁰ “Mur in nan sur a tamon kusa numugu tamur. Ra mur in nanpat, mur in tama ara barman na dongki kura di sa ker ukai tari, ma katutaio utmakai i kas taru uni. Mur in palos pasi ma mur in beni urin.

³¹ Ra taio in ting mur lena, ‘Mur palosi sur asau?’ mur in watungi tano lena, ‘A Labino i nemi.’”

³² Der wan ra der pastorom a kum utna rop ra o Iesu i sa watung tari tander.

³³ Ra der palos pas a barman na dongki, det ra anundet a dongki, det ting der lena, “Ai, mur palos a barman na dongki ra sur asau?”

³⁴ Der balu det lena, “A Labino i nemi.”

³⁵ Der beni torom o Iesu, ma der rakon ru anunder aru saket, ma der ubek tari netes una barman na dongki ma der ukis tar o Iesu netes uni.

³⁶ Ra i wan nanan, ara taro det rakon ru anundet a kum saket, ma det talaso i una kisapi.

³⁷ Ra i sa milau una kisapi ra i wan pirso una Tangai na Oliw, a labino gasgas i los a taro na ususer rop ma det watung ulabo pas o God una kum utna na ukisin ra det sa tama i. Det watung ulabo pasi nama labino walngandet lena,

³⁸ “A king ra i wanpat nama risan a Labino i dan! Sng 118:26 A malmal sapat netes una langit, ma a minamar sapat netes sakit!”

³⁹ A ramano kum Parisi epotor una kunur na taro ra, det watungi lena, “Tene Ususer, un turbat anum a taro na ususer.”

⁴⁰ Ra o Iesu i balu det lena, “A watungi tamot, ra a taro ri ka det in ugaia, a kum watat ut det in kukukuk.”

O Iesu i tangis sur o Jerusalem

⁴¹ Ra o Iesu i sa milau o Jerusalem ra i tama i, i tangis suri, ra i watungi lena,

⁴² “Gunuk ra uniri, mot sa tasman tar a kisapi ra i topas a malmal! I parau umatamot!

⁴³ Tu bung in nanpat, ra anumot a kum ebar det in utur in noworo talilis bat anumot a tamon, det in tur talilis mot ma det in turbat anumot a kum kisapi na rukruk ma pispiso, ma det in um mot gusun a kum paporino.

⁴⁴ Ma det in rege ginogino ru a tamon, ma det in um doko mot kai ra mot kis uni. Ma ka det in madek tar tu wat in inep netes un tu wat, uni ka mot tasman lele a du bung ra o God i wanpat uni torom mot.”

O Iesu i ruk una rumu na etabor

⁴⁵ O Iesu i ruk unin noworo ina rumu na etabor, ra i lu pirso ru a taro ra det siuru.

⁴⁶ Ra i watungi tandet lena, “Di sa tumus tari una Buk Tabu lenri, ‘Din watung anung a rumu nama rumu na niaring.’ Ais 56:7 Ikut, mot sa pukus pasi sur in elar mukut nama ‘nubual na parparau anun a kum tene wolong.’” Jer 7:11

⁴⁷ Una kum bung rop, o Iesu i ser ususer a taro ubalan in noworo ina rumu na etabor. Ikut a kum lamlabino tene etabor torom o God, ma a kum tene ususer tagun a Warkurai ma a kum mugumugu anun a taro, det nuknuk sur tu kisapi sur det in um doko i uni.

⁴⁸ Ikut det lagano nuknuk taru sur tu utna ra det in pami, uni a labino kunur na taro det nem doko i sur det in longoro a wasiso anun o Iesu.