A Wakak na Wasiso un o Iesu Karisito o Jon i tumusi 20 - Nupela Testamen long tokples Kandas

O Iesu kapinaimi tiro una kulam na minat

¹ Una lar una mugano bung una wik, o Maria Magdalen i wan utiro una kulam na minat. I tama i lena di sa sur gisen tar a wat gusun a matansako na kulam na minat.

² I kalabor torom o Saimon Pita der nama nat na ususer ra o Iesu i ser nem doko i, ma i watungi tander lena, “Di sa los ru pas a Labino gusun a kulam na minat, ma ka met tasmani, ra kura di inep tari awai.”

³ Ra o Pita der nama nat na ususer ra, der wan sur a kulam na minat.

⁴ Der rop der kalabor, ikut ara pasander i kalabor pas gusun o Pita, ma i kalabor pat mugu tiro nisan a kulam na minat.

⁵ I par pirso, ma i kiet, ra i tama a kum malu, ikut ke ruk.

⁶ O Saimon Pita i wanpat murmur tano, ra i ruk una kulam na minat, ma i tama i mukut a kum malu det inep taru tiro iai.

⁷ Ikut in namalu ra di rau tar in lorin o Iesu nami, ke kis tomo nama kum malu. Di sa pul tari, ma di ubek gisen tari ut.

⁸ Numur a nat na ususer, ra i mugu pat taru nisan a kulam na minat, i kai i ruk. I tama i ra i nurnur.

⁹ Ka der talapor utmakai una wasiso na Buk Tabu ra i watungi lena, o Iesu in katutur melet gusun a minat.

¹⁰ Numur aru nat na ususer der milet melet sur a tamon.

O Iesu i wanpat torom o Maria Magdalen

¹¹ O Maria Magdalen i tur nago utamon nisan a kulam na minat ma i tangis. Ra kura utmakai i tangis, i par pirso ma i kiet ruk una kulam na minat.

¹² I tama pas aru ensel kura der tiro, der emar nama kum kabang na malu ma der kis taru una nubual ra di inep tar a minatin o Iesu iai. Ara i kis una ulalong, ma ara pasander i kis una papadus.

¹³ Der tingi lena, “Le, ulai ra u tangis?” I balu der lena, “Det sa los gisen ru anung a Labino, ma ka tasmani ra kura mo di inep tari awai.”

¹⁴ Ra i tupukus, i tama pas o Iesu kura i tur taru, ikut ke tasmani lena o Iesu ut ra.

¹⁵ O Iesu i tingi lena, “Le, ulai ra u tangis? Osi ra u sisio suri?” O Maria i nuki lena a musano ra, i a tene tamtamabat tagun a kinobot, ra i watungi tano lena, “Ra ui u los gisen ru a minatin o Iesu, un inanos iau ra kura u inep tari awai, sur an nan ma an los pasi.”

¹⁶ O Iesu i watungi tano lena, “Maria!” Ra o Maria i tupukus ma i watungi tano nama wasiso Ibru lena, “Raboni!” (a kukuraino lena tene ususer).

¹⁷ O Iesu i watungi tano, “Gong u pam a pining, uni ka wan toto utmakai torom o Tita. Ikut un nan torom a kum tistising, ra un inanos det lena, an nan usapat netes torom o Tita, i ra a Tamamot kai, torom anung a God, i ra anumot a God kai.”

¹⁸ Ra o Maria Magdalen i wan torom a kum nat na ususer ra i inanos det lena, “A sa tama tar a Labino.” Ma i inanos det kai una kum utna ra o Iesu i sa watung tari tano.

O Iesu i wanpat puaso torom anun a kum nat na ususer

¹⁹ Ra i mirum una mugano bung una wik, a kum nat na ususer det kis tomo, ma det ukai bat pas det tagisa urumu, uni det ngaran a ramano kum te Juda. O Iesu i wanpat ma i tur epotor tandet, ra i watungi tandet lena, “A malmal torom mot.”

²⁰ Ra i sa watung tari lenri, i ese aru lamano ma a paporino tandet. A kum nat na ususer det gas doko, ra det tama a Labino.

²¹ O Iesu i watung meleti tandet lena, “A malmal torom mot. O Tita i tulu ru iau, lenkutkai ra a tulu mot.”

²² Ra i sa watung tari lenri, i wup det nama wuwu na wano, ma i watungi tandet lena, “A Tokodos na Nion ri, mot in utur ukai i una nilaun anumot.

²³ Ra mot in dumano ru a kum sakino petutna anun taio, o God kai in unus ru i gusuni. Ra ka mot in dumano ru tu sakino petutna anun taio, o God kai ken unus ru i.”

O Iesu der nam o Tomas

²⁴ O Tomas, ra di watungi kai nama kasango, i ara tagun a noino ma aru nat na ususer, ke kis tomo nam det una du bung ra o Iesu i wanpat pas torom det.

²⁵ I mo ra a kum nat na ususer det inanosi lena, “Met sa tama tar a Labino!” O Tomas i watungi kut tandet lena, “Ra kan tama a kinan a nil una aru lamano, ma kan uruk in kaskas na lamang uni, ma ra kan uruk a lamang una kinan a bele una paporino, iau kan nurnur.”

²⁶ Ra i sa ra wik bati, a kum nat na ususer det kis tomo melet tiro urumu, det tomo nam o Tomas. Det ukai bat pas det ut tagisa urumu. Ikut o Iesu i wanpat puaso ma i tur epotor tandet, ra i watungi lena, “A malmal torom mot!”

²⁷ Numur i watungi tan o Tomas lena, “Uruk in kaskas na lamam nin, ma un tama aru lamang. Tulsu a lamam urin, ma un uruki una paporing. Ra gong mo u wur nuknuk, un nurnur kut.”

²⁸ O Tomas i watungi tano lena, “Anung a Labino ma anung a God!”

²⁹ O Iesu i inanosi lena, “U nurnur maragom uni u tama iau, niko? Det ra ka det tama iau, ikut det nurnur, det dan.”

A kibino ra di tumus a buk ri

³⁰ O Iesu i pam a susut na ukinalong kai umatan anun a kum nat na ususer, ra ka di tumus ukai det una buk ri.

³¹ Ikut di tumus ukai pas a ramano kum utna ri, sur mot in nurnur lena o Iesu i a Karisito, a Nutun o God. Ra mot in nurnur uni, mot in laun nama risano.