Ibru 5 - Nupela Testamen long tokples Kandas

¹ A kum mugumugu na tene etabor rop torom o God, o God i pilok pas det tagun a taro, ma i ubek tar det sur det in tur ukinalong a taro umatano. Det in pitar a kum etabor ma det in tun a kum wewegua sur o God in unus ru a kum sakino petutna anun a taro.

² A mugumugu na tene etabor torom o God i pet lar pasi sur in papam nama marmaris torom a taro ra ka det mananos ma det wan raro, uni i kai, kalako dekdekino sur in winim pas a sakino.

³ Iri a kibino ra i ser tun a kum etabor torom o God. Awu sur i pami sur in unus ru i kut a kum sakino petutna anun a taro, awu. Sur in unus ru i kai anun a kum sakino petutna.

⁴ Di ser pitar a labino urur una pinapam na mugumugu na tene etabor torom o God, ma katutaio in los a tinibo ra, una nun a nemnem ut, awu. In losi kut una kakabo ut anun o God, elar nami ra i pami un o Aron.

⁵ Lenkutkai ra, o Karisito ke ulabo pasi sur in mugumugu na tene etabor torom o God. Ikut o God i watungi toromi lena, “Ui a Nutung, ma uniri a sa wanpat o Tamam.” Sng 2:7

⁶ Ma un ara dino kura una Buk Tabu, o God i watungi kai lena, “Ui a tene etabor torom o God, elar nam o Melkisedek, ma anum a pinapam in tur tukum.” Sng 110:4

⁷ Ra o Iesu i laun nin una rakrakon bual, i kukukuk nam anun a kum niaring nama lurlur na matano torom o God, i ra i pet lar pasi sur in ulaun pasi gusun a minat. Ma o God i longoro i, uni i unatino pasi utuntudu ino.

⁸ I lingmulus o Iesu a Nutun o God, ikut i taramo i ut a ngunungut. Ma a ngunungut ra, i ususeri sur in mur a nemnem anun o God.

⁹ O God i pam sot pas a pinapam ra un o Nutunu, ra o Nutunu i wanpat a kibin a pinapam na ulaun tukum a taro, torom det rop ra det ser mur anun a wasiso.

¹⁰ Ra o God i ubek tar o Iesu sur i a mugumugu na tene etabor, elar nam o Melkisedek.

A utumarong sur gong taio i wan gisen gusun a nurnur

¹¹ A susut na utna utmakai ra met in wasiso uni una utna ri. Ikut i ngangitin sur met in palosi torom mot, uni ka mot los lakiti.

¹² Mot sa nurnur suano mot, ra uniri i sot mo sur mot a kum tene ususer. Ikut, mot sibo utmakai sur taio in ususer mot melet una kum mugano ususer una wasiso anun o God. Ka mot nan lar pas a dekdek na utna, mot sus kut.

¹³ Osi ra i sus utmakai, i a nat miso, ma ke lason una etowo una tokodos na petutna.

¹⁴ Det ra det sa labo, det wan a dekdek na utna na inangon, uni det sa ulason det sur det in tama lele a wakak na petutna ma a sakino.