A Wakak na Wasiso un o Iesu Karisito o Jon i tumusi 1 - Nupela Testamen long tokples Kandas

O Iesu i a Wasiso anun o God

¹ Numugu utmakai ra ka di ukisi utmakai a rakrakon bual, a Wasiso i sa kis mugu taru. A Wasiso i kis tomo nam o God, ma a Wasiso i ut o God.

² Numugu utmakai i kis tomo nam o God.

³ Una Wasiso kut, o God i ukis a kum utna rop. Katu utna o God i ukis tari, ra ke ukisi nama Wasiso.

⁴ A nilaun i kis uni, ma a nilaun ra, i a talapor anun a taro rop.

⁵ A talapor i sisio una dumirum, ma a dumirum ke pulus lar pasi.

⁶ O God i tulu ru ara musano, a risano o Jon.

⁷ I wanpat sur in wasiso puaso una talapor, sur a taro rop det in nurnur uni.

⁸ I ut awu sur a talapor, i wanpat kut sur in wasiso puaso una talapor.

⁹ A talapor mulus, ra i ser utalapor a taro rop, in nanpat mo urin una rakrakon bual.

¹⁰ A Wasiso i kis una rakrakon bual. Ma una Wasiso, o God i ukis a rakrakon bual, ikut a taro una rakrakon bual ka det tama lele pasi.

¹¹ I wanpat sur anun a taro, ikut anun a taro ut ka det gas pasi.

¹² Ikut, torom det ra det gas pasi, ma det nurnur una risano, i mulaot pas det sur det a kum nutnutun o God.

¹³ Awu sur di watung det a kum nutnutun o God kibino una usus na kabotaro, o una nuknukin tu musano taginin upiso, o una nemnem tagun a nolin, awu. Di usus det una nion, una nemnem ut anun o God.

¹⁴ A Wasiso i wanpat a musano mulus, ma i kis epotor tamet. Met sa tama tar anun a minamar, a minamar anun o Nutunu, ara sot kut, ra i wan tagisapat tan o Tamano, i bukus nama marmaris ma a lingmulus.

¹⁵ O Jon i wasiso talapor uni, ma i watungi namin labino walngano lena, “I ut ri, ra a wasiso mugu taru uni lena, ‘I ra in mur tang, i labo tang, uni i laun raut numugu tang.’”

¹⁶ I bukus nama marmaris, ma gusun anun a labino marmaris i udan dat nama susut na wakak na utna ra i wanan pat torom dat.

¹⁷ Un o Moses, o God i pitar tar a Warkurai torom dat, ikut un o Iesu Karisito i pitar tar a marmaris ma a lingmulus torom dat.

¹⁸ Kataio utmakai i tama tar o God. Ikut ara Nutunu kut, ra i kis tomo nam o Tamano, i ut i ese o God torom dat. Ma i ut o God.

O Jon a Tene Baptaiso i inanos talapor a taro uni ut

¹⁹ A kum mugumugu anun a taro Juda tagisapat o Jerusalem, det tulu ru a ramano kum tene etabor torom o God, ma a ramano taro tagun a kabotaro Liwai, torom o Jon sur det in tingi lena, “Ui osi?”

²⁰ O Jon ke wasiso batbati, i wasiso talapor ut uni lena, “Awu sur iau a Karisito.”

²¹ Det ting meleti lena, “Osi ui? Ui o Elaija?” Ra i balu det lena, “Awu, awu sur iau o Elaija.” Det ting meleti lena, “Ui a poropet ra di watung tari sur in nanpat?” I balu det lena, “Awu.”

²² Numur det tingi lena, “Osi ui? Un inanos met sur met in inanos det ra det tulu ru met urin. Asau un watungi un ui ut?”

²³ O Jon i balu det lena, “Iau a musano ra a poropet Aisaia i wasiso mugu taru uni lena, ‘Una nubual kalako taro uni, in nalngan ara i kakabo lena: Mot in pam kodos a kisapi anun a Labino.’” Ais 40:3

²⁴ A kum Parisi ra di tulu tar det torom o Jon,

²⁵ det tingi lena, “U watungi lena, awu sur ui a Karisito, ma awu sur ui kai o Elaija, o a poropet, ra di watung tari sur in nanpat. Ra i lenra, ilai sur u baptaiso a taro?”

²⁶ O Jon i balu det lena, “Iau, a baptaiso mot nama danim, ikut ara kura i tur epotor tamot, ra ka mot tasman pasi.

²⁷ I ra, in mur tang. Ka elar sur an palos aru su gusun aru kikino, uni a natino doko tano.”

²⁸ A kum utna ri, i wanpat tong o Betani una ara papor danim Jodan, ra o Jon i baptaiso a taro iai.

O Iesu a Barman na Sipsip anun o God, ra in mat una sakino petutna anun a taro

²⁹ Ara bung numur, o Jon i tama o Iesu i wan nanan toromi, ra i watungi uni lena, “Mot tama i, a Barman na Sipsip anun o God, ra in lakro ru a sakino petutna anun a rakrakon bual.

³⁰ A musano kut ri, ra a wasiso mugu taru uni lena, ‘A musano ra in mur tang, i labo tang, uni i laun raut numugu tang.’

³¹ Iau kai numugu ka tasmani. Ikut a baptaiso nama danim sur an upuaso a musano ri torom a taro Israel.”

^32-33 Ma o Jon i watungi lena, “Ka tasmani lena osi a Karisito. Ikut o God, ra i tulu ru iau sur an baptaiso nama danim, i inanos iau lena, ‘Un tama a Tokodos na Nion in nan pirso ma in kis un ara musano. I ra a musano ra in baptaiso nama Tokodos na Nion.’ Ma a tama a Tokodos na Nion i wan pirso tagisapat una langit, i elar namin natabun ma i kis taru netes un o Iesu.

³⁴ A sa tama tar a utna ri i wanpat, ra a inanos uni lena, i a Nutun o God.”

A kum mugano nat na ususer anun o Iesu

³⁵ Ara bung palu melet, o Jon ma aru nat tagun anun a kum nat na ususer detul tur taru melet tiro.

³⁶ I tama pas o Iesu i wan sakit detul, ra i watungi uni lena, “Tama i, a Barman na Sipsip anun o God.”

³⁷ Aru nat na ususer der longoro a wasiso ra, ma der muri mut o Iesu.

³⁸ O Iesu i tur tupukus, i tama der ra der muri, ra i ting der lena, “Asau ra mur nemi?” Der balu i lena, “Rabai,” (a kukuraino a Tene Ususer), “kura u kis awai?”

³⁹ O Iesu i balu der lena, “Mur iap sur mur in tama i.” I mo ra der muri, ma der tama a dino ra o Iesu i kis iai. Ra detul wanpat, i sa wat na pakano bung pas, ma detul kis mukut tiro iai a kudulano lirop ra.

⁴⁰ Ara tagun aru musano ra der longoro a wasiso anun o Jon ma der mur o Iesu, a risano o Endru, a tisin o Saimon Pita.

⁴¹ A mugano utna ra o Endru i pami, i sio pas o Saimon a tisinolik, ra i inanosi lena, “Met sa sio pas a Mesaia!” (a kukuraino a Karisito).

⁴² O Endru i ben pas o Saimon torom o Iesu. O Iesu i tama i, ra i watungi tano lena, “Ui o Saimon, a nutun o Jon, din watung ui nam o Kepas.” (Una wasiso Grik di watungi nam o Pita, a kukuraino a wat.)

O Iesu i kabo pas o Pilip ma o Natanael

⁴³ Ara bung palu melet, o Iesu i nem na wan utong o Galili. I sio pas o Pilip, ra i watungi tano lena, “Un mur iau.”

⁴⁴ O Pilip, tagitong o Betsaida, a tamon anun o Endru ma o Pita.

⁴⁵ O Pilip i sio pas o Natanael, ra i inanosi lena, “Met sa sio pas a musano ra o Moses i tumtumus mugu taru uni una Buk na Warkurai, ma a kum poropet kai det sa tumtumus mugu taru uni. I ra, o Iesu a te Nasaret, a nutun o Josep.”

⁴⁶ Ikut o Natanael i balu i lena, “O Nasaret! Pepetlai, tu wakak na utna ut in nanpat tagitiro iai?” O Pilip i balu i lena, “Un nan urin ma dar in nan sur un tama i.”

⁴⁷ O Iesu i tama pas o Natanael i wan nanan toromi, ra i watungi lena, “A te Israel mulus ut ri, ke tasman a torotoro.”

⁴⁸ O Natanael i ting o Iesu lena, “U tasman lan iau?” I balu i lena, “Ra o Pilip ke kabo pas ui utmakai, a sa tama mugu tar ui ra u kis taru nago utuntudu in nanai na fig.”

⁴⁹ O Natanael i watungi tano lena, “Tene Ususer, ui a Nutun o God, ui a King anun a taro Israel.”

⁵⁰ O Iesu i watungi tano lena, “Pepetlai u nurnur un iau, uni a inanos ui lena u kis taru nago utuntudu in nanai na fig? Numur un tama a kum lamlabino utna sakit in nanpat, in labo taun a utna ri u tama i.”

⁵¹ O Iesu i watung meleti lena, “A inanos mot nama lingmulus, mot in tama a langit in papos, ma a kum ensel anun o God det in nanan toto ma det in nanan pirso torom a Nutun a Musano.”