Ibru 1 - Nupela Testamen long tokples Kandas

A Nutun o God i labo sakit taun a kum ensel

¹ Numugu utmakai o God i wasiso torom a kum tumtubun dat nama wan a kum poropet. I wasiso una susut na dino ma una wur ngas na kisapi.

² Ikut una kum ururop na bung ri, i wasiso torom dat nama wan o Nutunu. O Nutunu ra i pilok pasi sur in los a kum utna rop anun o God. Ma una laman o Nutunu, o God i ukis a rakrakon bual rop.

³ O Nutunu i talapor doko nama minamar anun o God, ma i elar mulus ut nam o God. I pam ukai a kum utna rop nama nun a dekdek na wasiso sur det in papam tomo wakak. I pitar tar anun a nilaun, sur in rus talapor dat gusun a kum sakino petutna rop. Ra i sa pam rop tar a pinapam ra, i kis una papor sot na laman a labino King sakit, sapat netes una langit.

⁴ I mo ra, o God i ulabo pas o Nutunu sur in labo sakit taun a kum ensel. I labo sakit, lar ut a risano i labo sakit taun a risan a kum ensel. A risano ra o Tamano i pitar tari tano.

⁵ Uni o God awu sur i watungi torom tu ensel lenri, “Ui a Nutung, ma uniri a sa wanpat o Tamam.” Sng 2:7 ma awu sur i watungi kai un tu ensel lena, “Iau o Tamano, ma i a Nutung.” 2 Sml 7:14

⁶ Ikut, ra o God i tulu ru a mugano Nutunu urin una rakrakon bual, i watungi uni lenri, “I wakak ra a kum ensel rop anun o God det in lotu toromi.” Lo 32:43

⁷ Ma i watungi una nun a kum ensel lenri, “I pukus anun a kum ensel sur det in elar nama wuwu, a kum ensel ra det anun a kum tultul, i pukus det sur det in elar kai nama kunabor ina sungun.” Sng 104:4

⁸ Ikut o God i watungi un o Nutunu lenri, “God, anum a kiskis na king in kis tukum ma ken rop. U ser warkurai sur a taro tagun anum a matanitu nama tokodos na petutna.

⁹ U nem doko a tokodos na petutna, ma u nget a sakino petutna. I mo ra o God, anum a God, i pilok pas ui, ma i pitar tar a gasgas ma a urur tam, ra i labo sakit taun a gasgas ma a urur ra i pitari torom a kum paspasam.” Sng 45:6-7

¹⁰ Ma o God i watungi kai torom o Nutunu lenri, “Labino, una turturkibino, ui u ukis tar a kibin a rakrakon bual, ma u ukis a bakut nama lamam.

¹¹ Der in rop kut, ikut ui un kis tukum. Der in turai elar namin namalu.

¹² Un pul der elar namin namalu na rakrakup, un keles der elar nam ara ra i keles ru in turai na malu. Ikut ui, kon keles, un kis lenutra, ma anum a kum kilalo ken rop.” Sng 102:25-27

¹³ O God awu sur i watungi kai torom tu ensel lenri, “Un kis una papor sot na lamang, tuk ra an winim pas anum a kum ebar sur det in kis utuntudu in anum a warkurai.” Sng 110:1

¹⁴ A kum ensel rop det a kum nion, ra det papam torom o God, niko? I tulu ru det sur det in warut a taro, det ra in ulaun det.