A Wakak na Wasiso un o Iesu Karisito o Jon i tumusi 2 - Nupela Testamen long tokples Kandas

O Iesu i pukus a danim sur a wain

¹ Numur tan a ru bung, di pam a lukaro na unolin tong o Kana, una papor Galili. O nan o Iesu i wan una lukaro ra.

² Di saring o Iesu ma anun a kum nat na ususer kai sur det in nan una lukaro na unolin.

³ Ra a wain i sa rop, o nan o Iesu i watungi tano lena, “A wain i sa rop.”

⁴ O Iesu i balu i lena, “Nang, ilai ra u inanos iau nami? Anung a du bung ke sot utmakai.”

⁵ O nan o Iesu i watungi tan a kum tultul lena, “Mot in pami kut asau ra in watungi tamot.”

⁶ Tiro iai, a wonomnin lamlabino koto ra di pami nama wat kura di utur tari sur a nginigis, elar ut nama warkurai tagun a lotu anun a taro Juda. Unin tekteken nokoto ri, di ser ubukusi nama ru noino galen na danim o a tulu noino.

⁷ O Iesu i watungi tan a kum tultul lena, “Mot in ubukus tar a kum koto nama danim.” Ra numur det titior bukus rop tar det.

⁸ Ra o Iesu i tulu det lena, “Mot in itup pas lako danim tagun a kum koto, ma mot in losi torom a mugumugu na lukaro.” Ra det pami ut lenra.

⁹ A mugumugu na lukaro i inum tama a danim ra, ra i sa wain rop. Ke tasmani lena a wain ri i wan tagai. A kum tultul kut ra det itupi det tasmani. Ra i kabo gisen pas a musano ra di unolini una bung ra,

¹⁰ ma i watungi tano lena, “A taro rop det ser tabor mugu a taro nama wakak na wain. Ra det sa inum pas a susut na wain, det in tabor det mukut nama wain ra ke wakak bing. Ikut ui, u etabor maragom nama wain ra i wakak sakit.”

¹¹ Iri a mugano ukinalong ra o Iesu i pami. I pami tong o Kana una papor Galili. A ukinalong ra, i ese puaso anun a minamar, ma anun a kum nat na ususer det nurnur uni.

¹² Numur, ra a lukaro na unolin i sa rop, i wan utong o Kapernaum. Det wan tomo nam o nano, a kum tistisino ma anun a kum nat na ususer. Det kis tiro iai a kabano bung ut.

O Iesu i lakro ru a kum tene siuru gusun a rumu na etabor

¹³ Ra a labino bung na lotu na Wanlakai anun a taro Juda i sa milau, o Iesu i wan usapat o Jerusalem.

¹⁴ Tiro ubalan in noworo ina rumu na etabor, i tama a taro ra det siuru a kum bulumakau, a kum sipsip, ma a kum tabun. I tama i kai a kum tene keles mani, kura det kis nisan anundet a kum kabulu.

¹⁵ I mo ra i iris pas a kum warus sur in pam in narus na inaim, ra i lu pirso ru det rop nami. I lu pirso ru a kum bulumakau ma a kum sipsip, ma i woro sarara ru a kum mani anun a kum tene keles mani, ma i bulus ru anundet a kum kabulu.

¹⁶ Ma i watungi tandet ra det siuru a kum tabun, “Mot in los pirso ru det taginin! Gong mot pukus a rumu anun o Tita sur a rumu na siuru!”

¹⁷ Anun a kum nat na ususer det nuk pas a wasiso una Buk Tabu lena, “An iru uni anung a labino marmaris sur anum a rumu.” Sng 69:9

¹⁸ A taro Juda det wanpat melet torom o Iesu ma det tingi lena, “Asi na ukinalong un ese met nami, sur met in tasmani lena u utur ukai a warkurai ra u pam a kum utna ri nami?”

¹⁹ O Iesu i balu det lena, “Mot in rege ru a rumu ri anun o God, ma an utur melet pasi kut un lako tulu bung.”

²⁰ Det ting o Iesu lena, “Di pam tar a rumu ri una wat na noino ma wonom na kilalo, ra ui, pepetlai, un pam melet pasi kut un lako tulu bung?”

²¹ O Iesu i wasiso una rumu anun o God, i wasiso elelar ut una pinino.

²² Numur, ra o Iesu i sa laun pat melet gusun a minat, anun a kum nat na ususer det nuk melet pas a wasiso ri. Numur det nurnur maragom una Buk Tabu, ma una wasiso ra o Iesu i sa watung tari.

²³ O Iesu i kis sapat o Jerusalem una labino bung na lotu na Wanlakai, ra a susut na taro det tama a kum ukinalong ra i pami, ma det nurnur una risano.

²⁴ Ikut o Iesu ke nurnur un taio, uni i tasman a taro rop.

²⁵ Ke sibo sur taio ra in inanosi una petutna anun a taro, uni i ut i tasman wakak a balandet.