Kolosi 4 - Nupela Testamen long tokples Kandas

¹ Mot a kum mugumugu, mot in pam a tokodos na petutna torom anumot a kum tene ititula, ma a magiramot in elar kut torom det rop, uni mot tasmani lena, mot kai, anumot a mugumugu i a Labino, ra i kis sapat una langit.

Dat in wasiso un o Karisito

² Mot in dekdek nama niaring. Ra mot wararing, a nuknuki mot in talapor, ma mot in watung wakak torom o God.

³ Mot in wararing kai un met, sur o God in papos saro a kisapi, sur met in upuaso a wasiso un o Karisito, ra numugu i kis eno. A kis una karabus, uni a wasiso nama kum wasiso ri.

⁴ Mot in wararing sur an wasiso talapor wakak nami, sur an pam sot pas anung a pinapam.

⁵ Mot in papam nama mananos torom a taro ra ka det nurnur. Una kum du bung rop, ra i langolango sur mot in wasiso puaso torom det, mot in pami.

⁶ Ra mot in wasiso torom det, anumot a wasiso in wakak, ma in namnamin torom det, sur mot in balu anundet a kum iting nama tokodos na minabalu torom det rop taktakai.

O Pol i tulu ru o Tikikus utong o Kolosi

⁷ O Tikikus in inanos mot una kum utna rop un iau. I a wakak na tisindat, a lingmulus na tene pinapam ma a tultul tomo nam met una pinapam anun a Labino.

⁸ A tulu ru i torom mot, sur mot in tasman anumet a nilaun nin i pepetlai, ma sur in uragot mot.

⁹ In nan tomo nam o Onesimus, a wakak na tisindat ra i lingmulus una nun a pinapam, i ara ut tagun mot. Der in inanos mot una kum utna rop ra i wanpat nin.

A kum wasiso na marmaris

¹⁰ O Aristakus, ra i kis tomo nam iau una karabus, i pitar anun a marmaris torom mot, der nam o Mak a malin o Banabas. Ra o Mak in nanpat torom mot, mot in gas pasi, elar nama wasiso ra mot sa rakon mugu tari.

¹¹ O Iesu, ara risano kai o Jastus, i kai i pitar anun a marmaris torom mot. Detul ri, detul a tulu te Juda ra detul nurnur, ma detul sot kut tagun a taro Juda, detul papam tomo nam iau sur a matanitu anun o God. Ma detul udekdek iau.

¹² O Epapras, i ara ut tagun mot, ma a tultul anun o Karisito Iesu, i pitar anun a marmaris torom mot. I ser wararing dekdek sur mot, sur mot in tur dekdek una numot a kinkinis na nilaun un o Karisito, ma mot in tasman mulus a nemnem rop anun o God.

¹³ Uni iau ut a tama i ma a wasiso mulus uni torom mot lena, i papam dekdek sur mot, ma sur det kurong o Laodisia ma det kai tong o Ierapolis.

¹⁴ O Luk, ra a dokta ma a wakak na pasamet, ma o Demas, der pitar anunder a marmaris torom mot.

¹⁵ Mot in pitar anung a marmaris torom a kum tistisin dat kurong o Laodisia, ma torom a ino ri, o Nimpa, ma a taro na lotu kai, ra det ser lotu tomo una nun a rumu.

¹⁶ Ra di sa luk tar a pas ri torom mot, numur mot in pitari torom a taro na lotu tong o Laodisia, sur det bulung det in luki. Lenkaira, mot in luk a pas ra a sa tumus tari torom a kum Laodisia.

¹⁷ Mot in inanos o Arkipus lena, in pam rop ru a pinapam ra o God i sa pitar tari tano.

¹⁸ Iau o Pol, iau ut, a tumus a nat na wasiso na marmaris ri nama lamang torom mot. Gong mot dumano ru iau, ra a kis una karabus. A marmaris anun o God in kis tomo nam mot.