Epeses 5 - Nupela Testamen long tokples Kandas

A nilaun una talapor

¹ Mot in laun elar nama nilaun anun o God, uni mot a kum nutnutun o God, ma i maris doko mot.

² Mot in laun nama marmaris, elar nam o Karisito i maris dat, ra i pitar tar anun a nilaun sur dat, elar nama etabor ra i sangnain wakak torom o God.

³ Gong tu pamuk na petutna i kis epotor tamot, gong tu dur na petutna, ma gong kai mot nemnem sur a susut na ululeng. Uni a kum petutna ri ke tokodos sur a tokodos na taro anun o God det in pami.

⁴ Gong mot watung tu laulau na wasiso, o tu longlong na wasiso, ma gong mot urongon laulau nama kum sakino urongon. A kum wasiso ri ke wakak sur mot in watungi, ikut mot in watung wakak torom o God.

⁵ Mot in tasman a utna ri: Det ra det pam a pamuk na petutna, o a kum dur na petutna, o det nem doko a susut na ululeng, ka det in rakon a matanitu anun o Karisito ma anun o God. Uni det ra det nem doko a susut na ululeng, det a kum tene lotu torom a kum torotoro na god, uni a kum ululeng anundet a god.

⁶ Gong mot madek tar taio sur in toro pas mot nam tu wasiso oros kut. Uni a kum petutna ra, in dat pas a kankan anun o God torom det ra det pitarngat.

⁷ Lenra, gong mot tur tomo nam det una nundet a kum sakino petutna.

⁸ Numugu mot kis una dumirum, ikut uniri, mot kis una talapor uni mot tagun a Labino. Mot in laun elar nama kum nutnutun a talapor.

⁹ Uni a nilaun anun o naro ra i kis una talapor i wu a wino lenri: a kum wakak na petutna, a kum tokodos na petutna, ma a lingmulusino.

¹⁰ Mot in sisio sur a petutna ra a Labino i gas nami, sur mot in pami.

¹¹ Gong mot pam a kum petutna ra a taro tagun a dumirum det ser pami, ra kalako windet. Ikut, mot in upuaso i lena anundet a kum petutna ke wakak.

¹² Uni a utna na maimai sakit, ra dat in wasiso una kum petutna ra a kum tene pitarngat det ser pam eno i.

¹³ Ikut a talapor i upuaso a kum petutna rop sur in nanpat puaso.

¹⁴ Uni a talapor in utalapor a kum utna, ra din tama lele det. I mo ra di watungi lenri, “Ui a tene ininep, un tuangun, ma un katutur melet gusun a minat, ma o Karisito in utalapor ui.”

¹⁵ Mot in tamtamabat wakak anumot a ngas na nilaun ra mot laun nami, ma gong mot laun elar nama kum longlong, mot in laun elar nama taro na mananos.

¹⁶ Una kum du bung rop, ra i langolango sur mot in pam a wakakino, mot in pami, uni a kum bung ri, a kum laulau na bung.

¹⁷ Lenra, gong mot laun elar nama kum longlong, mot in tasman a nemnem anun a Labino.

¹⁸ Gong mot sipak nama wain, uni in ban laulau anumot a nilaun. Ikut, mot in bukus nama Tokodos na Nion.

¹⁹ Ma mot in wasiso etetalai nama kum kelekele tagun a Kum Kelekele anun o Dewid, a kum kelekele na lotu, ma a kum kelekele ra a Tokodos na Nion i tabor mot nami. Mot in kelekele ma mot in rakon lekeleke a Labino nama balamot.

²⁰ Ma una kum bung rop, mot in watung wakak una kum utna rop torom o God a Tamandat, nama risan anundat a Labino o Iesu Karisito.

A etowo una kinkinis na nolin

²¹ Mot in unatino pas mot torom mot etetalai, uni mot urur torom o Karisito.

²² Mot a kum nolin na ino, i wakak sur mot in ser unatino pas mot torom anumot a kum musano elar nami ra mot ser unatino pas mot torom a Labino.

²³ Uni a musano in lorin a kinkinis na nolin, elar nam o Karisito in lorin a taro na lotu, ma det a pinino, ma i anundet a Tene Ulaun.

²⁴ A kum nolin na ino det in ser unatino pas det torom anundet a kum musano una kum utna rop, elar nama taro na lotu det ser unatino pas det torom o Karisito.

²⁵ Mot kai, a kum nolin na musano, mot in ser nem anumot a kum ino, elar nam o Karisito i maris a taro na lotu, ra i pitar tar anun a nilaun sur det,

²⁶ sur det anun a taro mulus. Ma i rus talapor det nama danim ma anun a wasiso.

²⁷ I pami lenri sur in ben pas anun a taro toromi, elar nam anun a wakak na ino ra katu dur uni, ma kalako karkar uni, ma katu sakino utna uni. In tokodos ma katu etakun in losi.

²⁸ Lenkutkai ra, a kum musano det in nem anundet a kum ino elar nami ra det nem a pinindet ut. A musano ra i nem anun a ino, i nemi ut.

²⁹ Katutaio in nget a pinino ut, awu. I ser tamtamabati, ma i ser tabori, elar nami ra o Karisito i pami una nun a taro na lotu.

³⁰ Uni dat a kum du pinin o Karisito.

³¹ A Buk Tabu i watungi lena, “Iri a kibino ra a musano in nan gusun o tamano ma o nano, ma in kis tomo nam anun a ino, sur der in takai mukut.” Stat 2:24

³² A wasiso ri ra i kis eno, a labino kukuraino. I wasiso un o Karisito ma a taro na lotu.

³³ Ikut, arara tagun mot in nem anun a ino elar nami ra i nemi ut. Ma a ino, in urur torom anun a musano.