A Wakak na Wasiso un o Iesu Karisito o Jon i tumusi 6 - Nupela Testamen long tokples Kandas

O Iesu i tabor a limo na arip na musano

¹ Numur, o Iesu i wan kutus una du tasi Galili, ra di watungi kai nama du tasi Taiberias.

² A labino kunur na taro det muri, uni det sa tama tar a kum ukinalong ra i pami una kum misait.

³ O Iesu i wan toto usapat una du tangai lik ma i kis tomo nam anun a kum nat na ususer.

⁴ Ma a labino bung na lotu na Wanlakai anun a taro Juda i sa milau sur in nanpat.

⁵ O Iesu i tamtama tokodos, ra i tama pas a labino kunur na taro det wan toromi, i watungi tan o Pilip lena, “Dat in kul lako utna na inangon awai sur dat in tabor a taro ri nami?”

⁶ O Iesu i watungi lenri sur in lari kut o Pilip. Uni i ut i sa tasman asau ra in pami.

⁷ Ra o Pilip i balu i lena, “Lako utna na inangon ra din kul pasi nam lako ru mar na denaria, ken elar nam det, a lililik kut ra det in nani.”

⁸ Ara melet tagun anun a kum nat na ususer a risano o Endru, a tisin o Saimon Pita, i watungi tan o Iesu lena,

⁹ “Ara natlik kuri i los a limanin beret kut ra di pami nama bali, ma arin natnat na kiripo kai. Ikut pepetlai, in elar ut nama kunur na taro ri?”

¹⁰ A dino ra, in wuliso rop kut, ra o Iesu i tulu anun a kum nat na ususer sur det in ukis a taro tiro iai. A kunur na taro ra, a niluluk ina kum musano kut i elar nama limo na arip.

¹¹ O Iesu i los pas a limanin beret, i watung wakak pas torom o God uni, ma i tibo a taro nami, ra det kis tiro iai. I tibo det kai nam arin kiripo, elar nam anundet a nemnem.

¹² Ra det sa masur rop, i watungi tan anun a kum nat na ususer lena, “Mot in ubek tomo wakak a utna rop ra det wangon kopos pas uni, sur gong di ban laulau a utna na inangon.”

¹³ Ra det ubek tomo rop pas a utna ra a taro det wangon kopos pas uni, ma det song bukus pas a noino ma aru rat tagun a limanin beret ra.

¹⁴ A taro det tama a ukinalong ri i pami, ra det watungi lena, “I lingmulus ut, a musano ri, i a poropet ra di watungi lena in nanpat urin una rakrakon bual.”

¹⁵ Ra o Iesu i sa tasmani lena, det nem na wan toromi sur det in ungongos pasi sur in king, i wan gisen pas gusun det usapat netes una tangai.

O Iesu i wan sapat netes una tasi

¹⁶ Ra i sa lirop matano mirum, a kum nat na ususer anun o Iesu det wan piso unago una du tasi Galili.

¹⁷ Det kas taru una pot, ra det turpasi sur det in nan kutus una du tasi Galili sur o Kapernaum. I sa mirum, ma o Iesu ke wanpat utmakai torom det.

¹⁸ A dekdek na wuwu i wanpat ma a top i umenene det.

¹⁹ Ra det sa ulusu bakbak, i elar nama limo na kilomita, det tama pas o Iesu i wan sapat netes una tasi torom det una pot. Ra det ngara doko.

²⁰ Ikut o Iesu i watungi lena, “Iau kut ri. Gong mot ngara.”

²¹ Numur, det gas pasi sur in kas una pot, ra uniutra, det sot una nubual ra det wan suri.

A taro det sisio sur o Iesu

²² Una bung numur, a kunur na taro ra det kis tong una ra papor tasi, det tasmani lena ara pot sot kut i kis tiro iai. Det tasmani lena, a kum nat na ususer kut det wan, ikut o Iesu ut ke kas tomo nam det. Det kut det wan tagitiro iai.

²³ A ramano kum pot tagitong o Taiberias det sot milau una nubual ra a Labino i watung wakak una beret, ma a kunur na taro det wangon iai.

²⁴ Ra a kunur na taro det sa tasmani lena, o Iesu ma anun a kum nat na ususer ka det kis tiro iai, det kas una kum pot ma det wan utong o Kapernaum ra det sisio sur o Iesu.

O Iesu i a beret na nilaun

²⁵ A taro det sio pas o Iesu tong una ara papor du tasi Galili, ra det tingi lena, “Tene Ususer, nangisin kut ra u wan taru urin?”

²⁶ O Iesu i balu det lena, “A inanos mot nama lingmulus, awu sur mot sisio sur iau uni mot tama a kum ukinalong ra a pami, awu. Mot sisio kut sur iau uni mot wan a beret ma mot masur nami.

²⁷ Gong mot papam kut sur a utna na inangon ra i ser mereseng. Mot in papam sur a utna ra in kis tukum sur a nilaun kura numur, ra a Nutun a Musano in tabor mot nami. Uni o Tamano, o God i sa ese tari lena i mulaot un asau ra a Nutun a Musano i pami.”

²⁸ Det tingi lena, “Asau met in pami sur met in pam a pinapam anun o God?”

²⁹ O Iesu i balu det lena, “Iri a pinapam anun o God, ra mot in nurnur un o naro ra di tulu ru i urin.”

³⁰ Ra det ting meleti lena, “Asi na ukinalong un pami sur met in tama i, ma met in nurnur un ui? Asau un pami?

³¹ A kum tumtubu met tagun numugu, det wan a mana una nubual kalako taro uni, elar ra di sa tumus tari una Buk Tabu lena, ‘I tabor det nama beret tagisapat una langit ma det wani.’” Sng 78:24

³² O Iesu i watungi tandet lena, “A inanos mot nama lingmulus, awu sur o Moses ra i tabor det nama beret tagisapat una langit, o Tita ut i tabor det nami. Ra uniri, i tabor mot nama beret mulus tagisapat una langit.

³³ I ra i wan pirso tagisapat una langit, i ut a beret anun o God, ma i pitar a nilaun torom a taro una rakrakon bual.”

³⁴ Det watungi tano lena, “Labino, un tabor met nama beret ra, una kum bung rop.”

³⁵ O Iesu i balu det lena, “Iau ut a beret na nilaun. Osi ra in nan torom iau ken murak, ma osi ra in nurnur un iau ken muruk melet mo.

³⁶ A sa watung tari tamot lena mot sa tama tar iau, ikut ka mot nurnur.

³⁷ Det rop ra o Tita i pitar tar det tang, det in nan torom iau, ma osi ra in nan torom iau kan lu ru i.

³⁸ Uni a wan pirso tagisapat una langit sur an muri ut a nemnem anun o Tita, i ra i tulu ru iau urin. Awu sur a wan pirso sur an mur a nuknuking, awu.

³⁹ Ra iri a nemnem anun o Tita, i ra i tulu ru iau urin, lena, gong taio tagun det ra i sa pitar tar det tang in iru. An ukatutur pas det rop melet gusun a minat una bung na warkurai.

⁴⁰ Una nemnem anun o Tita, det rop ra det tamtama torom o Nutunu ma det nurnur uni, det in laun tukum, ma iau an ukatutur pas det gusun a minat una bung na warkurai.”

⁴¹ A ramano kum te Juda det wasiso na ururai eno un o Iesu, uni i watungi lena, “Iau a beret ra i wan pirso tagisapat una langit.”

⁴² Ra det watungi uni lena, “O Iesu a nutun o Josep kut. Dat tasman o tamano ma o nano. Ilai ra i watungi lena i wan pirso tagisapat una langit?”

⁴³ O Iesu i watungi tandet lena, “Gong mot wasiso na ururai eno.

⁴⁴ O Tita i tulu ru iau urin. Kataio in pet lar pasi sur in nan torom iau, ra o Tita ken ben tari torom iau. Ra o Tita in ben tari torom iau, iau ut an ukatutur pasi gusun a minat una bung na warkurai.

⁴⁵ A kum poropet det sa tumus tari lena, ‘O God in ususer det rop.’ Ais 54:13 Det rop ra det longoro o Tita ma det ususer tano, det in nan torom iau.

⁴⁶ Katutaio i tama tar o Tita. Ikut, i ra i wan tagisapat tan o God, i ut ra i sa tama tar o Tita.

⁴⁷ A inanos mot nama lingmulus, osi ra i nurnur un iau, i sa los pas a nilaun tukum.

⁴⁸ “Iau a beret na nilaun.

⁴⁹ A kum tumtubu mot tagun numugu det wan a mana una nubual kalako taro uni, ikut det sa mat.

⁵⁰ Ikut a beret ri, i wan tagisapat una langit. Osi ra in nani, ken mat.

⁵¹ Iau ut a beret ra i laun, ra i wan pirso tagisapat una langit. Osi ra in nangon tagun a beret ri, in laun tukum. A lingmulus, a beret ra an etabor nami, i a pining. A pitari sur a taro una rakrakon bual det in laun nami.”

⁵² A ramano kum te Juda det engaras etetalai, ra det watungi lena, “A musano ri in tabor petlan dat nama pinino sur dat in nani?”

⁵³ Ra o Iesu i watungi tandet lena, “A inanos mot nama lingmulus, ra ka mot in nan a pinin a Nutun a Musano ma ka mot in inum a gapino, katu nilaun mulus in kis un mot.

⁵⁴ Osi ra in nan a pining ma in inum a gaping, i sa los a nilaun tukum, ma iau an ukatutur pasi gusun a minat una bung na warkurai.

⁵⁵ Uni a pining, i a utna na inangon mulus, ma a gaping, i a danim na ininum mulus.

⁵⁶ Osi ra in nan a pining ma in inum a gaping, in laun un iau, ma iau an laun uni.

⁵⁷ O Tita ra i laun, i tulu ru iau, ma i tabor iau nama nilaun. Lenkutkai ra torom osi ra i wan a pining, an tabori nama nilaun.

⁵⁸ Iri a beret ra i wan tagisapat una langit, awu sur i elar nama mana, ra a kum tumtubun dat tagun numugu det wani, ma det sa mat. Osi ra in wangon tagun a beret ri, in laun tukum.”

⁵⁹ O Iesu i ususer a taro una rumu na lotu tong o Kapernaum ra i watung a kum wasiso ri.

A kum wasiso na nilaun tukum

⁶⁰ A susut tagun anun a taro na ususer det longoro a kum wasiso ri, ra det watungi lena, “A etowo ri i ngangitin doko. Osi mo in rakon sot pasi?”

⁶¹ O Iesu i tasmani lena anun a taro na ususer det wasiso na ururai eno uni. Ra i ting det lena, “Pepetlai, a wasiso ri i ban laulau mot?

⁶² In pepetlai torom mot, ra mot in tama a Nutun a Musano ra in milet melet usapat sur a tamon ra numugu i kis pas iai?

⁶³ A Nion, i ra i pitar a nilaun. A dekdekin a pinin a musano, katu utna i gas uni. A kum wasiso ra a watungi tamot, i a nion ma i pitar a nilaun.

⁶⁴ Ikut ara taro tagun mot ka det nurnur.” Numugu ut o Iesu i sa tasman tar det ra ka det nurnur uni, ma o naro kai ra in usobor tari.

⁶⁵ Ma i watungi kai lena, “Iri i a kibino ra a watungi tamot lena, kataio in nan torom iau ra o Tita ken pitar a dekdek tano, sur in mur iau.”

⁶⁶ Numur tano, a susut tagun anun a taro na ususer det milet pas gusuni, ma ka det muri mo.

⁶⁷ O Iesu i watungi tan anun a noino ma aru nat na ususer lena, “Pepetlai, mot kai, mot nemi sur mot in milet mo gusun iau?”

⁶⁸ O Saimon Pita i balu i lena, “Labino, met in nan mo torom osi? Uni anumi kut, a kum wasiso na nilaun tukum.

⁶⁹ Met sa nurnur ma met tasmani lena ui a Tasur na Musano anun o God.”

⁷⁰ O Iesu i watungi tandet lena, “A sa pilok pas mot, a noino ma aru, niko? Ikut ara tagun mot, i a turangon kut!”

⁷¹ I wasiso un o Judas, a nutun o Saimon Iskariot, ara tagun a noino ma aru nat na ususer, ra numur in usobor tar o Iesu.